ثلآث وظائف جيدة أتوقع إذا ماني غلطان شهادتك دبلوم
الحرس الملكي أفضل قطاع عسكري هو المميز يكفيك فيه بس التأمين الطبي
لك ولعيالك ولأبوك وأمك وبدلآته جيده وغير الشرهات إلي تجيك وغير الحوافز
والترقيات ماشيه قطاع ممتاز

قوات الأمن الخاصة إلى وده بالقرف والشقى يجي هالقطاع إذا قالو لك الكرف
والتعب والقروشة والقلق فهو في ذا القطاع رواتبه ممتازه ولكن ياخذون الراتب إلي يعطونك إياه من ظهرك
قطاع حساس ومرتبط بوزير الداخلية شخصيا لآزم تكون جاهز و كل شوي تدريبات
وإستلآمات ومهام ومداهمات شغلته شغله ذا القطاع إلي بيجي يقولك تخصاصات تختلف
وحسب تخصصك ويمكن ترتاح صح فيه حسب تخصصك يمكن تجي إداري أو على مكتب
ولكن ثق تمام الثقه إنه قطاع متعب سواء إداري أو ميداني

أما الوظيفة المدنيه ماقول غير يالبيه بس صحيح إن رواتبها يعني ضعيفه نوعا ما مقارنة
بالعسكرية ولكن ياخي خلص دوامك الساعه إثنين وإضرب الباب وخميس وجمعه
دج ياحبيبي ولا نام ولآ شف لك صرفه وإذا عندك إجازه تقدر تروح وين ماتبي لو كنت
ماترجع إلى من المحيط المتجمد الجنوبي خذ إجازتك وتوكل على الله لا تنتظر لك ظابط
يسمح لك علشان تطلع ولا تجلس تتشحذهم ولآ شي

العسكرية رواتبها كويسه بتعيش كنق بس تراها كلها بدلآت يعني أول ماتتقاعد
بتروح عليك كلها ومارح ييقى لك إلى الراتب الأساسي والراتب الأساسي وإذا تبي
راتب محترم لآزم تكرف 30 أو 25 سنه عكس المدنيه بدايته رواتب ضعيفة مقارنة بالعكسرية بسمع السنين
ومع الخدمة تبدا تتعدل وراتبك عند التقاعد يكون أفضل وأنا أشوف إن رواتب المدينة جيده
يعني 6000 آلآف أول مربوط ومدني يالبيه خير وبركه

عموما هذا إلي عندي وأنا لو مكانك بأخذ المدنيه وأنا مغمض ولا راح أشاور
وإذا إنك ناوي عسكرية رح الحرس الملكي والأمن الخاص لا تقربه نصيحه لوجه الله
الخيار الأول والأخير لك أنت حسب ظروفك أنت شف الوظيفه المناسبة
لك وشف ظروف أهلك وموفق إن شاء الله