الله يبقيك اخوي
اقتباس:
ما راح اطيل
وبارد باختصار
ولو انك ما فهمت المغزى من كل كلامي
وصنفت مقارنتي على انها اعذار وهي بالعكس شرح للحال اللي حاصل واترك الحكم لبقية الاعضاء
|
بعكس اخوي انا اشوفها اعذار لانك لما تقول الاجنبي عنده مواصلات والسعودي ماعنده
بعقل هذا مو عذر يعني ماتقدر تدبرلك شي يوصلك للعمل لين ماتقدر تشتريلك سياره على قد امكانياتك الماديه ؟؟
اي احد راح يشوف ردك راح يتآثر به وهذا التآثير راح يحبط من عزيمته واصراره
مافي مانع انك توضح وش اللي صاير في السوق لكن ماتوضع اعذار لهذا الشي
وتخلي الواحد يحس ان الاجنبي هو الكل في الكل وهو في الحقيقه يملك العزيمه والاصرار اللي ماهي عنده السعودي وعشان كذا هو نجح وماحصل احد ينافسه من اهل البلد الا قله .
جميع ماذكرت انت في مقارنتك يوجد لها بدايل افضل للسعودي من حيث السكن والعمل والدعم والمواصلات والتآمين الصحي
وراح اذكرها لك وهي اقل امكانيات لدى الشاب السعودي يعني اقل شي اقل شي متوفر له ومع هذا هو افضل من الاجنبي
السكن متوفر وافضل من الاجنبي ( البيوت الشعبيه )
الاجانب ستمية واحد في غرفه هل انت قادر تعيش مثله ؟؟
العمل متوفر وافضل من الاجنبي ( حارس امن )
هذي الوظيفه اقل راتب لها هو 3000 ومتوفره بكثر وفي جميع الشركات ومافيها تعب حتى بس جالس على البوابه بعكس الاجنبي يتوظف في مطعم تحصله يكرف اكثر من 12 ساعه وراتبه مايجي 1000 ريال . انت تقدر تتوظف في مطعم وتكرف مثله اكثر من 12 ساعه وبراتب 1000 ريال ؟؟
الدعم متوفر وافضل من الاجنبي ( بنك التسليف )
الاجنبي من وين يحصل دعم لين يوقف على رجله ؟؟ يجتهد ويكرف ويتعب لين يوقف على رجله
اما السعودي متوفره له وسائل الدعم المادي بس ماعليه الا يحصل الفكره المناسبه للمشروع ويدرسها لكن حتى دراسة المشروع اغلب السعودي مايبي يدرسها يبي غيره يدرسها له .
المواصلات متوفره وافضل من الاجنبي ( في كل بيت سياره )
ماتوقع ان مافي بيت في السعوديه مافي سياره ولو مافي سياره اكيد عمانك خوالك اقربك عندهم سيارات يعني متوفره لك لكن الاجنبي يدفع حق المواصلات من جيبه ولا يمشي على رجله .
التآمين الصحي متوفر وافضل من الاجنبي ( المستشفيات الحكوميه )
تتعالج وتاخذ الادويه مجانيه ولا احد يقولك عينك في راسك بعكس الاجنبي لازم اوراق ويدفع عشان يتعالج .
وبيني وبينك انا من شفت الاعتراضات على " التحديث في حافز " وانا عارف انه يبيلنا سنوات وسنوات وسنوات حتى الواحد فينا يعتمد على نفسه ومايطلع اعذار واهيه
التحديث في كل اسبوع مايأخذ اقل من "30" ثانيه تخيل 30 ثانيه تتعبهم في اسبوع !!
وتقولي لوبي اجنبي وتخطيط عشان يستولون على السوق والله انهم حصلوا ناس كساله ولا يحبون يشتغلون ولا يسون شي يبون كل شي يوصلهم لين عندهم واستغلوا ذا الشي وترزقوا منه
وانا اشوف انهم يستآهلون وحلال عليهم كل ريال لانهم عرفوا يستغلون الفرص
لكن حنا ياحسره بس كل واحد حاط يده على خده ويقول والله الاجانب اكلونا والدوله مقصره والدوله فيها وفيها
السعوديه فيها خير ماهو موجود في اي بلد ثاني لكن وين اللي ياخذ حصته من هذا الخير .
