*

طبي 2

لا تسابق من عند البوابه وتنطلق ع الباصات متحمس تحسب انك لا رحت اول واحد بتدخل اول واحد للكشف ( تبطي )

جاي من الساعه 7 ومتحمس والموعد الساعه 8 واركب الباص واروح ارز وجهي اول واحد ابي اخلص

وانثبرت ي حبايب الين الساعه 11 وشوي تقريبا ف المدرج ما نادوا اسمي

وبعدها انطلقنا وابشركم الامور طيبه تجلسون بالكراسي وتدخلون بالدور على النفسيه والباطنية وانت واقف ع السريع ، قد صابك مس ؟ انسحرت ؟ تستخدم ادوية نفسيه ؟ احد من هلك فيه مرض نفسي ؟ طبعاً انت بس قول لا لا لا لا

وبعدهاترجع ع الكرسي وتفصخ ما تخلي عليك الا السروال الصغير وفيه ناس رفعوا السروال الطويل للركبه ومشوهم وفيه ناس قالوا لهم افصخ اقول اشوف السروال الصغير باين وشلون منت لابس هههههههههه انكفش خوينا

طبعاً انا درعمت وكنت لابس سروال سنه قماش وتصف طابور تروح للمصري يناظر ويتفحص
وبالتوفيق يبني

بعدها ع المقابله تسلم الورقه اللي معك وهم جالسين يختمون عليها كل ما عديت شي وتنتظر ينادونك ثم تدخل ع اللجنه ، طبعاً قبل تدخل تشمر السروال للركبه وتفصخ الجزمه والشراب وانت بكرامه وتصف عن لجنه تنتظر دورك ومن حسن حظي طبيت في ناس عسل لجنه رقم 6

قالي العسكري روح رقم6 ، افضل لجنه

دخلت سلمت واخذ هويتي والورقه وقالي خذ ورقه وارجع ورا واقرا بصوت عالي
كان مكتوب ' ماهي السبل للحد من انتشار الشائعات ، شي زي كذا '
واجيك ابي اتفلسف ، قلت اولاً الشائعات خطرها كبير على المجتمع وتأثر 00 الا قاطعني واحد منهم وقال ي ابن الحلال وشفيكم انتم ' انا ابي جواب بسيط وانتم الواحد يبي يشرح . ، قال : انتم تاخذون الاسئله من النت وتحسبون نبي اجوبه مثاليه ، السالفه نبي اشياء غير بس انت جاوب اي شي وباختصار ، قلت التوعيه وبيان اضرارها للمجتمع في كل الوسائل ههههههه ، شوي نط علي الاول قال انت كم نزلت كيلو ، شاف بطاقة الاحوال وانخرش الآدمي لأني باين فيها دب مورم ، قلت 15 كيلو ي طويل العمر وسألني عن المده وايش الحميه اللي اتبعتها وجاوبته ثم قالي لولا سمح الله ما انقبلت معنا تبي ترجع تضرب ف الدسم وترجع مثل اللي بالصوره والا ؟ ههههههه

قلت لا ي طويل العمر ابي اكمل حتى لو ما انقبلت وابي انحف اكثر ، نط الثاني يقول لا بالعكس جسمك الحين احلى جسم لا تنحف ولا تمتن ، رفع فيني ههههههه

ثم قام اللي معه بطاقتي منهم طلع للمسؤول عن المقابلات اللي بالنص بين اللجان مدري وش رتبته ما انتبهت وعلمه وقال شوقه هنا وهنا كيف ، حسيت اني كائن غريب طايح عليهم ههههه

ثم بعدها تروح للجنة الثانيه واحد مدني رحت له يسولف معي عن ديرتي ويضحك وسألني ليه ما تحب هالقنوات ' العالم والمنار ' وسولفت معه ضحك شوي وقالي بالتوفيق ان شاء الله 00

ثم تروح للبصمات وانت واقف وعلطول تروح تقيس لطول ع الماشي من دون وزن وعلى تدقيق الاوراق يفتش الدفتر واهم شي 6 صور شمسيه واوراقك كامله وبعدها عاللياقه

دخلت ع الاطاله وجبت 29 ، الله يسامحه الخال اللي قاس لي بغى يجيب العيد فيني موب شايف يقول للي يسجل 23 واناظر واقوله ي ابن الحلال 29. ، ثم عدلوها لي ودخلت ع السير طبعاً يسألك كم وزنك ويسجله بالسير والظاهر كل وزن له سرعه محدده المهم شغله وقالي اذا تبيني انقص بالسرعه علمني بس كل ما كان الوقت اقل اللي تقطع فيها 600 متر يكون افضل لك بالدرجه ، وانطلقت كلهاجري والحمد لله قطعتها ب 3 دقايق وعشر ثواني وقالي ممتاز وبالتوفيق 00

طبعا خلاص تطلع وانت منتهي بس شد حيلك كلها ثلاث دقايق مع اني برا اجري والله ما اجيبها بنفس الوقت القياسي بس يوم تخلص كل شي يكون لك دافع انك تجري وتنهي كل شي ب احسن صوره

الله يوفقنا واياكم ي شباب ، ويارب كلكم مقبولين ان شاء الله