[align=right]سلام عليكم وصباح الخير
المعذرة إذا فيه تأخير لكن الويك أند

عمومًا, ماأدري وش مكتوب بعد آخر رد لي الظهر لكن خذوا عندكم عالسريع:
الأسئلة 100 والمدة 50 دقيقة, يعني 30 ثانية لكل سؤال.

طريقة الأسئلة:
80 إختياري مقسمة على الآتي وبالترتيب/
20 أسئلة شخصية
( عن نفسك, ليه قدمت في الوظيفة, طموحك من الوظيفة, قدرة تحملك, إستيعابك وإتخاذ القرار)
10 لغة إنقليزي
( كلها في القرامر وبصراحة تافهة )
10 في الحساب أو الرياضيات
( جمع وقسمة وفيه كم فقرة عن النسب المئوية وحسابها )
10 لغوي
( معاني كلمات, مرادفات, وتشبيهات )
10 حاسب
( علامات شريط الأدوات في الوورد راجعوها زين )
20 عن التخصص
( أكتبوا نظام العمل والعمال السعودي فيه معلومات مهمة عن التفتيش وطبيعة عقود العمال والأجور وأصحاب العمل.. خذوا نظرة عامة وأفهموها )
20 صح وخطأ
( أغلب الفقرات تدور حول وش تسوي إذا كان شفت مشكلة في العمل, خصوصيات المفتش, وكللل الصح والخطأ عن التفتيش ومهامه وصفاته وشروطه وخرابيطه بالعام )


***

نقاط عامة في الإختبار:
- تعالوا بدري لأن المبنى كلب جدًا, والواحد يفرفر فيه لين تنفك رجوله والقاعة محشورة في الركن البعيد الهادي وهي قاعة الإحتفالات.
- الإختبار أخذ 50 دقيقة بالضبط.. لكن لكاعة التنظيم بدأ الدخول للقاعات 4 وشوي, بدأنا إختبار 5 وشوي, إنتهينا 6 تقريبا
- بلاش فلسفة وتجيبون ملفاتكم كاملة وصور ومدري وش, مايطلبون إلا أصل الهوية وأصل الشهادة أو الوثيقة الجامعية والي ماعنده وثيقة جامعية أو ع الأقل كشف درجات وإستمارة متوقع تخرجه.. ماأتوقع يدخل.
- مافي موية ولا شيء الي يعطشون بسرعة جيبوا معاكم.
- مايحتاج أقلام لأن الإختبار إختيارات ويعطونكم ورقة ومرسام
- لايفوتكم سؤال رقم 94 صح وخطأ.. يمين بالله فقرة ياأنا أهبل يوم قريتها يا هم مايفهمون, أقروها وأحكموا لأنها من طقة تعرف أحد يعرف أحد يعرفني ههههههه؟

وللمعلومية يانسوان:
وظائفكم 13 وظيفة فقط!
5 في الرياض, 3 في عسير, 3 في جدة, 2 في المدينة.. وبتشوفون بعيونكم اليوم

***

بالنسبة للي وصلتهم أكثر من رسالة على جدة أو الرياض, لازم يختار المدينة الي يفاضل عليها ويكتبها في ورقة الإختبار يعني زي ماقلت قبل, المسابقة الوظيفية وحدة وإختيارك لوظيفة وحدة فقط في مدينة وحدة.. وبلاش حسادة.


مابقي شيء, أعتقد كفيت ووفيت وزدت بعد
بالتوفيق للجميع.. ويارب واحد مننا ينقبل فيها[/align]