المشاركة الأصلية كتبت بواسطة باذن الله شهيد

بخصوص اللي يتشرطون ..

انا كنت شغال في بنك الرياض واستقلت منه لانه ربوي بعد ما استفتيت اربعه شيوخ .. طبعا انا معاي جامعة وتقديري جيد ونخصصي ادارة اعمال .. ولغتي الانجليزيه لاباس فيها غير الدورات اللي معاي ..

عارفين كم عطوني راتب ؟؟؟؟؟
8100 وبعد خصم التامينات صار 7500 ريال + راتبين في رمضان والحج ..
يعني الراتب بالمجمل كامل بعد خصم التامينات 8500 ريال

وش مقابلها طبعا ؟؟؟

دوام من 8:30 الى 5 .. تلفظ علي المدير بسبب انه مرة ماحلقت دقني .. الياقه لازم تقفلها .. مطلوب منك مبيعات ( قروض - بطايق ) ولازم تقنع العميل انه ياخذها .. كل يوم الصباح اجتماع مع المدير ولازم ياشباب تبيعون و و و و و و ... الخ
اضف عليها انه لازم كل يومين في الاسبوع نروح دواير حكوميه نتشحد الموظفين عشان ياخذون بطايق ائتمانيه وعلى سيارتك

غير انه المدير ازعجني لاني جديد كل يوم يقول انت اسمك بالمرسام وسهل نمسحه لازم تجيب مبيعات وتككككرف

غير انه اي غلط يحرمك العلاوة السنويه .. عاد من زين العلاوات .. اقسم بالله على كرفك وتعبك وقرفك علاوتك احيانا 120 ريال واحيانا 180 ريال واحيانا 160 ريال .. والله انه كان فيه موظف معي له خمس سنين راتبه ما زاد الاساسي الا 700 ريال بس

طبعا اللي ذكرته من ناحية الدوام .. غير اني فقدت الراحه النفسيه والقرف بسبب الدوام



ويجيك واحد هنا يقولك انا جاااااااااااااااااامعي واخذ وكيل رقيب .. يارجل والله العظيم جندي منتف في الجيش راتب 4000 ريال ابرك من هذه ..

لما تشتغل بالجوزات انت في المطار .. غير ميزة انك حكومي وامان وظيفي ..
غير انك تعدل سنويا سواء انجزت والا لا .. دوامك استلام 6 ساعات زي اللوز ماعندك لا شغل ولا مشغله الا خفيف وزملائك يغطون عنك احيانا لو عندك ظرف

احمدوا ربكم وقدموا مافيه ازين من الحكومه والله هي اللي تقدرك وتحترمك .. ماهو القطاع الخاص السملق ..

القطاع الخاص باختصار يشترونك بالفلوس ولما تتقاعد يرمونك زي الكلب لا قريب ولا صديق .. بعكس الجوزات تكون علاااااااااااااقات تنفعك وتنفع عيالك واقاربك بالمستقبل ..


على طاري القطاع الخاص .. اذا ماكنت في ارامكوا والا سابك ابعد عنهم ..

وعلى طاري البنك .. مره امي كان عندها موعد بالمستشفى .. وجيت كلمت المدير وقلت له بروح اودي امي .. اكلني وقالي احنا مو قطاع حكومي استاذانات و و و .. هنا قطاع خاص 8 ساعات تقعد بالفرع بعدها ودي اللي تبي .. سحبت عليه وطلعت .. ولما جيت عطاني افاده وارفقت له تقرير امي .. واكل تبن وسكت ..


اسال الله لكم التوفيق .. للامانه انا بنتظر الامنيه .. دعواتكم انقبل فيها .. لو ماجاتني بدور اي دورة وبلتحق فيها .. لو يخرجوني وكيل رقيب .. المهم راحه البال و وظيفه حكوميه ولا زقاقة القطاع الخاص ..

الله يوفق الجميع