يا خالق الدنيا عليك التياسير
أستلهمك و أسترشدك و أستعينك
و أبدا بذكرك يا ولي التدآبير
و أسجد رضاً لك و العطا في يدينك
و أخلاف ذا يا سامعي ما بها غير
علم ٍ يفيدك في بقايا سنينك
سطرتها بالنصح و الخير تسطير
و أعلنتها ما قلت بيني و بينك
ثنتين يعطنّك معزهـ و تقدير
دينك و فعل البر في والدينك
و ثنتين منهن يكثرن المخاسير
درب الضياع و صحبةٍ ما تعينك
و ثنتين عنهن ما تجوز المعاذير
سترك لأهل بيتك و مكسب يمينك
و ثنتين لو طال الزمن ما بهن خير
هرج القفا و مجاملة من يهينك
و ثنتين يطلقن الوجيه المسافير
ترديد ترحيبك و ضحكة جبينك
و ثنتين يسون التعب و المشاوير
موآصل أرحامك و فزعة قرينك
و ثنتين نآر و عآر معنى و تفسير
ترضى الخنا و تخون مستامنينك
و ثنتين لا تقبل بهن الأشاوير
الجآر و الصاحب ليا قال وينك
و ثنتين يشرن بالذهب و الدنانير
حشمة أبن عمك و نصرة عوينك
و ثنتين جنبهن و أحذرك تحذير
فعلٍ يشنّع بك و هرجٍ يدينك
منقوول