بسم الله الرحمن الرحيم
ناتي قبل كل شيء لتسديد بعض الدويون وبالذات الي كانت متاخره علي
والله ثم والله كنت حريص ان ما احد يدري عني وبالذات الوالد والوالده الله يحفظهم
بعد التردد من الشخص المندوب والمطالبه بحق السياره كان المتبقي 20 الف للسياره الاولى
والثانيه المتبقي 45000 الف ريال
وهي الي كانت شاغله تفكيري
ووجب وقت سدادها واصحابها بشتكون علي لكن المندوب مصبرهم شوي
كان يجني مبلغ لو 500 ريال اروح اسدد لو جزء
المهم صار الوضع خلاص تاخرت زياده ووجب وقت السداد وانتهت المده ب 3 اشهر كمان
وقتها على طول رحت اخذت دباب او ما يعرف بحمار الحلقه وبعته وسددت الوانيت الاول او 20 الف ريال
وسددت 10 ريال للوانيت الثاني حتى يصبر شوي علي
وطحت في الدباب وجلست اسدد الدباب وجزء من حق الوانيت الثاني اذا توفر مبلغ
المهم مرات اتاخر في الدباب حتى اصبر الوانيت وهكذا
فتحت المحل الثاني مغسله بعد الاولى واشتغلت فيها مرات طبعا معاي عامل وسرت اعرف اكوي واغسل وكان ما يطفشني غير الشماغ اذا جاء واحد وقال مرزاب مقلوب ولا تكثر نشاء
بيني وبينكم تعلمت حتى اجيب عامل تاشيره واكون عارف المحل وشغله
المهم تعرفون مسئلة الحسد والبعض يمكن جرب هذا الشيء اذا كنت فاتح محل في نفس حارتك تلقاهم يروحون للمحل الثاني ويتركوك
ما ادري هل هذا خاص بحينا او في اغلب الاحياء ممكن من جرب يفيدنا في هذا الشيء
المهم تعلمت الشغله تقريبا 70 % اعرف اكوي واغسل طبعا
ومره جاني شغل مسؤل عن حملة حجاج وشافني شغال وجاب لي شماغ وغتره وثوب اذكرها بالتفصيل لانه جزاه الله خير فادني كثر كيف بعلمكم
قال تقدر تخلصهم بدري قلت ابشر هاتها وانا اكوي كان العامل يغسل جوا المحل المستعجل
المهم وسوالف انا وهو قال من صاحب المحل قلت له انا
قال طيب عندك ملابس حقت حمله او شيء من الحج قلت لا اول مره اسمع منك
قال طيب عندي حمله حجاج داخل وش رايك اجيبها وتقدر تخلصها بدري قلت يارجل لو اجلس عليها يوم كامل ما اقفل المحل ما عندك مشكله
حبستها معاه طبعا اول مره حسبناها شيله بيله كذا يعني ما فندناها المهم اشتغلت حق 10 ايام كل يوم يجيب جزء ويستلم اليوم الثاني ما عدا البطانيات كانت بعد يومين
المهم عطاني 3500 ريال
فادتني في الدباب بصراحه
المهم الوانيت الثاني باقي له تقريبا 35 الف ريال ويوم جاء ويقابل الوالد وجلس يتكلم معاه
الوالد سئله انت كل فتره تسئل عنه على باله خويي المهم بلغ الوالد
وجزاه الله الف خير
وربي سددها عني ولا دريت ولا كلمني ابدا
استغرب الرجال ما عاد جاء اسبوع الاسبوع الثاني
وقتها خفت ياولد شكله راح اشتكى للمحكمه بتروح السجن خفت اتصل عليه اكون فتحت باب على نفسي ومرات اقول هو صابر علي ممكن كم شهر
شافني الوالد متلخبط وافكر كثير حس فيني وخبرني انه سدد اقسم بالله ذقت وقتها طعم النوم صح دين وانزاح عني كنت اخاف اموت والدين هذا في ذمتي
لكن الحمدلله
وبعد كذا تفرغت للدباب والمكيفات
الدباب سدد جزء منه عن طريق المغسله وبعت المغسله وكملت حق الدباب والحمدلله
اما المكيفات ورجعت جزء من دين الوالد الله يحفظه عن طريق المشروع الي سوالي نقله في حياتي
الحمدلله وهذا من فضل الله وليس اخبي شيء لانه اقسمت بذلك ل
لانها نعمه من الله وهو المتفضل علي
رايح اذكر لكم
التسديد والمشوع الي عندي الان والمشروع الي بسويه بعد ذلك وانا جالس اجمع له
لانه صارت عندي قناعه ابدء بمبلغ فوق حاجتك ولا تتسلف من احد حتى لو قال لك لا ترجعه الا بعد 20 سنه ابدء بنفسك ولنفسك اهم شيء ابعد عن الدين وبالذات الدين العالي والمبلغ الكبير
نصيحه لوجه الله تعالى في احوج الظروف واذا اظطررت خذ لك مبلغ لا يتعدى 10 الاف ريال
اكثر من ذلك بتطيح في دوامه الدين
ما ادري هي نصيحه مني وممكن لك واحد له وجهة نظر تختلف
رجعت تفلسفت صح