صباحكم رضا وسعادة يا رب
ردي علي استفسار الاخت هيلونه :
شوفي عزيزتي
انا قصيت قصة عملي الاخير فقط واللي هو عمل شركة الطيران الخاص
لكن القصة قبلها كانت اكثر من كابوس
بس حبيت افسر كل ما مريت فيه علي انه اثقال لذاتي
واختبارات من الله
وتقويم لي
عشين لمن الله يكرمني
لساني لا يكف يوميا عن شكره وحمده
للامانة انا راح احكي لك باختصار كيف كانت حياتي العملية من يوم تخرجي بالبكالوريوس الين حصلت علي وظيفة محاضر
حصاد خبراتي الي الان ثماني سنوات من العمل وهي كالاتي :
بعد تخرجي من الكلية وحصولي على البكالوريوس 2004-2005 م
نشروا اعلان بالكلية انه فيه فرص اكمال ماجستير
قدمت وكان ترتيبي التاسع على الدفعة
واخدت الفرصة
سالنا عن المعيدية
((( قالوا ما في وظايف بالوزارة في الكلية ... انتظروا يفتحوا باب التقديم ... لكن الين يفتحوا باب التقديم ... فيكم تشتغلوا عندنا تطوعيا مثلكم مثل المعيدة ... وهادا افضل ويعطيكم اولوية قبول لمن تتوفر الوظايف ... وانتم بناتنا ونبيكم وراح نرشحكم ... بس الصبر مطلوب )))
صدقي ومن حقك ما تصدقي وما راح الومك
جلست اربع سنوات اشتغل بالكلية مثلي مثل المعيدات
لكن بدون اي مقابل مادي ابدا
وكل ما سالنا عن المعيدية
جابونا بنفس الكلام اللي سبق لي ذكره حرفيا
بالسنة الاخيرة جات وظايف
عيونوا منا بنات قبلي بالترتيب
وعيوني بعدي بنات لا حق لهم بالتعيين
لكن هادي تعرف فلان (شخص مهم)
والتانية اعمامها ذو مناصب كبيرة بالجامعة
والثالثة بنت دكتورة بالكلية
اما انا طحت من الحسبة ومعي بنتين
عشين ما عندي واسطة
هددت بالشكوي
فهددوني انهم ما راح يسمحوا لي بالمناقشة الماجستير لو سويت بلبلة
واوقفوا معاملاتي وعلقوها
ولاني كنت خلصت كل شي مو ناقصني الا المناقشة
استسلمت
وقاضيت وظيفتي اللي كان لي حق فيها بالمناقشة
وبعدها انتقلت لعمل بمركز تدريب
اشتغلت فيه سنة ونص
وانخطبت لشخص اصر يجلسني بالبيت
وجلست في البيت فترة
عرفت انه ما في امل من العمل الجامعي معي
ولاني كنت في حالة ياس ما فيك تتخيليها
والسبب في الياس هادا
اني بشهادة الماجستير قدمت بكل جامعة طلبت معيدات او محاضرات بالسعودية
عبد العزيز - ام القري - الحدود الشمالية - تبوك - الرياض - جازان - شقرا - الباحه
لكن محد قبل طلبي
والاعذار بعضها ما كنت اعرف ليش انرفض
واحيانا كان يجيني السبب
يعني اقدم علي وظيفة محاضر
يعتذروا انهم اخدوا ناس جايبين ماستر من الخارج !!!
اقدم علي وظيفة معيد
يعتذروا انه شهادتي اعلي من المطلوب !!!
او لست حديثة التخرج !!!
يعني مر ترم او سنة اصير قديمة
احيانا منتي من اهل المدينة اللي فيها الجامعة
احيانا يقولوا انتي من وين ؟ اقول من جدة ... يقولوا ... اهااااااا يا بنات جدة ... نعينكم ... وبعد سنة تنقلوا ... لا ما نبي من بنات جدة ... اقول له انا ما راح انقل ... يقول كدابه ... كلكم كده !!!
احيانا يقولوا لي انتي درستي البكالوريوس عربي والا انجليزي ؟
اقول عربي ... اجل انتي فاشلة انجليزي ... اقول لا انا معي لغتين ... والانجليزية قوية عندي واختبرني ... يقول لا ما نبي احد درس بالعربي ... لان مناهجنا دحين انجليزي ونبي احد يقدر يدرس انجليزي ... اقول له انا درست الماستر بالانجليزي ... ما يناسبه ويعتذز ... مو كافي !!!