اقتباس:
نجي لثقة
الاسباب
مافيه اي سبب مقنع
لاكن انت اباسالك لو دخلت محل ملابس نسائية واستقبلك صاحب المحل وهو سعودي بتواصل وتشتري من المحل ولا بتدور اقرب عذر عشان تغادر المحل ((( اتمنى تجاوب بدون مجاملة ))) وخاصة اذا كان السعودي لابس ثوب وشماغ
|
كيف تقول مافيه سبب مقنع وانت مقتنع ان مافي ثقه بين السعودي والسعودي 
عطني اسباب عدم ثقه السعودي بالسعودي عشان اقدر ارد عليك
اما بخصوص سؤال وش لي بالملابس النسائيه تقدر تسآل البنات هم يردون عليك
ماعمري دخلت محلات الملابس نسائيه اصلا
لكن الان متوفره محلات نسائيه ويبعون فيها نساء واصلا
انا ضد انه يكون البايع للملابس النسائيه رجال ماهما كان اجنبي او سعودي لانه اختصاص نساء
ومع كامل احترامي وتقديري لك السؤال في غير محله تماما ولا يمت لحديثنا بصله .
اقتباس:
بالنسبة للهندي اللي يستلم 800 وتشوفها قليلة جدا ولا فيه مجال للمقارنة بينة وبين السعودي
اعذرني بالعكس المقارنة موجودة والفرق صح شاسع بس مو في صالح السعودي لصالح الاجنبي
تدري ليه انا اقولك لان كومار يستلم 800 ريال = مدري كم الف روبية هندي وهذا المبلغ شف وش يسوي له بالهند ؟؟؟؟؟؟؟؟؟؟؟ الحين عرفت وين المقارنة ناهيك عن ان الهند بعد ما الغت السعودية تاشيرات بنقلادش تشرط ابو هنود ولا يجي السعودية اليوم الى براتب اقل شي من 1000 الى 1500 ريال
|
حلو طيب اذا على حسبتك كذا ليش ماتجمع لك مبلغ محترم وتروح الهند وتستثمر هناك مثل ماهو جا من هناك واستثمر عندك ؟؟
وكمان نسيت اشياء كثيره تصرف من 800 الاكل والشرب يعني معقوله شهر ماياكل ولا يشرب ولا هو ساكن في بيت ولا عنده كهرباء ؟؟
طبعا الاكل والشرب يحسب بالريال مو بالربيه !!
اقتباس:
وازيدك من الشعر بيت
واعلمك خفايا الهنود وابو يمن اللي يمكن ما مرت عليك
تدري ان الهنود واليمنيين عندهم نظام السيطرة على السوق وهذا وفق خطة مدروسة ومنفذة صح
تدري وش هي انا اقولك
هي مافيا منظمة تهدف الى السيطرة على السوق السعودي
|
حدث العقل بما لا يعقل فأن صدقك لا عقل له
بقولك قصه صارت لي وهي اللي خلتني اغير كل القناعات اللي كانت في بالي واحط اعذار لك شي
مره كانت سيارتي خربانه وديتها ميكانيكي هندي
المهم في مطعم قدام الورشه يشتغلون فيه يمانيين
وقتها الساعه 11 الصبح ومافي شغل عنده وانا جالس عند الهندي جا اليماني وجلس عندنا
وجالس يناظر في الهندي قاله الهندي وش عندك تارك مطعمك وجالس عندي قله ماعندي شغل
واجي اشوف وش تسوي !!
