اقتباس:
المشاركة الأصلية كتبت بواسطة عوطيلي
يابن كرمان الله لايهينك وصفلي أقرب طريق من عفيف إلى جدة
تراني محتاس ناس تقول من المدينة وناس يقولون من جهة الطائف ثمن ظلم
ترى لك كل خير لو تدلني |
تحيه طيبه
اعتذر لك عن التاخير لانني كنت الاسبوع الماضي في الرياض حتى يوم امس فعذرا منك
شوف جده لها طريقين الاول من طريق ظلم والثاني من طريق المهد
الطريق الاول :
بخصوص الاول تروح من عفيف لظلم ومن ظلم لطائف ومن الطائف تدخل مكه ثم جدة
وهذا الطريق انا قبل يمكن سنتين كنت استخدمه وهو حلو لكثرة المرافق والمحطات فيه بس عيبة
انك تدخل الحويه بالطائف وتدخل مكه واذا ماتعرف مكه بتحوس فيها حوسه لا لها او ولا لها اخر
واكثر شيء خلاني اترك هالطريق هو فترة الحج وكثرة نقاط التفتيش وكثرة الحجاج وتغير وتعديل المسارات في مكه سواء في موسم الحج او العمرة في رمضان وانا اعتبرة طريق سيء مدام هناك خيار ثاني
الطريق الثاني :
من عفيف لمهد الذهب لسويرقيه لطريق (المدينة جدة السريع ) وبعدين على طول لجدة يعني لا تدخل في زحمه ولا شيء وافضل مميزات هالطريق انه كل شيء سيده يعني على طول لا يمين ولا يسار (بس انتبه لا تضيع في المهد اسئل عن السويرقيه) ولا نقاط تفتيش الا ماندر ولا تدخل مكه وتحوس فيها لانه بعض الاحيان يكون هناك حوادث في مكه او الخط السريع بين مكه وجدة وصدقني بتسنتر ساعات فيهم
الافضل انك تروح مع الطريق الثاني لجدة لانك تدخل جدة من جهة المطار افضل من الجهة اللي فيها جامعة الملك عبدالعزيز لانه جهة جامعة الملك عبدالعزيز فيها زحمه تكرهك في جده كلها لكن المدخل الثاني اللي من جهة المطار وحي المحمديه تحس بفرق كبير ياخي تحس انك داخل مدينة حلوه ونظيفة
بالنسبة للمسافة انا احس طريق ظلم اقصر بس يطول الطريق انك تدخل مكه وتدخل الحويه بالطائف فيعني بالنسبة للوقت الطريق الثاني افضل واقل وقت
ملاحظه انتبه لازم تعبي بانزين من عفيف (فل ) ومن مهد الذهب (فل) لانه المحطات قليله ولا تجدها الا في الخط السريع وبعد مسافه من الخط السريع بتلاقيها
واحسن شيء في خط عفيف - المهد - السويرقيه - خط المدينة جدة السريع - جده
انك اول ماتمسك الخط السريع بعد مسافه يجيك بارنيز في محطات ساسكو واحلى كوب قهوه لاحلى ناس رايح لجدة بعد مسافه بتلاقي ايميز واحلى سندوتشات وفطاير لاحلى عيون رايحه لجدة
اتمنى لك السلامه وتروح وترجع بالسلامه ان شاء الله
اخوك ابو عبدالرحمن