شف انت وش تميل له .. ووش الشيء اللي تحب تسويه كل يوم , وابتكر فكره وحولها لمشروع بهالمبلغ
مثلا تعرف تصميم الفوتوشوب تسوي دعاية لنفسك عن طريق الايميلات والتويتر والفيس بوك ويجيك الزباين يطلبون منك ويدفعون لك
وهذي بدون اي رأس مال فقط جهدك ..

مثلا فيه موضوع هنا : كان يتكلم عن جمع صور من الانترنت للديكورات والغرف والسجاد والجبس وكل صور زينة البيت .. وحطها على سيدي كبرنامج تصفح وطبع عليه غلاف وسعره بـ 60 ريال لكل سيدي وبدأ يبيع على مؤسسات الديكور وحريم البيوت .. وجاه خير ,
هي "فكرة" ابتكرها وحولها لمشروع , بعد ما تقرأ عنها وعن الزباين اللي يبغون هالخدمة منك .

او اذا كنت تحب الاختلاط بالناس وتحب تخدم الاخرين ووسيع صدر .. افتح لك كاونتر في الاتصالات وبع اكسسوارات كبداية وبعدها طور شغلك لبيع الجوالات المستخدمة بالشراء والبيع وتكفيك من 4000 الى 6000 كبداية في هالمشروع ,

او بيع الخضار , تاخذ من سوق الجملة بـ 1000 ريال كل يوم وتبيع مفرق على يومين وتطلع دبلها .. مثلا تاخذ صندوق خيار كبير بـ 20 ريال او اقل وتفرقه وتبيع صندوق صغير بـ 5 ريال وهكذا ..

وترى المشاريع كثير .. وكثير منها بدون رأس مال .. أهم شيء الفكرة وتطبيقها عملياً
وصدقني بيجيك خير اذا "جربت" فقط ,
في اي مشروع تبيه سواء برأس مال او بدون .

ولو تبسط في البطحاء كانك في الرياض وتبيع بنطلونات وبلايز او ادوات حلاقة وعطور .. بيجيك خير إذا "جربت"
وماراح تخسر اي شيء .. فقط "جرب"

سواء بيع او تسويق او اي مشروع تحبه وتهواه .. وهذا اهم شيء انك تحب المشروع "عشان ماتمل منه من ثاني شهر أو اقل"

بالتوفيق لك اخوي .