والله البلد فيها خير .. وعيال البلد فيهم خير
سواء تجار او ناس عاديين .. وكلنا نبي الرزق من الله

والله اللي كسر خاطري وقلب راسي ..
دقت علي الوالده اليوم قالت فيه وحده ضعيفة ومسكينة وتبي مننا صدقه لله ..
انا راح على بالي انها وحده من احد المساكين الغير سعوديين واللي محتاجين شي يسد جوعهم ويكفيهم ..
فأنصدمت لما قالت لي انها سعودية اصل وفصل ومن ديرة معروفة .. وساكنة بالرياض

وجانا ولدها شاب والله ما تعدى 25 سنة في عز شبابة واخوه اصغر منه بشوي ..
وجلست معه انا والوالد وسألناه عن احواله وهل هو مرتاح ووش محتاج وغيرها وقال انا ما معي غير الابتدائي والوالد مريض واخوي الصغير معاق وعندي 4 خوات وحده متزوجه وزوجها كل يوم يضربها بسبب هالمسكرات وساكنين في ايجار ولا عندي وظيفة واخواني صغار والايجار سنة يسددون عننا اهل الخير وسنة مانلاقي حق الايجار ويسامحنا صاحب البيت .. ويتكلم وأنا اشوف نفسي واقول الحمدلله على كل حال
واللي يشوف مصيبة غيره تهون عليه مصيبته ..

والله انه ما راح عن بالي وقاعد اتخيل كيف هم عايشين لا حافز قبلهم ولا اعانة دولة ولا شيء غير عطايا المحسنين من هالبلد بلد النفط اغنى بلد على وجه الأرض ..

ونويت اني اجمع لي قروش واشتري ونيت وأتصدق به عليه .. لأجل انه يشتغل في الخضار اللي هو اساساً لازم يكون كله سعوديين ولكن مع الاسف كله اجانب ماكلين الاخضر واليابس وعايشين افضل عيشة من هالبلد اللي خيرة لغيره ..

انا ابارك لك اخوي في طرحك لهالموضوع الحساس .. والجيد واللي يساعدنا كأخوة سعوديين اننا نعاون بعض ونتعاون في تجارتنا واعمالنا وطرح افكارنا وتطبيقها على ارض الواقع

والله ان في بلدنا ناس كثير محتاجه لقمة العيش محتاجه الريال قبل العشرة ..
محتاجه شيء يسد جوعها .. محتاجه احد يوقف معها ويساندها لأن مالها ظهر غير الله سبحانه اللي يعلم بالحال .. محتاجه مثل هالمواضيع اللي تنزل الميدان وتشوف هالناس هالأشخاص السعوديين اللي مالهم دخل مالهم اي ريال يجيهم من عمل غير صدقات المحسنين ..
والله انهم يدورون العمل .. ولكن عيونهم تشتكي الحيرة ونفوسهم عفيفة - يحسبهم الجاهل اغنياء من التعفف - وودهم بالعمل ولكن عاشو على كلمة العمل لازم يكون بشهادة ولا ما تلاقي وظيفة .. وهذه ثقافة اكلناها جميع واستغلها الأجانب وعملوا بدون اي شهادة ومدخولاتهم الشهرية اضعاف رواتبنا وتحويلاتهم لبلادهم وصلت نصف ميزانية البلد سنوياً ..

ولازم اننا نساعد بعض جميع ونوقف وقفه وحدة
ونساعد الضعيف قبل الغني ..
ونساعد الجاهل قبل العالم ..
ونساعد انفسنا وتغلبنا على غرورنا ..
وننزل للميدان ونتعلم العمل وننبذ الاتكالية على الغير ..
ونرتقي ببلدنا ونرفعه فوق فوق ليجاري وينافس اكبر دول العالم بالعلم والدين والتوكل على الله ..


كلنا نبي نفتح منتدى خاص بهالشيء ..
يجمعنا جميع شباب وبنات البلد نحاكي فيه همومنا ومشاكلنا وندرسها ونصلحها ..
ونساعد الناس حولنا ونساعد انفسنا واخواننا ..

وكل شيء يطرح في هالمنتدى ..
مثلاً فيه مخترع سعودي نجيبه او يجي هو ويطرح فكرته وندعمه ونمدحه وندله للجهات اللي تستقبله
فيه فكرة جديدة وجيدة ومجربه ونريد نطبقها جميع تتطرح الفكرة ونتشاور فيها جميع ونطبقها
فيه محتاج سعودي فقير .. نضع اسمه ورقمه وندل اهل الخير له ويساعدونه ..
فيه وفيه وفيه وفيه ... كل شيء يهمنا ويحل همومنا كشباب وبنات نطرحه ونتناقش فيه ونطبق الحلول عليه

ولا خلى ولا عدم بهالمنتدى اللي جمعنا .. ولكن نبي شيء يقربنا من بعض كمجتمع واحد يربطه قلب واحد .. تسمعه اذان الناس من مواضيعه ..


والله بلدنا فيها خير واهلها فيهم الخير
ولكن ينقصنا نلتم على بعض ونساعد بعض ونوحد كلمتنا ونرتقي ببلدنا ونرفعه فوق ونطوره بأنفسنا كشباب وبنات .. فنحن جيل الغد القريب ..

--