اقتباس:
المشاركة الأصلية كتبت بواسطة سايكولوجي
يا اخوان بمناسبة بدء التقديم حاب أنبهكم واحذركم من كلام راح تسمعونه هنا أو برا التجمع
ياشباب انتبهوا من الإشاعات اللي تصدر من نوعية مريضة تفتي من عندها سواء عن حسن أو سوء نية المهم انهم ينشرون اشاعاتهم وسمومهم ولا حتى يصححون فتاويهم لكم بعد مايتأكدون ان اخبارهم مغلوطه ويمكن تودي أي إنسان في داهية وتدمر مستقبلة
بقولكم سالفة احد الأصدقاء قبل شوي جاي منه ومثله كثيرين والله ناس راحت عليهم وظائف واشياء كثيره بسبب هالاشاعات والاستشارات اللي تجيهم من ناس بعضهم خبيث وبعضهم لامبالي وبعضهم كذاب
الرجال صار لي فتره عنه لكني أذكره متعلق كثيير بالحرس الوطني والأمنية تخصصه هندسة حاسب وحصل على معدل 3من 4 لكن مجرد ماسألته هو قدم ولا لسا فاجأني بكلمة ماقدمت ولا راح أقدم أصلا ماختبرت كفايات وقدراتي تحت 65 ولاني فاضي مرمطه وحوسه عالفاضي وأحاول أفهمه لكن رافض يدخل الفكرة في راسة لين قلتله من اللي أعطاك هالشروط؟ قالي فلان وفلان قالوها لي قبل التخرج الله يجزاهم خير قبل ما اتمرمط "للأسف واحد يقربله والثاني صديقه" فهمته ان كل ماذكر غير صحيح وخليته يشوف الشروط بنفسه من موقع الحرس والأمنية وحتى الدفاع اللي قايلين له مايقبل طول الا فوق175!!
انصدم الرجال وقعد يدعيلي وجمع اوراقه ويبي يقدم عالحرس وراح يقدم على الامنية كمان لكن قبل ما أمشي اتصل على صاحبه وسأله عن الشروط اجاب بكل برود كنت احسبها كذا لكن عرفت شروطهم من مواقعهم في بداية اعلاناتهم عن تقديمات هالسنة دار بينهم كلام طويل عريض بعدها سكر الخط في وجهه
الخلاصة ياشباب: وش كان يحصل لو ماقلت للرجال وصححت له معلوماته اكيد راح يتدمر مستقبله بسبب هالاشاعت وعلى فكره انا مادري عن صاحبه هل قاله الشروط عن حسن نيه أو لا لكنه بعد ماتأكد ماراحله أو اتصل فيه وصحح له معلوماته واعتذر منه والمضحك ان شرط الطول في الدفاع طلع الأخ سامع فيه قبل كم سنة في تقديم الحرس الملكي ويقول شرط للدفاع ههههه وطبعا اللي جا صديقي من الاشاعات مانتم سالمين منه
أخيرا لاتاخذون كلام أي شخص الا الثقة والخريجين السابقين ومواقع الجهة اللي بتتقدمون لها
والله يااخوان اثرت فيني سالفته شوي ولا طافته أشياء تقرر مصيره وقلت لازم اقولها
|
اولا الحسد ف كل مكان حتى من اقرب الناس هذه طبيعه النفس البشريه ضعيفه الايمان اللي ابليس متلبسها وهنا يجي دور الخوه الصالحه والصحبه السنعه مهما يكن الفاشل مايحب انك تكون احسن منه ليش فلان يروح ضابط وانا لا ليش وليش هذا من ضعف الايمان ودناءه النفس الواحد مهما يكون عقله براسه يعرف اللي له واللي عليه ويعرف اصحابه وشهم عليه ان ومن واقع تجربه اقول فتره التقديم تكون بمعزل عن محيط الاصدقاء والاقارب مهما كان تقديمك عسكريه او غيره بعد ماتطلع النتايج وربي يكتبلك الخير باي مكان كان ذاك الوقت اقول انا انقبلت ف المكان الفلاني لان سبحان الله ممكن واحد يسدحك لاشعوريا ..لاتضحكون من كلامي اقولكم الجد حتى اللي يسالك وين قدمت قل قدمت ف كل مكان وبس والرسول صلى الله عليه وسلم لنا قدوه فيما معنى الحديث اقضوا الحوائج بالكتمان لذا نصيحه لاتقول لاحد انا وصلت ف التقديم كذا باقيلي كذا خلك ساكت لما تنتهي نصيحه من اخوكم ...ومن ناس راحوا ضحيه لهذا الامر..
لذا خل طلعاتك مختصره ولاكان فيه شيء ولاتتكلم الا اذا جاك قبول نهائي وتبي تعتب باب الكليه ارسل للي تعزهم رساله خبر واعتذار