قله الهندي ليش تبي تصير مكانيكي قال اليماني للهندي ايه ( اللي تكسب به آلعب به )
طبعا يعرفون بعض هم ضحك الهندي وقال اه منكم
والله العظيم مافيه لا مافيا ولا هم يحزنون وانه بعضهم اخلاق ودين احسن مني ومنك
لكن هم يجتهدون ويتعبون عشان يحققون الهدف اللي جاين عشان وهو ( الكسب )
اقتباس:
هندي او يمني يؤسس صندوق وهذا الصندوق مدتة 5 سنوات
المطلوب 50 هندي او يمني كل واحد منهم يحط بالصندوق مبلغ 200 ريال شهريا
وهناك 3 اشخاص مسئولين عن تشغيل هذا الصندوق بالسوق
تدري وش يعني 50 رجال في 200 ريال شهري
تعال نحسبها
50*200=10000 ريال في الشهر
10000 *12 =120000 ريال في السنة
120000*5= 600000 ريال بالسنة
600.000 ريال تسوي لك كم بقالة
وكم محل ملابس
وكم سيارة
وكم وكم وكم
طبعا الموضوع ما انتهى هنا
من دخل ها المحلات يتوسع النشاط ولا يوقف ابد يعني بالعربي كل شهر كل شهرين محل جديد ودخل جديد
وكل محل يفتحونه يمسك ادرتة والعمل فيه واحد من ال50 اللي مشاركين بالصندوق
هذا نضام السيطرة على السوق بالنسبة للهنود
تعال نشوف ابو يمن وش يسوي
وهذا حكايتة حكاية
ابو يمن كل اللي عليه يسوية يجي من اليمن ويقنع كفيلة يستاجر محل بس
اما البضاعة والديكور لا تشيل هم الحضارمه اللي ما سكين تجارة الملابس والاكسسوارات وكل سي بالبلد عليهم يعطونك مبلغ تزين به الديكور ويترسون المحل بضاعة وعلى التصريف وهذي خطة مستحيل يسويها سعودي معا ان الارباح فيها خيالية وتو سعها مضمون بس عدم وجود الثقة بيننا خلانا لابدين والعالم مسيطرين
ناهيك عن الباكستانية والمعدات والافغان والافران
والبنقالة والخضار
|
طيب بسآلك سؤال هم يسون صندوق دعم ويدفعون من رواتبهم عشان يوصلون للمبلغ هذا
طيب انت متوفره لك صناديق الدعم هذي يعني لو اتفقوا ثنين اخوان بس وصلوا للمبلغ حقهم في اقل سنه
لكن السؤال انت تقدر تشتغل مثل واحد فيهم وتكرف مثله وتطلع ارباح مثله ؟؟
اقتباس:
اخوي هذا الكلام اللي قلتة كلة اقولة وانا على دراية تامة به ومسئول عنه وتاكد من كلامي هذا
انا راعي سوق وكل اللي ذكرتة من تجربة ودرايه
|
كلنا نزلنا السوق ياخوي وشفنا كل شي وندري بكل شي
لكن الفرق هو من اي منظور الواحد ينظر للشي اللي يصير في السوق
اقتباس:
في الختام
يا سعوديين انا ما اعط اعذار لكم هنا زي ما فهم اخونا متاخر
انا احط لكم شرح للحال اللي نعيشها واللي يعيشها الاجانب في البلد والفرق بيننا وبينهم انهم متعاونين وحنا نصفق بيد وحدة
والمطلوب
انزلو السوق اللي معه فلوس يعين اللي ما عنده واللي ما عنده يشتغل بوقته وجهدة
واللي عنده فكرة ينفع بها من لا فكرة له
وكلن يا خذ حقة لاضرر ولا ضرار ولكل مجتهد نصيب
بس تكفون كافي نسعى ورى الاجانب يمشون لنا اشغالنا ويديرونها وحنا ياغافلين لكم الله
ولا تنسون مثلنا السعودي المشهور
قومن تعاونو ما ذلو
وبالتوفيق
واجمل التحايا والتقدير للجميع
|
بصراحه هذا هو الكلام بغض النظر عن اختلافي معك في الكلام اعلى وتحفظي على شرحك للحال .
الا اني اشيد بكلامك هذا على التعاون وكمان بدون تعب وجهد وعدم استحيلاء ماراح ينفع التعاون
لازم الواحد يتعب عشان لقمت العيش ويوفر ويحاول يضغط نفسه في البدايه عشان يرتاح بعدين
ولا نخلي الاجانب شماعه لنا نعلق عليها اخفاقاتنا في التجاره الواحد لو ماينزل السوق ويزاحم
التجار ماراح يصير تاجر وهذا الشي يحتاج صبر وعزيمه كبيره .
ولو كل واحد فينا بطل الكسل وربي راح يعين خير .
على العموم اختلاف وجهات النظر لا يفسد للود قضيه
وتشرفت بالنقاش معك اخوي انا السعودي
والله يوفق الجميع لما يحبه ويرضاه
موفقين