وأنا مستعد كل الاستعداد اني انزل سوق الخضار كل يوم " العزيزية " في الرياض ..
وبرضو سوق الغنم في العزيزية ..
وأجمع لكم كل اسماء وارقام السعوديين الشغالين هناك , واللي يبي يشغل سعوديين عنده واللي يبي يتعاون مع سعوديين ويترك الأجانب .. وبعد جمعي لهم أضبط الاسماء والارقام والديرة اللي هو فيها وأحطها على ملف اكسل وارسلها لكم .. لأجل التنسيق ..

وكل شيء أنا حاضر لعمله في هالمجال وغيره ..
ومع ان ما عندي خلفيه كبيرة بس والله فيني همة وودي ارفع هالبلد فوق وننزل جميع شباب في الميدان يا حميدان ..

والتجار ما يبيون غير عيالهم عيال بلدهم اضمن لهم من هالاجانب .. بس مشكلة التجار انهم يدورون الشباب السعوديين يقولون وينهم .. ولو لقيناهم ما عندنا اي مانع ..
وعشان كذا يبيلها تنسيق وجمع معلومات ونرسلهم الشباب كلن على تخصصه , مقاولات, دهانات, بقالات, سباكة, خضار , حدادة, نجارة, ميكانيكا, غنم , حمام , وهلم جرى ..

وغيري كثير معي في هالمنتدى مستعدين ..


وان شاء الله بأنزل السوق الايام الجاية وبأبدأ بجمع أكبر قدر من السعوديين هناك

والسعوديين اللي جايين من خارج الرياض في السوق



لأن سوق العزيزية الخضار هو اكبر سوق خضار على مستوى الخليج
واغلب اللي فيه اجانب .. مع ان السعودة فيه الزامية ..
ولكن بإذن الله نسعوده من اول وجديد بتعاوننا جميع


وان شاء الله اتواصل معكم عن طريق الرسائل اول بأول

وكل ما احصل واحد جاد في السوق ارسلته لكم

لأجل تنسقون معه وترسلون له اللي يبي الشغل



الله يوفقنا جميع

--