المشاركة الأصلية كتبت بواسطة مهندس مليونير

الله يوفقك دنيا واخرة اخي ...

اقتراحات اتمنى تتقبلها مني بصدر رحب ...

اول شي انا اتمنى لك الخير واتمنى انك تسوي شي يشتغل كويس لفترة طويلة ويشتهر اسم محلك ويكون اسم منتشر في اكثر من مدينة مستقبلا بإذن الله ... مو بس محل عصير يكسب عالناس اللي تمر مصادفة والا عشان محل جنبك انا ابغى الناس تجي لمحلك مخصوص

وعشان يصير الشي هذا اقترح عليك تسوي افكار مبتكرة وماتكون عادية انا ماعندي خبرة بالعصيرات ولكن اعطيك تلميحات ممكن تفيدك بشكل عام

1- اختار اسم سهل ومميز وبسرعة الواحد يتذكره يعني ماتسمي اسامي تخبيص مثل عالم العصيرات والا عرائسي المميز والا الفواكه الطازجة والا عصيرات جدة والا عصيرات البرد (شوف اسم سهل مثلا اسمك عدل عليه سمي مثلا يوسفو او اليوسف

2- اللوحة ماتكون لوحة خنفشارية ومليانة كل انواع الفواكه والخضروات مع شلال واشجار (مثل اغلب المحلات) لا افضل اللوحة تكون رايقة وبتصميم خارج على المألوف عشان اللوحة تكون مميزة الناس تمشي وتعجب باللوحة

3- حاول تنوع في العصيرات وماتسوي زي الناس ... يعني اسامي زي ركب النمل وعرائسي وسحلب وفياجرا ومدري ايش احسها مستخدمة كثير ... افضل انك تستخدم وتبتكر اسماء جديدة من عندك ومابغى اعطيك اقتراحات عشان ابغاك تبدع وتتخيل انت وماتحد تفكيرك بالاقتراحات

4- حاول كل عصيراتك طازجة وبالطعم الاصلي للعصير يعني لاتستخدم تانج الجاهز او القوالب المثلجة حاول قدر الامكان تكون عصيراتك طازجة لو تشتريها فواكه وتزبطها افضل

5- ايوة لاتنسى لو انت بتشتغل خليك ذهين اللي داخل واعرف طلبه دا تمام زبون دام لكن ترى الزباين وانا منهم وخاصة الجدد على المحل ترى يدخل ومايعرف ايش يختار يعني يكون محتار انت مع الخبرة تعرف ايت زبون يزبط معاه اي خلطة لأنه حيدخل صدقني دي بتسمعها كثير الزبون يسألك ايش رايك افضل شي عندك ... طبعا الناس اذواق افضل شي للزبون هو اكثر شي يزبط على مزاجه وتقدر تسأله مثلا انت تحب الحوامض والا العصيرات الحلوة والا مثلا تسأله عن عصير مثلا ليمون تقوم تعطيه عصير مخلط وبه ليمون وحوامض اتمنى تكون فهمت صدقني الزبون راح يحبك وحيجيك تاني ولاتنسى الزبائن الدائمين زبطهم تخفيض خاص فيهم وماتنسى طلباتهم ابدا ابدا هذول اهم من اللي يجي اول مرة

6- العصيرات اللي تكون عاصرها جاهز ياليت مايشوفها الزبون لأنك لما تعطيه من القارورة الكبيرة يحس انك شاريها جاهزة وماهي معصورة جاهزة اتمنى منطقة العصر والخلط تكون مخفية

7- خذ رأي الزباين وامشي على الاغلب يعني لو قالو لك البرتقال حقك حامض حاول تعدله وتسأل مرة ثانية
اقلك شي انا قعدت كم سنة كل ماشتهي عصير امر على طريقي محل مخصوص رغم كثرة المحلات اللي حواليه ولكن دا المحل كان عنده البرتقال موزووووون صح والله كنت ماشتري الا منه الين الله يسامحه غير الوزنية حقته وخبص

8- لاتنسى كاسات صغيرة حشان الزبون يذوق قبل مايشتري ويختار ...

هذا اللي عندي الان ولو افتكرت شي رجعت لك والله يوفقك ...