السلام عليكم ورحمه الله وبركاته

اسعد الله مسائكم اخواني ..

مثل ماقلت لكم قبل يومين تم ترشيحي يوم السبت امس للمقابله الشخصيه .. بمدينه تبوك

وراح اسرد لكم جميع اللي مر علي والمراحل والفحص الطبي ..

طبعاً كان موعدي الساعه 10 صباحاً من يوم السبت وجيت قبلها بربع ساعه .. المهم الموظف ينادي بالاسماء وجاء اسمي .. ودخلت عنده .. المهم اول شي طلب مني الاوراق المطلوبه باشعار القبول .. وتم تسليمها .. وقال لي interdus your self .. يعني تكلم عن نفسك .. المهم جلست اتكلم حوالي دقيقتين وقال لي ترى وظائف شركه الكهرباء كلها فنيه قلت عارف قلت ترى النظام ورديات يعني شفت وتعب قلت ماعندي مشكله متعودين .. قال لي عندك خبره في احد الشركات او سبق تدربت قلت لا والله .. < مع ان عندي خبره 6 شهور بس ماذكرتها .. على العموم قال لي تجي الساعه 5 عصر بنفس اليوم طبعاً عشان الفحص الطبي وراح تلقا اسمك نازل عندهم .. قلت ماعندك مشكله ..

المهم هذا الجزء الاول المقابله .. اما الفحص الطبي راح اقول لكم ابرز الاشياء اللي تمر عليكم ..

الساعه 5 العصر وانا بالمستوصف الاهلي .. ولقيت قدامي 20 نفر يمكن .. المهم اول شي بدينا بالاشعه .. ياخذون اشعه للصدر واذا لائق يختم ويكتب لائق .. بعد كذا تخطيط قلب واذا لائق يختم لائق .. وبعد كذا نروح للعيون اللي سقطني الملعون .. هههههه .. اول شي فحص النظر والحمد لله 6 على 6 وبعدين جاب لي عمى الالوان الله يعميه ... وصراحه ماعرفت الا بعضها .. قام كتب قدامها غير لائق ووقع .. المهم رحنا بعدها للباطنيه فحص ظغط وسلامتكم .. وقالو لي تجي ثاني يوم صبح الساعه 9 عشان يجيكم دكتور مندوب من شركه الكهرباء .. المهم كل خوفي بالـ عمى الالوان ما ادري وش وضعه .. رحت الساعه 9 ولقيت قدامي الدكتور عبدالمنعم طلع ورقه الفحص حقتي قال روح كملها وارجع لي .. كملت فحص دم وانف وحنجره .. ورجعت وقلت له يادكتور وش وضع عمى الالوان ... شاف الورقه قال طيب بوريكم بالكمبيوتر عندي دوائر ملونه ابغاك تطلع الارقام فيها .. قلت طيب .. وفعلا فتح اللابتوب وطلع لي 7 نماذج عرفت بعضها وبعضها والله لو اجلس لبكره ما اعرفه .. المهم اخذ قلم التحديد وحط نقطه عند عمى الالوان مدري وش وضع النقطه هذي .. قال خير ان شاء الله النتائج بعد اسبوعين بالظبط قلت الله يبشرك بالخير .. وسلامتكم هذا اللي صار معي خلال الامس واليوم الصبح ... اي استفسار حاضرين