حي الله ابو فهد

شوف يا طويل العمر , والكلام للجميع

الدينات فيها خير بإذن الله

شغل الدينا : نوعين

الاول / نقل فقط
ويكون دخلك عن طريق النقل والتوصيل بغض النظر عن مضمون ما تحمله .
وفيها منافسه من العماله , لانهم يرخصون احيانا , لكن لكل واحد نصيبه من الرزق .

وفي هذا النوع :
- يلزمك التوقف في موقف نقل الدينات في مدينتك , وكتابة رقم جوالك على السياره , والانتظار
- بإمكانك التوجه للحراجات مثل حراج المقاصيص في بريده , وابن قاسم في الرياض , وانتظار الزبائن لنقل مشترياتهم .
- بامكانك الدخول على مواقع الانترنت المعنيه بالاغنام والابل والاعلاف , وكتابة اعلانك ومنطقتك , وتكتب بانك شاب تملك دينه وتبحث عن عمل نقل , وصدقني بتلقى ترحيب وقبول من الكثير .
- بامكانك ترك جوالك عند دلالين الغنم و بعض المحرجين , واعلان في المبوبه اوالوسيله او الوسيط في منطقتك .

الثاني / شغل خاص
بمعنى انك تشغلها لصالحك في عدة انواع مثل:
- اعلاف
تشري من ساجر او القصيم , وتبيع في المجمعه الارطاويه الرياض الخرج ... وغيرها
- جح وشمام
تشري جح وشمام من ساجر و القصيم وتبسط في المدن او المحافظات الكبيره
- تمر
تشري تمر من القصيم او الخرج او الاحساء , وتروح للمدن البعيده عن مصدر التمر وتبداء تبيع وتتكسب
- بضائع عامه
تشري بضائع مختلفه ( أجهزه منزليه او بضاعة ابو ريالين او ملابس او بطانيات مع الشتاء ... ألخ ) طبعا تشريها من اسواق الجمله في جده او البطحاء في الرياض ثما تتجه للقرى والمحافظات الصغيره وتحدد مكان البيع وتبسط وتترزق الله من الصباح .

في هذا النوع , انصحك بالاتي :
- الحرص على البيع عند الجوامع الكبيره
- البيع عند المناطق الصناعيه طبعا المستهدف العماله
- تتبع البسطات الاسبوعيه , لكل محافظه يوم بسطه معين وفي الغالب تكون ايام مختلف مثل الجمعه في عنيزه والسبت في المذنب ... وهلم جر بالنسبه للمحافظات والمراكز الاخرى مثل الدوادمي وعفيف وضريه ... إلخ .
- بامكانك تتعاقد مع محلات التمر في المدن البعيده , وتبيع عليهم بالجمله مقابل ربح بسيط
وهذا الكلام ينطبق على الجح , تبيع على السوبر ماركات الكبيره بالجمله .

في كل الحالتين :
- تحتاج الصبر واكتساب الخبره
- تحتاج الوقت : علشان يعرفونك الزباين والعملاء
لان بعضهم ما يتعامل معك , الا لما يشوفك اكثر من مره


اسئل الله ان يوفقك , ويكتبلك مافيه الخير

(( انصحك بالاستخاره , ثم الاقدام على العمل ))