وعلى قولتك ان عمرك 30 سنة وما تزوجتي ..

بأقولك قصة خالتي اللي امس رزقها الله ببنت قمر بعد الولد الأسد ..

والله اني ما انسى حزنها على نفسها وهمها اللي اشوفه في عيونها وقت ما كان عمرها 20 بنت جمال نجدية وعيون ما شاء الله وكلن يتمناها .. وعلى هالحال اللي كل ما جاها واحد قالت توني اكمل دراستي وهذا ما هو زين وهذا ماش ودلع بنات ماله اول ولا آخر .. ونست قول الرسول صلى الله عليه وسلم : اذا جاءكم من ترضون دينه وخلقه فزوجوه ..
وعليها قعدت تمني نفسها بالآماني لين طار عليها العمر وخلصت دراستها وقعدت في البيت عاطلة بشهادة بكالوريوس الى يومك مالقت وظيفة عليها ..
وبدى الحزن يدخل قلبها ويسري في دمها .. ويبان على وجهها ببسمتها الحزينة ..
ابوها متوفي ولا قد شافته في حياتها الله يرحمه وأمها كبيرة في السن وعميانه ماتشوف الا من قلبها , واخوانها كل واحد لاهي بعياله والحالة ما يعلم بها غير الله ..
لكن كان فيها شيء سبحان الله مميزها .. انها تلجأ لله وقت الشدائد ولا تعرف الناس وقتها الا بشوية كلام

ومن ضمن هالشدائد انها تنتظر اي واحد يجي يتقدم لها بعد ما طاف بها العمر ومشت بالواحد والثلاثين ..
وكل ما تقدم واحد قامت تدعي الله عز وجل بصلاتها انه يرزقها بالزوج ..

ووقتها كانت عندنا في البيت وجات لأمي وحدة تطلب يد خالتي لولدها ...
فكان عمره 30 وهي 31 .. وماشفت منها غير السجود والركوع ورفعة اليدين لمقسم الأرزاق ..
وسبحان الله تيسرت كل الأمور في ظرف شهر وتزوجت وعندها اليوم محمد عمرة 3 سنوات ورنا عمرها يومين .. والله يصلحهم ويفرح امهم بهم ..

والله من لجأ لله ما يخيبه أبد ..
وصدق الرسول يوم قال : إن ربكم حييٌ كريم يستحي من عبده إذا رفع إليه يديه أن يردهما صفراً خائبتين .

وفي السماء رزقكم وما توعدون ..
الرزق عند الله ما هو في الإنترنت او عند الخطابة او عند الناس .. عند الله وحده سبحانه

ياللي تبين زوج وياللي تبي زوجه .. وياللي تبون وظايف .. الرزق عند الله ..

ليش نشكي همومنا للناس .. وننسى ان الله معنا وحولنا ويسمعنا ويحس فينا ويعرف همومنا وانفسنا ..

لا غشاك الليل وأسرف بك الحزن العميق .. جنب وجيه البشر واسجد لخالقها

اسجد وادع الله وبتلاقون كل ما تتمنون ولو بعد حين ..


--