السلام عليكم ورحمة الله وبركاته

امس العصر قدمت مشروعي على موقع ريادة وهو محل ملابس رجالية وطبعا انا من حفرالباطن وماعندنا فرع لريادة لكن اليوم الصباح دق تليفوني الساعة 8
انا :هلا
المتصل:السلام عليكم
انا :وعليكم السلام
المتصل:انت مشعل
انا :نعم انا مشعل
المتصل:انت قدمت على ريادة مشروع
انا:نعم قدمت
المتصل:طيب عندك خبرة
انا:لا والله ماعندي خبرة بس عندي خبرة عملية بالطلب من الخارج
المتصل:مين التجار الي جبت لهم بضايع
انا:ماتعاملت مع تجار كنت اشتري ملابس وابيعها عن طريق النت
المتصل :طيب تقدر تمرني في المكتب الان
انا :اقدر وين مكانكم
المتصل:في المعهد المهني(هنا استغربت بس قلت يمكن مبدئيا لين يحطون لهم موقع)
انا:ان شاءالله الحين اجيك

طبعا بالطريق ضيعت واخذت ساعة الا ربع ادور المكان ووصلت لهم واتصلت عليه علشان اعرف وين مكتبه ووصفه لي ودخلت ولقيت عنده شخصين وسلمت عليهم وقالي معليش مشعل مافيه كرسي زيادة انتظرني برى قلت ان شاءالله واخذت ساعة وانا ملطوع برى وبعدها جاني عامل النظافة انت مشعل قلت نعم قال مدير يبيك رحت له ولقيت عنده شايب يبي تريله قال لشايب ياعم انت عمرك قرن مايصلح تخيلوا الاسلوب انا وقتها قلت وشلون هذا اكيد بيحطمني
المهم بعد ربع ساعة راح الشايب
المدير:مشعل شلون فكرت بالمشروع
انا:انا كان عندي هواية الشراء والبس وبما ان مافيه محلات راقية عندنا جتني فكرت هالمشروع وسويت لها دراسة جدوى
المدير:مانبي دراستك حنا نسوي الدراسة(ياليل الحين وش السوات)
انا:انا سويتها لنفسي علشان اعرف المشروع مجدي اقتصاديا ولالا
المدير:طيب انت عندك خبرة
انا:لا بس عندي خبرة عملية بالتعامل مع الموردين
المدير:ماينفع تشتغل بدون خبرة
انا:قطاع التجزئة مايحتاج خبرة
المدير:كل شي يحتاج خبرة(طيب وين دور ريادة في توجيه الشباب ومساعدتهم لو عندي خبرة ماجيتكم لان اكيد بيكون عندي مشروع)
انا:
المدير :طيب وش شهادتك
انا: ثانوي(خفت اقول دبلوم بس يقول في تعارض مع المشروع)
المدير:طيب 8 سنوات عاطل وش تسوي
انا:قاعد اطقطق
المدير:وش تطقطق فيه(ياليل ابو لمبه)
انا:يعني اشتري ملابس وابيعها واساعد الوالد في الغنم(تصريفه بس)
المدير:غنم وبنطلونات ماتركب
انا:
المدير:طيب متى تنام باليل
انا :الساعة 10
المدير:ومتى تصحي
انا:الساعة6
المدير: وين مكان المشروع الافضل برايك
انا:المكان الي فيه حركت ناس(كنت بكمل بس قاطعني حسبي الله على بليسه)
المدير:مايكفي(زين كاان خليتني اكمل )
المدير:وش كان راي ابوك وانت جالس عنده 8 سنين
انا:عادي شي مكتوب
المدير:لا مو عادي جالس بدون شغل 8سنين بدون شغل
انا:قلت لك كنت اساعده
المدير:انت وين ساكن
انا:جاوبته
المدير:وش وداكم هناك
انا:ربي ودانا هناك
المدير:ابوك وش يشتغل(وانت وش دخلك بتناسبنا)
انا:جاوبته
اناتلقفت وقلت :طبعا اذا فتحت المشروع بشغل فيه سعوديين(احسبه بيمدحني)
المدير ووجهه معفوس:لانضحك على بعض محد يشغل سعوديين
انا:
بعد اخذ وعطا واسئلة تحطم قالي انا بقبلك مبدئيا وحط في بالك ان بيقابلك بعدين اكثر من شخص
انا بقلبي(الي هذي اولها ينعاف تاليها)
المهم اخواني هذا الي صار معي وخايف من المقابلة الشخصية وش تنصحوني فيه