اختي شمعتي انطفت
اول شي الله يسهلك امرك
بالنسبة ليا انا طابقت في الدفعة الاولى ولكن للاسف لما طلعت اسماء المرشحات بعد المطابقة ماطلع اسمي واتفاجأت بإسمي مع مرشحات الدفعة الثانية والحمدلله
وبعد ماطلع اسمي ورحتلهم فاجئوني بإنه لازم تكون عندي شهادة تصنيف وقتها سودت الدنيا بوجهي حسيت انه ماراح اتوظف وكل بنات علم النفس اللي ترشحو طلبو منهم شهادة تصنيف
وادونا مهلة شهر عشان نجيبها لهم
شوفي انتي قدامك اختيارين
يااما انك تطالبيهم بوظيفة بديلة ودا حق من حقوقك طالما انو شهادة التصنيف دي مطلب غير معتاد خاصة من الخريجات القديمات
ولكن راح تنتظري سرا لمن يدبرولك وظيفة بديلة
اتذكر كانت معايا وحده من البنات طلبت منهم وظيفة بديلة وماشاء الله اتسهلت امورها وقيدها باشرت في عملها الان
او انك تروحي لهيئة التخصصات السعودية واهمممممم شي تشرحيلهم وضعك انو جاتك وظيفة من الخدمة المدنية وادوكي مهلة معينة والا تعتبر وظيفتك ملغية راح يساعدوك بقد مايقدرو بصراحة ودا اللي سار مع كثير من اللي ترشحو هنا بجده
لو كنتي في جده روحي لأستاذ صقر او استاذ حمزه في الدور الثاني وقابليهم بنفسك واشرحيلهم وضعك
وطبعا لو اخذتي شهادة التصنيف افضل من ناحية المرتبة وسلم الرواتب اللي راح تكوني عليه
اما الوظيفة البديلة اللي راح يجيبولك هيا حتكون عادية ع المرتبة السادسة
فأنا أنصحك تاخدي بالاسباب وتحاولي لو قدرتي
بالنسبة ليا اخذت دورة الانعاش وسددت رسوم التصنيف حقت 3 سنوات كانت تقريبا 800 وشي
وماطلبو مني تدريب لان دا اخر ترم ليا ادرس ماستر فخلو الماستر تعويض عن التدريب الحمدلله بس دخلت اختبار ومقابلة وكان سهل وبرضو شرحت للدكتور وضعي وساعدني بصراحة
يعني ربنا بيسهلها ان شاء الله
وفيه نقطه كمان
غالبا وظايف بنات علم النفس والاجتماع في وزارة الشؤون الاجتماعية وبعضهم في الصحة
لو طلبتي وظيفة بديلة غالبا راح يخلوكي باحثة اجتماعية
ووزارة الشؤون دوام الوظايف فيها شفتات للباحثة الاجتماعية حتى الاخصائية النفسية شفتات بس يكون مره وحده في الاسبوع والشفت حلو ماهو سيء
اما الباحثة فشفتاتهم كثير
من واقع ملموس حولي
فعشان كدا اقلك حاولي تاخذي التصنيف وربنا يسهلك امرك يااااارب وتجي تبشريني بالوظيفة
وممكن تكون وزارة الشؤون اكتفت ويشوفولكم وظايف ثانية
محد داري
اغلب بنات علم النفس قبل مايروحو ترشيح اتصلو عليهم موظفات من وزارة الخدمة وسألوهم عندكم تصنيف او لا
فلي قالو لا ولمن جو يوم الترشيح وطلبو منهم تصنيف اعترضو قالو انتو اتصلتو سألتونا واحنا قلنالكم لا ماعندنا ليش حاطيلنا وظيفة تتطلب تصنيف !!
فعشان كدا سارو يوفرولهم وظايف بديلة
انا عن نفسي اتصلو عليا قبل الترشيح بس كنت نايمة مارديت وطلع نفس الرقم اللي اتصلو منه على صديقتي
ربك بيسهل الامور انتي اتوكلي على الله وبس
بالتوفييييييق يارب