حلول البطالة Unemployment Solutions - عرض مشاركة واحدة - مشروع الكتروني~(متجر الكتروني~سوق الكتروني~)

مےـتأخر بےـدريے · #9 (**permalink**) 22-10-2012, 05:07 PM

اقتباس:

المشاركة الأصلية كتبت بواسطة مستشار عقلي

تسلم ياخوي و الله يعطيك العافيه ما قصرت

ان شاء الله انه راح انفذ طريقتين للدفع
1- عند الاستلام 2- تحويل بنكي
تاخر الشحن ان شاء الله ماهو موجود ابدا
راح يكون التوصيل ان شاء الله سريع

خدمة التوصيل فكرتها حلوه وبنفذها ان شاء الله ...

تصميم الموقع باذن الله راح اركز على هالخطوة هذي ...

سلامتك ما تشوف شر ما قصرت والله وانتظرك اذا عندك اضافات ما شاء الله عليك ...

الله يسلمك

وحلو انك تستخدم طريقة الدفع الالكتروني وعند الاستلام وهذا شي يتيح للعميل حرية الاختيار والشي اللي يناسبه .

وعندي شوية اضافات اذا سمحت لي وان شاء الله انها تفيدك ولو بشكل بسيط

في اشياء لازم تنحط في الحسبان عشان يحقق متجرك نجاح ممتاز وارباح ممتازه

الترشيد والتوفير هذي الحاجتين مهمه في بدايتك ولازم تركز عليها زين عشان ماتحمل نفسك مالا طاقة لها به .

في البدايه لا تركز على الربح خل جل تركيزك على ( الخدمه المقدمه ) وحاول بقدر المستطاع انك تخلي الخدمه ممتازه وسهله وبسيطه وبامكان الجميع استخدامها حتى لو كان المنتج اللي تقدمه ليس بعالي الجوده لكن الخدمه راح تغطي على جودة المنتج بعكس لو كانت الخدمه سيئه والمنتج ممتاز راح تقل نسبة المبيعات لسوء الخدمه المقدمه .

وحاول تقدم منتجات في المتجر الناس ترغبها وتبحث عنها وبسعر مناسب ومنافس السوق وباقل من السوق وحاول تعوض بخدمة التوصيل عشان ماتخسر يعني خل الدعوه نسبه وتناسب

وشي مهم اعلاناتك للموقع لا تكون عشوائيه يعني تروح وتشوف موقع كبير في تقريبا 100 آلف زائر يوميا وتروح تعلن عنده يمكن من 100 آلف مافيه ولا واحد في محافظتك وكذا انت خسرت ولا كسبت من الاعلان شي لازم تكون اعلاناتك مستهدفه وستهدف سكان محافظتك ولا هو صعب انك تحصلهم بالبحث راح تحصلهم وتحصل موقع المحافظه وتعلن فيه ومواقع يزورها سكان المحافظه واعلن فيها بكذا تكون اعلاناتك مستهدفه وكمان لا تنسى الواتس اب الحين اعلن عن طريقه من واحد لا واحد وزي كذا

ونقطه اخيره ركز على هذي الاسئله في تصميم الموقع وتخيل نفسك انك انت الزائر اول ماتدخل الموقع في تقريبا 30 ثانيه لازم تجاوبه الواجهه عن هذي الاسئله ولا ترك الموقع وراح بلا رجعه !!

طبعا بقولك الاسئله بشكل عام

1 - وش ذا الموقع ؟؟

2 - وش يقدم ذا الموقع ؟؟

3 - وش اسوي انا هنا الموقع ؟؟

4 - ليش انا في الموقع ذا ماني في غيره ؟؟

5 - وشلون استخدم الموقع ؟؟

اضمن لك لو التصميم جاوب على هذي الاسئله للزائر ( البسيط ) راح يتفاعل مع الموقع ويستخدمه بدون مشاكل وراح تكسبه بدل ماتخسره .

واخيرا بعد ماتخلص من التصميم وقبل ماتطلق الموقع سوي تجربه مثلا زوجتك او احد اخوات خلها تستخدم الموقع وانت خلك جنبها معك ورقه وقلم ولا تعلمها ولا شي شوف وش تسوي هي وكيف تستخدم الموقع واي مشكله تواجهه اكتبها في ورقه وحاول تحلها في الموقع وزي كذا سوي اكثر من تجربه وصدقني راح تفيدك هذي التجارب كثير وتطلع لك اشياء انت تشوفها مفهومه وواضحه لك غيرك ماتكون له مفهومه وواضحه .

هذا اللي عندي حاليا وان جات في بالي اضافات ثانيه راح اجي واضيفه

وان شاء الله تكون مفيده لك

ولا تنساني من دعواتك اذا كنت افدتك

والله يوفقك