تم التقديم عليهم عن طريق الموقع السنة الماضية وأنا خريج البترول هندسة بترول بمعدل جيد وبعدها بحوالي شهر جاني اتصال مقابلة تليفونية لمدة نصف ساعة سألتني فيها عن الخبرة والمشاريع اللي اشتغلتها وهل قدت مشاريع وليش تبغى تشتغل وبعدين أرسلولي لنك عشان أسوي اختبار انجليزي أونلاين سويته وحصلت على 10 من 10 في القواعد والسماع والمفردات بس جبت 4 في القراءة وكنت متوقع أني ما أنقبل



بس جاني اتصال منهم بعد شهر وقالوا لي تحضر الأسسمنت داي وكان عبارة عن يومين في دبي وحجزولي فندق 5 نجوم ... بس دفعت التذاكر واستقبلوني في المطار ( حسيت نفسي مهم )


المهم الساعة 7 الصباح اتجمعنا في غرفة الاجتماعات بالفندق وكنا 25 شخص من عمان الكويت الإمارات السعودية وقطر ولبنان بنات وعيال وقالوا لنا أنه الخطة أنهم يقبلونا كلنا بس لازم نعدي معايير معينة والمسألة مش منافسة أبدا وبدأنا برنامج تعريفي بالشركةومجال عمل الشركة وكنا أغلب الوقت مقسمين جروبات ونسوي بريسنتيشن مثلا يطلبوا منك تعطيهم بريسنتيشن نبذة عن الشركة أو عن القيم الأساسية في الشركة : الأمانة الأداء وروح الفريق والتنوع وعطونا نبذة عن مجال عمل الشركة

وبعدين تغدينا ( أهم شي ) وودونا بالباص على الشركة وقسمونا أربع جروبات لأربع مراحل :
1- اختبار عن السيفتي اللي هو أهم شي في الشركة عندهم وطبعا هو كأنه اختبار قراءة
2- اختبار رياضيات : بس صراحة كان اختبار احترافي كان سهل ممتنع يعطوك سستم أرقام جديد بالخطوط والنقاط ومكونه من 1 إلى 7 بس وبعدين تروح عشرات ويطلبوا منك تسوي عمليات حسابية بسيطة إلين ما تحل سودكو بالنقاط والخطووط
3- اختبار عملي : مثلا يعطيك ريسستنس ويقولك احسب لي المقاومة عن طريق الجهاز مرة وعن طريق الألوان مرة أخرى أو يعطيك مكعبات ترتبها أو اسطوانه يفككلك إياها ويعطيك كتيب فيه طريقة التركيب أو يطلب منك تحسب الحموضة في سائل ويعطيك ورق الاختبار وعليه التعليمات وطبعا يوقف عليك واحد فوق راسك عشان تكون تحت الضغط
4- جولة في الورشة ورؤية المعدات



وبعد ما خلصنا اجتمعنا وقسمونا فرق وطلبوا منا نسوي حفارة عن طريق أعواد أو ورق أو مصاصات والتحدي كان أنه فيه متجر والأغراض اللي يبيعها محدودة وأنت ميزانيتك محدودة فيبغالك تحدد قائد وتتخذ قرارت بسرعة وإذا ما مشت الخطة تفكر بخطة بديلة وكل هذا وأنت عليك مراقب يشوف كيف تتعامل مع الفريق المهم كان هذا أكثر نشاط استمتعت فيه



وبعد كذا عطونا ورق وقالوا جاوب عن الأسئلة إيش أحسن النشاطات اللي عجبتك وهل قدمت أحسن ماعندك وإيش الأسباب اللي خلتك تضيع في بعض الأختبارات ومين أحسن واحد اشتغلت معاه وليش وبعد توزيع الأوراق طلعونا بره ونادوا علينا واحد واحد وبدأوا مقابلة شخصية لكل واحد لحاله مع 6 مراقبين بالنسبة لي دخلت وأنا واثق جدا وقبل ما أجاوب على أي سؤال شكرتهم على الفرصة المعلومات القيمة وقلت لهم أنا واثق أنه هذا المكان اللي ودي أشتغل فيه 20 سنة قدام لأني اعجبت بالقيم وبالفريق وزي كذا وقلت لهم أنا واثق أني حأنقبل قالوا لي ليش واثق قلت لهم لأني أشعر أني بين ناسي وهذي البيئة المثالية للعمل بس كلهم قاعدين يضحكون علي بس طلعت من المقابلة وأنا وجهي مغسول بمرق وقلت بايعها بايعها وتعشينا عشاء محححححححترم طلة على ملعب وشواء وأكل فخم والشيء اللي مرة انبسطت عليه أنه كل المراقبين صاروا ينادوني بالاسم يعني أني عطيتهم انطباع جيد

المهم رحنا نمنا واليوم الثاني بدينا اجتماع من الصبح وبدأوا يناقشوا معاتا ماذا تفعل في الحالات الآتية ويعطوك حالات وخيارات ونقاش عن الحلول وبعدين قالوا نناديكم كل واحد لحاله ونقول لكم مقبول وإلا لا وين حيشتغل ومتى حنرسل له الأوفر
يوم دخلت عليهم وقبل ما يتكلموا شكرتهم على الفرصة وقلت لهم أنا ما راح أودعكم لأني حأقبلكم قريب لما أستلم الوظيفة بس قالوا لي أنك مقبول وانتظر الأوفر


حطونا في برنامج خاص لمدة 3 سنوات السنة الأولى كورسات وشغل في الورشة مع طلعات للحقل ويكون الراتب
الأساسي 8333 ريال
بدل سكن 2000 ريال
بدل مواصلات 800 ريال
بدل تدريب 1000 ريال
ويومية الحقل من 100 دولار إلى 150 دولار على حسب طبيعة العمل
ونهاية السنة الأولى لازم تكون قادر أنك تكمل مهمة في الحقل لوحدك
وبعدين تجتمع لجنه ويبدأوا يناقشوا معاك أداءك خلال السنة ويسألوك في اللي تعلمته عشان يعطوك الترقية
بعد الترقية يتدبل الأساسي يزيدوا البدلات وتصير تطلع للحقل لحالك أو مساعد وفي نهاية السنة الثانية تجتمع لجنة يناقشوا معاك أداءك خلال السنة ويسألوك في اللي تعلمته عشان يعطوك الترقية
وبعدين يتدبل الأساسي ويزيدوا البدلات وتشتغل في المكتب ويعطوك كورسات مو تكنيكال يعني مهارات بيع وفايننس وبرجكت ماناجمنت وتحاول أنك تشرف على مشروع وفي نهاية السنة تجتمع لجنة إقليمية برئاسة رئيس الشركة الإقليمي وتسوي لهم برسنتيشن عن اللي سويته وبعدين تصير مانجر
الشركة من ناحية برنامج تدريبي تعتبر من أكبر الشركات وكثير من اللي يتركوا الشركة يتوظفوا في أرامكو أو منافسين بس فيها شوية كرف إلين ما تفهم الشغل

الحلو في الشركة أنهم يبغوا يسعودوا الوظايف عندهم نسبة السعودة 45% حاليا ويبغوا يرفعوها إلى 70 % خلال 3 سنوات فهي فرصة للمهندسين أنه يقدموا على الشركة..

منقول من أحد المنتديات حفظاً للحقوق, ولكن هالتجربه لاتكن على جميع متقدمي هذه الشركة .. ولكن كل تخصص له مجال معين بالشركة .. وهذا طالب تخصصه هندسة..

بالتوفيق للجميـع ..
Like