نصيحتي موجهه لمن يدرس المرحلة الثانوية ولا اعلم اذا كانت تصلح للمراحل الاخرى وكلامي عن خبرة في تعليم المرحلة الثانوية وناجحة جدا معي

الحصة الاولى مهمه جدا

اول ما تدخل خل كل واحد يجلس مكانة ويسكت وعرفهم بأسمك والمادة اللي تدرسهم اياها وقلهم لا يسألونك عن اي شي شخصي فهو غير مهم لهم الهدف من هذا طبعا ان لا تجعل الطلاب يستجوبونك

عملهم من اول يوم الى اخر السنة يحفظون حصصك متى و بمجرد ما تبدأ حصتك سواء كنت موجود او لا او حتى غايب عن الدوام ولا واحد يوقف خارج الفصل نهائيا وبدون ازعاج قلهم اجلس في محلك وسولف الين اجيك

قلهم من يوم ما تدخل الفصل كل واحد يكون في محلة ومطلع الكتاب ممنوع الكلام نهائيا الى ان ينتهي الدرس وطبعا انت عطهم 10 دقائق نهاية الحصة يتكلمون فيها بأريحية واثناء الحصة اللي يبي يجاوب يرفع يدة بدون صوت واللي يجاوب طبعا سجل له درجة في الكشف

طبعا علمهم كيفية التعامل معك خارج الفصل داخل المدرسة بحيث انه ما يجي مجموعة طلاب يتحدثون معك في نفس الوقت او واحد يناديك من اخر الساحة لا ( وتبي تلقى من العينة هذي ولازم تتعامل معهم ) الطريقة هي ان طالب واحد يأتي اليك ويسلم مثل الرجال ويتحدث او يسأل ايا كان اللي يبية

طبعا قلهم بمجرد ما اطلع من باب المدرسة لا اعرفك ولا تعرفني وما بيني وبينك الا سلام المسلمين فقط ( لا تخلي الطلاب تتجمع عليك في السيارة لانها تصير استهبال بعدين )

قلهم ممنوع الجوال منعا باتا واللي اشوفة مطلع الجوال اباخذة منة وعلى المدير دايركت

طبعا تقولهم اللي ما يتقيد بالاشياء هذي يروح للقائمه السوداء على طول وانك ما راح تساعدة ابدا ولكن اذا تم التقيد راح تكون الامور سهالات والاختبارات سهلة وتحديد اخر السنة والذي منه والجميع ناجحين سواء اللي يعرف او اللي ما يعرف
انت يالمعلم لازم تلزم الطلاب وتفتح مخك مظبوط وتطبق القوانين هذي بحذافيرها ولا تظحك مع الطلاب ابدا ولا تسولف ولا شي تدخل للفصل بكل جدية وتبدا تشرح الدرس مباشرة حتى لا تدع فرصة للطلاب بخرق التعليمات ( طبعا راح يجيك عينة تحاول تظحكك انت على طول صكة بمحش يمشي الفين خل الفصل يظحك علية عشان ولا واحد ثاني يتجرأ على الاستهبال وطبعا اذا ضحكت واعطيتة وجة الله يخلف علينا وعليك راح تعاني من الطلاب ) وطبعا بمجرد ما احد من الطلاب يخالف هذي التعليمات بكل برود ( وليس بزعل وبشكل شخصي ) طلع الكشف واخصم علية دايركت وانت رايح مع الوقت راح ينظبط معك الفصل كامل

اذا احد تكلم او استهبل للمرة الثانية تغير محلة وتحطة امامك بحيث ياخذ طاولتة كل حصة لباقي السنة الى الصف الاول وتقولة امام الفصل انه لو تجي انت يالمعلم وما تلقاة مغير محلة انك راح تخص علية مباشرة ( علشان لا يقعد يستهبل عليك ويسحب رجولة كل حصة ويسوي ازعاج بالطاولة الخ الخ ) وقل للفصل انه هذا مصير اللي يخالف القوانين انه يكون في ضيافتك في الصف الاول لباقي السنة ( طبعا ممكن تصدر عفوا ملكي على العينة هذي بعد مرور شهر كذا )


نصائح لك انت يالمعلم ترا التعليم تغير عن اول ( بالنسبة لي دخلت الثانوية من 13 سنة ما ادري عن اوضاع اللي متخرجين الحين كيف كانت من الطيبين )

لا تعقد الامور وتكسب عداوة الطلاب خل امورك سهالات واسئلتك سهلة وبسيطة وحدد اخر السنة ولا ترسب احد علشان تمشي اخر السنة لديرتك وتكسب ود الطلاب

طبعا داخل الفصل خلك رااااايق على الاخر ولا تخلي احد من الطلاب ينرفزك تعامل معه بكل برود واذا الطلاب عرفوا كيف ينرفزونك تراك بتتعب

لا تطلع جوالك داخل الفصل وتقعد تقلب الواتس اب ولا البلاك بيري خلك رسمي وعملي لانك اذا طلعت جوالك تطيح من عيونهم على طول خصوصا في البداية قبل لا يعرفونك مظبوط

طبعا لا تخلي الطلاب يعلقون على اي شي خاص فيك مثل لو تحلق مثلا يبي يجونك مجموعة اول ما تدخل الفصل وخذلك هيه يا استاذ نعيما والله انت شخصية وحلاقتك زينة الخ الخ او تشتري ساعة جديدة او جوال جديد الخ ويجيك الطالب في الفصل يقولك والله مبروك الساعة هذي والله زينة مرة الخ الخ هذي تقلب استهبال بعدين اقطع الطريق من بدري وقلهم ما يحتاج يهنئونك على اي شي

خذها قاعدة حتى لو سنك صغير او متخوف ترا الطلاب يشوفونك كبير دائما وبقوة الشخصية تقدر تمشي طلابك على كيفك حتى السيء فيهم

لا تحقر الطلاب ابدا وعاملهم كرجال بكل احترام ولا تتكبر وتشوف حالك عليهم خلك بسيط جدا وراح تكسب محبتهم ان شاءالله

يعني تقريبا هذي اهم الاشياء اللي طرأت على بالي الان وفية اشياء كثير راح تكسبها مع الخبرة

طبعا القوانين هذي لازم تطبقها بحذافيرها الين يعرفونك الطلاب زين انة ما عندك لعب ولا لف ولا دوران

في حالة التطبيق السليم منك انت يالمعلم راح ترتاح راحة ما بعدها وتقدر تاخذ راحتك على الاخر مع الطلاب تمزح وتستهبل وتمشي امورك زي الحلاوة في المدرسة انت راح تكون في موضع السيطرة وتمشي الطلاب على هواك