الله يجزاك خير اخوي الرابحون على طرح مثل هالموضوع وياريت نشوف الشباب يبداء يفكر مثلك.. ياليت لو تناقشني بكذى نقطه حتى استفيد منك ويستفيدون الاعضاء ..

انا لاحظت انك مهتم بالالعاب .. قلت يا ولد خلني اشوف السوق سالت عن الدمى ( العرايس ) في اكثر من محل وفي محلات الجمله.. وقيمتها في محل شخص اعرفه ( 12ريال ) قلت لصاحب المحل انا افكر اجيب مجموعة من الصين وبعطيك بسعر اقل من السوق طبعاً صاحب المحل اعرفه من 14 سنه وكان صريح معي .. قال ان سعر الموزع له 9 ريال وهو يكسب فيها 3 ريال واذا جبت له بسعر اقل راح ياخذ مني .. دخلت موقع علي بابا ( للمعلومية موقع علي بابا اغلى طبعاً من السوق لانه يبحث عن مكسب اكيد ) وجدت ان سعرها تقريباً دولار او اقل طبعاً تختلف المواصفات والاحجام لكن الشي المقارب للعبه اللي شفتها بدولار = 3.75 ريال ... خلينا نقول مع تكاليف الشحن راح تكلف 5 ريال ( افتراضاً ما اعرف سعر الشحن ) اذا وزعتها للمحلات بمكسب 3 ريال اصير بايعها بـ 8 ريال :

10.000 لعبة = 37500 ريال شراء بدون مصاريف الشحن

ولنفرض بعتها بـ 8 ريال لكل لعبة = 80 الف ريال

يكون مجموع الربح = 42500 ريال

يخصم منها مصاريف الشحن وانا اساسا ما اعرف كم راح يكلف شحنها ياليت لو تفيدنا ..
ولا تنسى انك تاجر ولازم تحسب مصاريف سفرك من تذاكر وخلافه .

بالاضافة لبعض العقبات راح تواجهني حسب سؤالي لاكثر من محل جمله

1. بعض الكوانترات او البضائع ما تدخل من الجمارك لمخالفتها للانظمة عندنا لان فيه شخص قالي انه له 4 كوانترات موقفه في الجمارك رفضوا يدخلوها بسبب انها تسبب اصباغ في اليد للأطفال بالاضافة لانه لابد ان يكون مكتوب على اللعبه صنع في الصين او يكون محدد فيها العمر للطفل .. او بعض المواصفات المعقده عندنا ممكن تكون انت اخبر فيها ياليت لو تفيدنا عن ما خفي بعد .

2. هل فيه رسوم للجمارك عندنا ؟؟ غير عن الرسوم اللي تاخذها بعض المكاتب في الصين = 5% ؟؟

3. اهم عقبة التوزيع 10 الاف لعبة اذا ما تصرفت بالجملة للتجار لان بعضهم له علاقات ويقدر ياخذها بسعر اقل منك .. وقمت بتوزيعها للمحلات اغلبهم يرفض ياخذ منك لانك سعودي ويفضل ياخذ بضاعه لعامل من نفس جنسيته .

في الاخير اشكرك اخوي الرابحون وادري اني كثرت عليك الاسئلة بس يعلم الله حتى استفيد ويستفيد بقيت الاخوه هنا ومن جديتي في الموضوع رحت لسواق الجمله في الرياض ولكثير من محلات الالعاب حتى اطلع السلبيات قبل الايجابيات . .. مودتي