السلام عليكم
موضوع حلو ان شاء الله يستفيد منه كل الاخوان 
بتكلم عن تجربتي ||
العام كنت في مدرسه اهليه جلست فيها سنه
استفدت كثير منها ,,,,
خبره ما اتوقع اكتسبها في المدارس الحكوميه في سنه او حتى سنتين او اكثر من ناحيه تعامل مع طلاب
طبعا بتستغربون ,, بعدد لكم الاسباب :
1 _ اداراه المدرسه شديده ع المعلم جدا جدا جدا ( حضور مبكر , ماتخرج من الفصل الين تنتهي الحصه بالكامل , كل يوم الصباح تمر ع المشرف يشوف دفتر تحضيرك .... )
2 _ ادشر طلاب ممكن تواجههم في حياتك ( حبوب .. سكرجيه .. تفكيرهم في الدراسه صفر الا من رحم ربي )
3 _ درست ماده مو من تخصصي
لكن والله العظيم كنت مبسوط كثير فيها وكانوا الطلاب معاي هادين
صح اني كنت اعاني منهم في الواجبات وعدم الاهتمام في المذاكره .. لكن من ناحيه ادب
ولله الحمد مافكرت في يوم اني برتاح مثل ما ارتحت
اول يوم دخلت المدرسه وبعد ماشفت العينه ( الداجه ) كنت ناوي ارجع البيت 
لكن مع اول حصه راح هالقلق 
اول شي : الطالب مهما كان تراه في الاول والاخير ( بزر )
لا تشد ولا ترخي معاه ( سددوا وقاربوا ) 
اول لقاء الطالب نادرا يسوي فوضى .. لانه يبي يكتشف شخصيتك
اذا شافك ( ضعيف ) بيجننك طول السنه
واذا شافك ( شاد ومسوي قوي وشايف نفسك او اعتقد انك تبي تقوي نفسك عليه ) بيعاند معك طول السنه
الحل الوحيد في اول لقاء الهدوء ثم الهدوء ... لا تحاول تبين له انك مو قد الوظيفه الي انت فيها
او تحاول تبين له العكس انك جاي كل تفكيرك ( تهجيد الطلاب )
^^ بالنسبه لي اول حصه لي دخلت فصل في ثانيه ثانوي ,,,
لقيت كل الفصل يستهبلون ويلعبون وبعد ما شافوني كل واحد جلس مكانه
سلمت عليهم وعرفت بنفسي والماده الي بدرسها 
فيه طالب حاول يستهبل ويسوي نفسه ذكي ع راسي ,, قلت له لا عاد تتكلم الين اخلص
رجعت اتكلم معاهم ورجع نفس الطالب يبي يستظرف قلت له ( اطلع برا ) حاول يعتذر قلت له بصوت عالي ( اطلع برا ) وطلع
بعدين طلبت منهم كل واحد يعرف باسمه وبعد ما خلصوا عطيتهم شوي كلام عن نظام الواجبات والدروس .... الين قربت تنتهي الحصه وتركتهم وبس
الحصص الي بعدها ارتحت كثير لانهم عرفوا مافيه شده ولا رخا