السلام عليكم

شباب راح اجاوب على اسألتكم بشكل عام عشان اختصار الموضوع

بالنسبه للمده بين تسليم الملف و وصول الرساله لك بانك تم قبولك نهائياً وعليك مراجعتنا في تاريخ كذا كذا . فالشي هذا مختلف وماهو ثابت فيه ناس سلمت الملف وجلست شهر و جتها رساله وفيه ناس سلمت ملفاتها و جلسوا اسبوعين و جتهم الرساله

اغلبكم اعرف انه شايل هم كبير براسه و متوقع ان الموضوع صعب جداً وانا اقوله ارتاح يا خلفهم كنا مثلك شايلين هم كبر الدنيا وبالاخير طلع الموضوع سهلللللللللللللللل جداً

بالنسبه للفرز بعد تسليم الملف <~ الشي هذا اختلفنا فيه كثير فيه ناس يقولون مافيه فرز وفيه ناس تقول فيه فرز

بالنسبه لي انا اقول ان ما فيه فرز ابد بعد تسليم الملف يكون الكل مقبول ويتم تقسيم الطلبه على قسمين

قسم بالثمامه و قسم باللواء الخاص <~ اتكلم عن الرياض

بالنسبه لدورة الفنيين ايه دورتهم وضعها مختلف لان اذكر فيه زميل لي فنيي وما دخل الدوره معنا صار له وضع مختلف عن الجنود العاديين و صار يداوم مكان عمله حتى اشعار اخر ولازم يدخل الدوره لكن ما ادري متى راح يدخلها ولا ادري وش راح تكون دورته اعتقد فقط دورة فرد اساسي يعني امن وحمايه ما يأخذها والله العالم

بالنسبه لوضع الدوره و الحياه فيها . اختصرها لكم ( حياه طبيعيه جداً ) فقط اعتمادك على الله ثم على نفسك يعني شل نفسك بنفسك و الصداقه داخل الدوره هي اهم شي اعرف صديقك من لحظة دخولك حاول تكسب الكل وما تخلي بينك وبين احد اي حقد و مضايقه عشان تمشي الدوره بوضعها الطبيعي

المدربين و الضباط والكل معك متعاون و يعتبرونك اخ لهم قبل لا تكون طالب مثلك مثل اي طالب مر عليهم
كلهم على مستوى عالي من الحب و التقدير

صحيح ان بعض الاحيان يبين لك الوجه القوي و يفرض سيطرته عليك بجميع الاساليب ( يتعبك جسدياً و نفسياً ) فقط عشان تعرف ان فيه مدرب افهم منك ماسك الفصيل او ماسك السريه وهذا شي مر علينا كثير و تعايشنا معه وصار الوضع الان ان المدرب يضحك معك و يسلم عليك و يسولف معك لانك خلاص اجتزت مرحلة كبيره و مرحله فرض نفسه عليك

السكن - التعليم - دورة المياه (اكرمكم الله) - الميز (الاكل) - النوم - العياده الطبيه - سيارات الاسعاف - الميدان , كل الاشياء و كل الاقسام على مستوى عالي خاصه في الثمامه معهد و مدينه كبيره بشكل ما تتصور

الهروله و التمارين كانت بشكل متصاعد يعني بالبدايه مشي لمدة 5 دقايق بعدها هروله لمدة 5 دقايق وهكذا في تصاعد لدرجة ان فيه طلاب خلاص صارت الهروله عندهم ادمان و يبي يهرول وهذي المقوله قالها لنا المدرب في البدايه وكنا نقول كذاب الهروله شينه و نكرهها صدقني راح تحبها و راح تهرول حتى اذا طلعت خميس و جمعه صرنا نهرول في المعهد لتوقيت ما تصدقونه 25 دقيقه متواصله وبعض الاحيان 30 دقيقه وكانت احلى الاوقات و يروح الوقت بسسسسسسسرعه

لا تشيلون الهم يا اخواني والله ان الوضع سهل جداً و ان شاء الله اني راح ابحث في ردودي متى سلمت الملف ومتى جتني الرساله ان شاء الله اني احصلها بالتوفيق للجميع