بسم الله الرحمن الرحيم
السلام عليكم ورحمة الله وبركاته

حياكم الله جميعاً


--

أخواني وأخواتي العاطلين والعاطلات

حبيت أطرح لكم هالموضوع للفائدة لكم جميعاً ..

لأني كنت في يوم من الايام عاطل وعانيت من العطالة ومشاكلها ومدة اليد للوالد او الوالدة لأخذ ما تيسر منهم يكفيني حق اليوم ..

وخلال مدة يمكن سنة او اكثر كنت عاطل فيها .. اتجول في هالمنتدى بشكل يومي وأدور على الوظيفة وأرسل سيرتي الذاتية على اي شركة لحد ما وفقني الله ورزقني بوظيفة بأحد الشركات , والحمد لله على نعمته وفضله

حبايبي مالكم بالطويلة ..

انا عندي قاعدة بيانات توظيف جمعتها بنفسي خلال قعدتي في البيت ..
طبعاً فيها ارقام وهواتف وفاكسات وايميلات شركات وحكومة ووزارات ومستشفيات وهيئات وغيرها ..

ولكني جمعت فيها اللي قدرت عليه وهي لسكان الرياض اكثر شيء .. وما يمنع انك تقدم /ي عليها خصوصاً في الوزارات والحكومة لأنها تعتبر المركز الرئيسي ..

وقبل لا أعطيكم رابط قاعدة البيانات حبيت انصح نفسي والجميع بشوية نصايح لعل فيها النفع بإذن الله وما بغيت منها غير الأجر من الله ثم دعائكم لعل الله يغفر لنا ولكم وجميع المسلمين

- واظبو على الصلاة في وقتها ومع الجماعة للرجال وفي البيت للنساء وبكر للصلاة ولا تأخرها .

- واظبو على سنن الرواتب بعد كل صلاة وقبلها , وخلال هالسنن أدع الله في سجودك وبعد ما تخلص من الصلاة لأن فيها نفع عظيم ويستجيب الله لك في الأوقات المعروفة مثل بين الأذان والإقامة وعند السجود ورفع اليد لله عز وجل في ثلث الليل الأخير على الساعة 12 او 1 الليل .

- اكثرو من الإستغفار يعني تخصيص 1000 مرة إستغفار في اليوم , ولا تقولون كثير لأن هذا كلام الشيطان وما هي كثيرة اذا قسمتها 250 الصباح 250 الظهر 250 العصر 250 أو المغرب 250 العشاء 250 الليل حسب الوقت اللي يناسب وترتاح فيه , وصدقني لها أثر بتلاحظه بنفسك :
" فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا " نوح : 10-12 .

- أكثرو من الدعاء لله عز وجل في جميع الأوقات وخصوصاً بعد الصلوات المفروضه وبين الاذان والاقامة ووقت السحر في الثلث الليل الاخير على الساعة 12 او 1 الليل , ارفع يدك لله عز وجل وبتلاقيه قريب منك يسمعك وحولك .. ويقول الرسول صلى الله عليه وسلم :
(إِنَّ رَبَّكُمْ حَيِيٌّ كَرِيمٌ، يَسْتَحِي مِنْ عَبْدِهِ إِذَا رَفَعَ يَدَيْهِ إِلَيْهِ أَنْ يَرُدَّهُمَا صِفْراً) .

ارفع يدك له سبحانه وما راح يخيبك بإذنه عز وجل .

- اعملو بالأسباب قدم من كل جهة وصوب ولا تخلي مكان الا وتقدم فيه ولا تيأس لأن رزقك مكتوب لك ما أحد راح ياخذه غيرك .. قدم عن طريق الايميل الفاكس اليد بأي طريقة وأهم شيء أنك توصل للهدف .

- اقرأو عن طريقة اعداد السيرة الذاتية بإحتراف , وتعلمها وطبقها وحاول انك تخلي سيرتك الذاتية مرتبة وجيدة .

- وقبل لا ترسل سيرتك الذاتية او تسلمها لأحد , تذكر وقل : بسم الله وتوكلت على الله ولا حول ولا قوة إلا بالله , لأن من قالها قالت له الملائكة : كُفيت وهُديت ووقيت . وبإذن الله تتسدد في تقديمك .

- وبرضو لا تيأس وتقول خلاص ما فيه أمل .. أبد والله الآن الشركات بحكم اللي أشوفه بعد برنامج نطاقات أن أغلب الشركات يبحثون عن السعوديين والسعوديات في أي مجال وأي شهادة حتى الإبتدائي والمتوسط .. لأنهم يبيون يغطون العجز اللي عندهم ويدعمون السعودي في بداياته .

- ومن ناحية الحكومة , فيها وظايف كثير شاغرة ولكنهم ما يعلنون عنها .. وبكذا أنت تستغل هالشيء وتروح تقدم عندهم تدخل على اي وزارة او اي هيئة او اي جهة حكومية وتقولهم وين الاقي شئون الموظفين وتروح لهم وتعطيهم اوراقك وبكلمتين حلوين وبإذن الله تلاقي اللي يسرك .

