اقتباس:
المشاركة الأصلية كتبت بواسطة برق الهدا
اخوي ربان السفينة ياريت تقولنا عن تفاصيل الكشف الطبي من يوم دخلت المركز الطبي الين خرجت منه وكم ساعة اخذ الكشف كامل وهل فيه زحمة عشان نكون مستعدين
والله يوفقنا جميعا
|
مساكم الله بالخير ...
توني واصل من الرياض قبل شوي فررررررش 
بس اول خلوني آجاوب على برق الهدا و بعدها اعطيكم علوم اليوم ...
طال عمرك يا برق الكشف الطبي يقولون لك حضر الساعة 6.30 صباحآ في مركز صحي المروج اللي بشارع الملك عبدالعزيز بـ لبس بدلة عادية ( بلوزة و بنطلون رياضي ) .. الزبدة لا تقول ربان خربني !! التحضير الساعة 8 الا ربع بيجي العسكري اسمه ابراهيم واحد اسمراني .. معه اللستة و بيحضركم يالموجودين .. بيدخلونكم الساعة 8 و نص .. اول شغلة بيدخلونكم عند الاشعة الصدرية .. و بعدها بيقولون لكم ريحوا برا اللي يخلص .. لما تخلص المجموعة كلها .. بعدين بيدخلونكم على ممر كآنه محلات جوالات صغيرة .. فيها مكاتب الدكاترة جنب بعض .. يخلونكم تدخلون عليهم كلهم .. طبعا زي ما قلت لكم .. واحد واحد يدخلون بسس .. دكتور الأذن والانف والحنجرة بعده حق الجراحة يدخلونكم بملابس تحتية فقط لا غير .. عشان يشيك على جسمك فيك آصآبات والا ما فيك !! و اللي متخوفين من عملية الدودة الزائدة تراها ما تضر بالكشف الطبي .. و بعدها يدخل على دكتور العيون .. و آخر شيء بيدخلونك عند الدكتور النفسي .. بس انتبهوا منه يا عيال تراه لكييييييع درجة آولى .. سعودي من جيلنا على فكرة .. بيحاول يستفزك و يسآلك آحيانا آسئلة محرجة يبي يشوفك تتنرفز و تعصب و الا تكون آعصابك في ثلاجة !! بعدها يا طويل العمر .. بيدخلونكم دورة المياه حق تحليل البول الله يكرمكم و جميع القرآء .. و آخر شي ء فحص الدم .. بيآخذون منكم ثلاث علب صغار دم .. و بيعطونك ورقة صغيرة حق رقم تحليلك في المركز عندهم و تطلع بعد اسبوع إلى عشرة ايام ..
كلها على بعضها هذي تآخذ منك وقت من ساعة ونص الى ساعتين بالكثير ..
يتبع ...