بداية احب اهنيكم بالشهر وينعاد علينا وعليكم بالصحه والعافيه

وأعاننا الله على صيامه وقيامه بالطاعات ..

اما بالنسبه للموضوع فانا سجلت معاكم من بداية تخرجي من الجامعه

وتخصصي بكالوريس حاسب الي

مااقول الا ياحسافة الخمس السنين اللي انكرفتها في الجامعه وصدق من سمى

هالشهاده بكالوريس لانها على اول 3 حروف فيها بكى

لي تقريبا 6 شهور متخرجه وماخليت شركه ولابنك ولا اي وظيفه الا وقدمت عليها

والنهايه ولاشي ولا احد قبلني ماادري ليش

البنوك جننوني يعلنون عن وظايف واذا قدمت قالوا لي من قال لك اننا نبي

ماادري يستهبلون والا يستخفون دمهم

والشركات مااحد رد علي الا شركه وحده ورحت واختبرت وقالوا عني اني مفصله

لوظيفتهم تفصيل واني قدمت باخر يوم بس انا اللي يتمنوني وقالوا روحي وبنكلمك الاحد

تداومين وهالحكي كان يوم اربعاء ومن 5 شهور يمر الاحد وهم ماكلموني

الزبده ياعالم اني وصلت معي لدرجة الاحباط صرت اشوف اعلانات الوظايف

وتخصصي يكون من المعلن عنها ومااقدر اقدم خلاص احبطوني مليت من التقديم

عندي اني مااقدم على الاقل احفظ كرامتي واحفظ موية وجهي عشان مااصير مضحكه

على الأقل اذا سألني احد ماتوظفتي اقول لهم لا اصلا ماقدمت على شي

اللي يقهرني اني اقدم عالبنوك ويطنشوني ويقدمون غيري من اصحاب الدبلومات وينقبلون

طيب خلاص خلوا الجامعه تقفل بكالوريس الحاسب دام انه مااحد يبينا

خلاااااااااااص انا فقدت الامل بالوظيفه وحسبي الله على كل من يسدها في وجه شبابنا الطموح

الاجانب مدراء وفي احسن المناصب في ديرتنا وحنا نعاني من البطاله والاحباط المعنوي والله

يستر لا يجينا حالات نفسيه اذا لا وظيفه ولا شروط ميسره للماجستير يعني وش نسوي

واخيرا اعذروني على الحكي بس حسيت اني في خاطري حكي لو مااطلع باطق واموت

والله يوفق الجميع ويسهل امورنا يارب ويتوظف كل عاطل وعاطله