أسعدتم صباحاً أحبائي .. وطاب يومكم ..

رحت أمس الصباح لديوان المظالم بالرياض الدور الثامن قسم شؤون الموظفين , وقابلت موظف بسيط ماله 6 شهور متعين ,, وقلت له انا جاني اتصال من الديوان يوم السبت وقالوا لي تعال كمل أوراقك ..

المهم الرجال طيب وخلوق معي ما قصّر .. راح جاب لي نموذج طلب توظيف خاص بالخدمة المدنية
ونموذج معلومات عن خدمات سابقة .. ونموذج اقرار بعدم استلام بدل تعيين .. ونموذج معلومات شخصية .. ونموذج كشف طبي . وطلب مني صورة شخصية حطّها بنموذج الكشف الطبي .. وقال لي : تروح مستشفى الملك سعود للأمراض الصدرية في مخرج 16 بشارع شبه الجزيرة .

المهم رحت البارحه الليل المستشفى الساعه 10 وقالوا لي مافي فحوصات الآن .. فقط حالات طارئة .. لكن تعالنا الصباح الساعة 10

وان شاء الله أروح لهم اليوم وأسوي الفحوصات .


وأما بالنسبة للإتصال اللي جاني .. ( جاني الاتصال يوم الجمعة الليل ) لكن للأسف ما رديت .
واليوم الثاني اللي هو السبت جاني اتصال ورديت .. يعني بإختصار .. الاتصالات اللي جات للمقبولين كلها أساساً كانت يوم الجمعة فقط .

وأما بعض الأخوان [ خراب مجتمع ] و الصديق الغالي [ اهمال مواطن ] يسألوا عن المرتبة السادسة .. وامكانية تتغير مكان التعيين .
فأقولهم اني يوم رحت للديوان أمس الصباح وقابلت الموظف .. على طول سألني : قال انت مقدم على الرابعة ؟؟

قلت ايه . فمعنى هذا ان الاتصالات اللي جات للمقبولين كانت لأصحاب الرابعة والله أعلم .
وأما تغيير مكان التعيين فليس عندي علم ولا الموظف اللي قابلته .بشؤون الموظفين .

وأسأل الله العلي العظيم التوفيق والسداد لأخواني العاطلين .. وأن يرزقكم الوظيفة اللي تسعدكم ووالديكم بالدارين .

أخوكم / قلب حيران