- وبرضو فيه شغله ضرورية في الحكومة والشركات حاول انك تقدم سيرتك عن طريق الفاكس اول شيء بعدها بالايميل بعدها باليد .. وبكذا تكون تممت ووصلت سيرتك عندهم وبعدها تشوف الجهة الثانية وتسوي نفس الحكاية لأجل تضمن وصول سيرتك لهم وانهم استلموها .. ورزقك عند الله اذا هو عندهم او غيرهم مصيره بيجيك بعد شغلك وعملك بالاسباب .

- حاول انك تتابع الوظايف هنا او في المواقع الثانية اول بأول , وأول ما تشوفهم منزلين وظايف على طول تدق عليهم وتاخذ وصف مكانهم وتقدم سيرتك باليد أول شيء بعدها عن طريق الايميل وبعدها بالفاكس , لأن اغلبهم يدورون اللي جاد بالعمل مو اللي يرسل سيرته الذاتية لأجل يكمل الناقص وخلاص , وهذا اللي يشدهم لك انك تهتم بنفسك فيهتمو فيك .

- وحاول تقدم على الأشياء اللي تحس انها قريبة من تخصصك وقريبة من مهاراتك .. يعني ثانوي ومعي حاسب تقدم على الوظايف الادارية او ادخال البيانات وكذا , أو اذا معك بكالوريوس كيمياء ماينفع تقدم على شركة كمبيوتر مثلاً لأنها بعيده وماراح تنفعهم الا بأشياء بسيطة وحتى لو توظفت راح تتوظف بشيء اقل من شهادتك ومهاراتك .. يعني تروح وتقدم على المستشفيات او المدارس او الشركات الصناعية وكذا .. حسب تخصصك ومهاراتك تقدم .. لأنهم راح يدرسون سيرتك ويشوفون وش اللي يناسبهم من خلال سيرتك .

- وهذه نقطة ضرورية يا شباب وبنات , اذا توظفت ورزقك الله من واسع فضله لا تنسى تستخير اول شيء وتتوظف , وبعدها أعمل بجهد وجد وخل العمل عمل والراحة راحة , ولا تقول ما تناسبني الوظيفة وما ارتحت لأن العمل يبيله صبر شوي وبعدها ربي بيوفقك وبتترقى للأفضل .. وأنا والله اقولها من واقع لأني كنت اروح لشركة واقعد شهرين ثلاثة واقول ما ارتحت واطلع واروح لثانية واقعد خمسة اشهر واقول ما تناسبني واطلع .. وهذه مشكلة لأني قعدت حول سنة متنقل من شركة لشركة ولا استفدت شيء .. يعني لو قاعد في شركة واحدة لمدة سنه على الاقل اكتسبت خبرة وعرفت اشياء .. بس الصبر كان معدوم .. والحمدلله

- برضوا آخر نقطة بعد ما تتوظف تصدق بكل شهر بمبلغ اما 100 ريال او 50 ريال طلعها من نفسك وتذكر ان الله اعطاك المال وغيرك ما معه من هالمال .. فلا تبخل على نفسك والفقراء اللي حولك وبتشوف اثرها في راتبك وحياتك .. اتذكر كنت اتصدق بـ 500 ريال كل شهر , وأخصصها للحريم الضغوف بمجرد ما اشوف سعودية فقيرة اروح لها وامد لها هالـ 500 ريال او الـ 1000 ريال , ووالله انها ترفع يدها وتدعي لي والله يوفقك يا ولدي ويرزقك ويوسعها عليك .. ووالله اني اتذكر ان راتبي ارتفع 2000 ريال زيادة بعد اقل من 6 شهور من توظفت .. والحمدلله رب العالمين .. فلا تبخل على نفسك واللي حولك .

- ابعدو عن المعاصي .. ووالله انها هي سبب هالبطالة كلها , فكل ما تسوي ذنب استغفر وارجع لله وتذكر ان الذنوب والمعاصي هي سبب منع الرزق من الله عز وجل , فلا تجعلها تكون جدار بينك وبين ربك .. فأستغفر دائما وبكثر لأن الاستغفار يمحي الذنوب ويغسلها .

- أخيراً أسأل الله عز وجل أن يجعل هالموضوع خالص لوجهه الكريم , واسأله سبحانه ان يرزقني وإياكم الرزق الحلال الطيب ويغنينا بحلاله عن حرامه .


وهذي قاعدة البيانات , اضغطو على الرابط تحت وحملوها وأبدأو بالتقديم وربي يوفقكم ويرزقكم :


... إضــــــغــــط / ي هـــنـــا ...


دعوة منكم لي ولوالدي تنفعني في هالدنيا والآخرة ويجعلها مردودة لكم جميع

--