الله يرزقني بالزوجة الصالحة .. قولو آمين ..


والله انكم ظالمين الشباب ..
ما هو كل شاب يفكر بهالعقلية انه يبي يتزوج اجنبية ويترك السعودية من اجل غلاء المهر فقط ..
فيه ناس كذا ما نقول لا .. ولكن مايصير نعمم ونقول كل شبابنا كذا , حتى البنات فيهم الخيّر ويبون الستر والعفاف وفيهم المقلد اللي تبي كل شيء على هواها وتتشرط بشروط تخلي الشاب ياكلها وقت الزواج .. والدعوة نسبة وتناسب ..

انا من ناحيتي افكر بالزواج ولكن اللي موقف في وجهي كثرة المصاريف اللي راح آكلها من الزوجه وقت ما تجي
لأني شفت معاناة شباب حولي .. بعضهم راتبه قوي ولكن ما يعرف يتصرف فيه وما خذ قرض ومبهذل نفسه ودافع اكثر من 100,000 ريال على حفلة الزواج بس .. طيب وبعدين ؟
بتقعد اقل شيء من 6 - 8 سنوات تسدد هالليلة اللي ما استفدت منها وراحت كلها في اشياء كمالية بحته واسراف ما بعده اسراف ..
وبعض مشاكل الزواج في بداية الحياة الزوجية تكون بسبب هالاسراف - والله سبحانه لا يحب المسرفين -
فكيف تبون الحياة تتبارك وتنعمون بحياة مستقرة والله لا يحب المسرفين ؟

وبعض الاخوان والله راتبه قليل ولكن حكيم .. ومايصرف الريال الا حاسب له الف حساب ..
وتلاقيه ما يخطي خطوة الا دارسها صح , ويدور البنت اللي تبي العفة ولا تبي الفخفه وشوفوني وشفتوا زواجي كيف وانا وانا وانا وخذلك من هالحتسي اللي ما يودي ولا يجيب
فتلاقي زواجه حفلة عائلية وخذ زوجتك ومع السلامة .. انا جاي اتزوج الناس ولا اتزوج حبيبتي !!

اهم شيء اننا ما نسرف على نفسنا ونتبهذل في حياتنا ومثل ما قال الرسول - أولم ولو بشاة - .. وانتهينا ..

____

بس انا بأسأل سؤال :

هل انتو كـ بنات تهتموا بجانب الثقافة الزوجية ؟
من ناحية ما قبل الزواج وبعدها واول ليله واول سنة من الزواج ..
وكيف تتعاملي مع الرجل وكيف يتعامل الرجل مع المرأة ..
وهل تهتموا بأخذ دورات تأهيلية في هالجانب قبل الزواج وبعده ؟

وهل اخذتوا فكرة عن علم النفس , وكيف تطابق فصيلة الدم بين الرجل والمرأة ليكونو متناسبين مع بعض ؟
وكيف تختاري الزوج المناسب لك من ناحية الشخصية ونمط شخصيته .. ومدى مناسبته لك قبل الزواج !

انا اقول لو يكون هناك اختبارات تحريرية للرجل والمرأة قبل الخطوبة وقبل لا اتقدم لها اساساً ..
يعني اعطي الوالدة اختبار تحليل نمط الشخصية واخلي البنت تحله واكتشف من خلاله شخصية هالبنت ..
وبعدها احل انا الاختبار واعطيها نسخه منه وتشوف شخصيتي
وهل نناسب بعض او لا من البداية ..

يعني قبل لا ندخل في دوامة الخطوبة والملكة والزواج وبعدها اكتشف انها ما تناسبني وماني مرتاح معها او هي مش مرتاحه معي وما أناسبها ..

لأن الشخصيات سبحان الله مقسمة فيها المتشابه وفيها المختلف ..
فالمتشابة اذا اجتمع مع بعض لا يتفقان .. اما المختلفان يتفقان ويتناسب كل واحد مع الاخر
مثل المغناطيس اذا وضعت المتشابه لا يلتصق مع الاخر واذا وضعت المختلف يجتذبان من بعيد ..

مش هالشيء افضل اننا نعمل اختبارات قبل الخطوبة ..
وايضاً من دون ما اتكلم معها او تتكلم معي , يعني على ورق نعرف بعض وندرس شخصيات بعض
واعرف هي وش تحب ووش تكره وايش ميولها وأيش رغباتها من خلال شخصيتها ..
وهي تعرف وش احب ووش اكره وأيش ميولي ورغباتي من خلال شخصيتي ..

وادخلو على هذه المدونة وراح تعرفوا ايش اقصد بكلامي :

http://www.abuharoon.com/?cat=17


وهذا الاختبار :

http://www.abuharoon.com/?p=58


بس وش رايكم , هل يمكن اننا نطبق هالشيء ونعمل به على ارض الواقع او لا ؟!

وفي الاول والأخير .. دائماً اطلبي الزوج الصالح من الله عز وجل مقسم الارزاق بين عباده
وأطلب الزوجه الصالحة منه سبحانه .. لأن مهما كان جمال المرأة تضل الروح عكس الجسد في الحياة في نظري ..
والحَكم هو نمط الشخصية وفصيلة الدم اللي اشوف انها تربط بين اثنين بشكل علمي ومدروس وواقعي ملموس .. يقرب الزوجين من بعض ويفهمهم ببعض ويربطهم ببعض اكثر حسب الشخصيات المختلفة ..


والله يزوج الجميع

..