بعد جلسة البيت ... والياس والاستسلام ... صديقاتي المقربات وعددهم 2 فقط ... سافروا دكتوراه برا ... وخاصموني وبهدلوني وقالوا لي ان اللي خاطبني بيدمرني بجلستي بالبيت ... وانه مو انا اللي تجلس بالبيت ... والمفروض اكمل دكتوراه واشتغل ... وارجع ادور علي حلمي ...
قررت ابتعث ... واللي كان خاطبني رفض ... وبعد محاولات بطلت من البعثة
وبعدها قررت اشتغل بالطيران الخاص ... ورفض ... بس اهلي قالوا له انه نفسيتي سيية ... ولازم اخرج من البيت ... اعرف ناس واختلط بالناس ... حالتي بتتدهور ... اقتنع بصعوبة ...
واشتغلت بشركة الطيران ... بس كان العمل فيها غير امن لي ... مشاكل وخصامات واختلافات العملا ... صح انا ادارية مو اكتر ... بس كان صعب عليا
لمن جاني عرض محاضر تبوك
كانت نقطة فاصلة
اللي خاطبني (كانت ربط كلام الخطوبة مو اكتر) لاني كنت حاسة ان موتي علي يده ... يبي يدفنني بالحياة !!!
اعترض علي سفر تبوك
وبابا وماما اعترضوا ... بس اهلي عقلانيين ... قلت لهم العرض وقلت لهم اني احتاج اجازف ... والمغامرة انا كسبانة فيها بكل الاحوال ... عمل راقي ... راتب يعادل مرتين ونصف من راتبي الحالي بشركة الطيران ... مستقبل فيه غموض بس المهم تجربة وقلبي يقول اني ابي اخوضها
استخرت وارتحت
وفسخت خطوبتي وقتها
وسافرت لاجرب الغربة اللي بحياتي ما جربتها
اول يوم وصلت فيه قررت ارجع جدة
المشرفة بالكلية قالت لي قبل لا ترجعي جدة
مدير الشركة حاب يتكلم معك عالجوال
وكلمته
قال لي انتي تبي ترجعي اليوم جدة
وراح تدفعي التذكرة من جيبك
ومنتي قادرة تتخيلي انك فارقتي اهلك
ابيكي تتخيلي انك في رحلة لمدة اسبوع
اليوم سبت
انا راح اجيب لك تذكرة مدفوع ثمنها من عندي
علي رحلة لجدة يوم الربوع لك
شرط انك تبقي عندنا الين الربوع بس
يعني انتي الربوع الظهر بتكوني عند اهلك
ايش رايك؟
اصبري ولا تحكمي بسرعه
اطلبك اربع ايام فقط وبتسافري بعدها لاهلك
وافقته وقررت اقسو علي نفسي الاربع ايام
صدقيني نمت السبت وصحيت الاحد
متقبلة نفسيا وبشكل كبير مكان عملي
والرعب اللي فيني راح
وكلمت المدير الاحد وقلت له بانزل الربوع لاهلي
لكني ما راح اترك العمل
انا حاسة ان الله قاذف في قلبي طمانينة للمكان وحاسة ان هادا هو مكاني
وكانت الخيره وربي
اما اقتناع الجامعة فيني كان غير
كنت سعودية مجازفة مغتربة لحالها
تقدم افكار مميزة
بحث رايع
تقييم عملي في الكلية كان امتياز
درجات الطالبات كانت مرتفعه جدا
علما اني مو انا اللي احط الاسيلة
انما تيجي من الجامعة نفسها
ومشرفي بالجامعة علي تدريسي كان مبسوط مني جدا
وكنت مطيعه جدا له
وانفذ نصايحه وتوجيهاته حرفيا
والاخلاق والسيرة الطيبة مطلوبة
والجدية في العمل
والبنات اللي تدرسيهم لهم ناس بالجامعة
ياخدوا اخبار المدرسات من هادول الطالبات
لان في المناطق هادي
الناس تعرف بعضها بشكل عجيب
واولا واخيرا
ربي اراد
اجتهدت وصبرت بشكل انا اتعجب من نفسي علي كل هادي المحاولات
ودعوات امي وابي
ودعوات الناس اللي كنت اقدم لهم المساعدة وانا ما اعرفهم
ابسط رد كانوا يدوه لي (الله يوفقك)
وهادا ربي وفق
ما في شي يجي بالسهل ابدا
والا مستحيل تحس بطعمه 
اختي بطالة دراسات عليا
والله اني دحين ادرب نفسي علي الايلتس عشين الدرجة اللي طالبينها
وانا دحين اخد الترم هادا لاثبات نفسي كموظفة داخل الجامعة
ويا رب لك الحمد اسعي للدكتوراه وفي بالي بريطانيا باذن رب العباد
ربي يسعدكم جميعا ويوفقكم ... امين
تحياتي واحتراماتي
ويك اند سعيد للجميع