هو تجمع للعاطلات .. بس أنا كنت عاطلة وبأقول لكم على نصيحــــة يابنات
أول ماتتخرج البنت لاتحط في بالها مواصفات معينة للوظيفة..ولاتحدد راتب معين(عشان ماتنصدم)
أنا أول ماتخرجت كنت مبسوطة ببكالوريوس الرياضيات وإنه عندي دبلوم حاسب ولغة وسكرتاريا..
عشان كذا كنت رافضة حكاية المدارس الأهلية في البداية بسبب الراتب..
وبدأت أقدم على البنوك والشركات..بس لمن شفت إنه الأغلبية يركزون على حكاية كشف الوجه والتعامل بشكل مباشر مع الرجال..
وبعد ماطفشت من جلسة البيت
اقتنعت إنه التدريس أفضل مجال للبنت..وقدمت على المدارس الأهلية
كانت كلها تطلب خبرة(انصدمت)>>رضينا بالهم والهم مارضي فينا
قررت أدرّس بدون راتب مقابل الخبرة>> بس الحمدلله ما احتجت لذا الشي وعلى طول وقعت العقد مع المدرسة ودرست لغة عربية..(تخيلوا)
(أنا حالياً موظفة في شركة ..بس بدايتي كانت في التدريس)
المهم..اللي أبغى أقوله
أي إعلان وظائف قدمي عليه حتى لو عدد المتقدمات كبير
وفيه من بينهم ذوات خبرة..
وطالما إنك خريجة جديدة وبدون خبرة لاتتشرطين ..
اقبلي بالوظيفة حتى لو كانت في غير تخصصك أو الراتب مو قد كذا
(خاصة لو مانت محتاجة للراتب..حتى لو محتاجة بس شي أحسن من لا شي)
ولاتنسون تتصدقون من أول راتب ..صدقوني راح تتيسر أشياء كثير
الشي الثاني
طالما انك فاضية استغلي وقتك في الدورات
صارت الدورات ذحين أهم من الشهادة نفسها..
تخيلوا وحدة معاها بكالوريوس حاسب(5 سنوات تقريباُ)
ولمن قدمت على وظيفة ..طلبوا منها الرخصة الدولية
يعني دورة 3 شهور وزنها أثقل من شهادة بـ 5 سنين أو يعادلها..!!

إن شاء الله بعـد فترة بسيطة
نبارك لكم على الوظائف يارب..