السلام عليكم ورحمة الله
يسعد مساكم دووم اخواني
اللهم لك الحمد والشكر أبشركم نزل قرضي اليوم
امس كتبت استفسار علي موقع ريادة وجاني الرد الساعه 2 في الليل في نفس اليوم
قلت من هالموظف النشيط اللي صاحي ويرد بهالوقت
رده كان انه نزلت قروض تم اعتمادها بامكانك الحظور والتاكد من وضع قرضك
رحت اليوم عالساعه 11 والحمد لله لقيت اسمي منور الكشف ^ــ^
وانا بدور علي دراستي وملفي سمعت واحد يكلم استاذ ثاني بصوت عالي
هذا فلان اللي عندكم ياخي لو تشوف كاتب لي معروض امس ورديت قلت له تعال ههههههههههه
طبعا انا دوروني من الضحك فضحني هههههههههه لاني فعلا كنت معصب علي تاخير بنك التسليف
قلت له راد عليه الساعه 2 في الليل ايش مصحيك
لاني دخلت عالساعه وحده ماكان فيه رد قلت شكله بيرد بكره
طلع اللي رد عليه الاستاذ محمد الياس مدير رياده الله يسعده ويوفقه وكل الاساتذه الرائعين
اللي جد تشك ان هالوطن فيه مثل هالاشخاص الودودين بروحهم الطيبه وبحبهم لخدمتك بلا مقابل
اتوقع ان هذي شغله اقل موظف في رياده طلع هو بنفسه اللي يرد علينا
سلمت عليهم واتكلمنا شوي واعطوني نسخه من دراست الجدوي تبعي
وظرفين واحد موجه لمكتب العمل والثاني موجه للاحوال المدنية عشان اجيب لهم برنتات ان ماعندي عمال او سجل تجاري
وقال اروح لبنك التسليف خذ طلباتهم وجهزها ولمن تجهز الطلبات شوف المحل اللي حاب تستاجره عشان نكتب لك الشيك باسم صاحبه
رحت لبنك التسليف واعطوني ورقتين وحده للكفيل الحظوري والثانية تسديد رسوم 3 الاف علي حسابهم
وبعد مابشرت الحبايب جيت ابشركم
يالله كل من عنده نية يقدم او مقدم جديد يحط امله بثقه فالله ويسوي اللي عليه ومابيخيب ظنه
بيلقي الايام تمر سريعا لين يتم افتتاح مشروعه وتحقيق حلمه باذن الله
اي سؤال انا حاظر ودعواتكم ياكرام
