قصيدة جميلة للشاعر : سعيد الأكلبي
البارحه يوم كلٍ راح لفراشه عيّنت هم الوظيفه ماخذ فراشي
الناس في حالها تمشي ومعتاشه وانا على ذمة التحقيق منحاشي
اهل الوظايف صلاة الصبح غبّاشه وانا على مرقدي كني بالانعاشي
كلٍ تجوّز واخذ له يا عرب باشه واصبح مع الناس مبسوطٍ ومعتاشي
شريت لي غترةٍ بيضا ودشداشه واقبلت صوب المكاتب كني الشاشي
قال الموظف ملفك وسطه قراشه كسرة تميسٍ عليها الذر يهتاشي
صديت مابي سواليفه وفرفاشه مانيب في حال مزّاحٍ وفرفاشي
لو شغّلو لي مسلسل خاله قماشه والا ثلاثين حلقة طاش ما طاشي
القلب كنه يحَرّك فيه خرّاشه والكبد كنه ينقشّها بمنقاشي
قلت ابك عطني دقاق الهرج واجراشه ابي كلامٍ يطفّي لاهب الجاشي
قال انت مافيك امل تصبح فتى الشاشه ولا شريطي تبيع وتشتري كاشي
وشهادتك حطها الديوان بخياشه وطافت عليها السنين ونسبتك ماشي
والا عيونك تقول عيون خفاشه وحده تكبّس والاخرى تضرب فلاشي
وان قمت تمشي يجي رجليك رعّاشه كنك تشوّت كوور في وسط الاحواشي
احسن لك تروح سوق البدو وعشاشه تبسط على فصفصٍ وتبيع فشفاشي
عودت ما عاد ابي سمه وطرّاشه الله ولا حاجةٍ تجبرك باللاشي
اليوم الانسان تقديره حسب كاشه لو كان ماله منسيه الترواشي
حوايجه تنقضى وتجيه برماشه لو ان مخّه معبا تبن وخياشي
لكن قالو لها دنيا وغشاشه واقول انا كل نفس ورزقها ماشي
__________________