المشاركة الأصلية كتبت بواسطة احمد بطي

اختي وطن الحلم،،، اول شي يعافيك ربي على الطرح،، من وجهة نظري اشوفها مو ظاهرة يعني نسبة وتناسب،،
في كل فئة صالح وطالح،،سواء بنات او شباب،، وانا دايما اشوف البنت الطرف المظلوم،،لعدة اسباب
1-سوء التربية واهمال الاهل والتربية التقليدية العديمة الفائدة
2-النقص العاطفي
3-النقص المادي احيانا
4-الموضة في اعتقاد بعض البنات البعض مو الكل وهاذي سببها المسلسلات الهابطة والوهمية
5-الايمان عند بعض الفتيات بالزواج عن طريق الحب
6-التفكك الاسري كالطلاق او خلافات الاسرة الكثيرة

بوجهة نظري هاذي اغلب الاسباب اللتي تؤدي الى سلوك الفتاة لهذه الطرق وليس معنى ذالك انني مؤيد لما تفعله الفتاة ولكن لو وجدت الفتاة عند ابيها واخيها وزوجها الحب والاهتمام لما بحثت عنه عند غيرهم،،

صراحة اغلب البنات يوم يكلمون الشباب بنية الحب والزواج وبداية احلام وردية ولكن هل الطرف الاخر نفس الشي؟؟!! هنا نضع الف خط،، غالبا احلامهن وردية وافكارنا سوداوية!! يحبوننا بصدق ونستغلهم بابشع واحقر استغلال،،والنهاية تكون بشكلين الشكل الاول:: تصحو الفتاة من احلامها ولكن تظل تنزف لفترة وتعيش حياتها التقليدية بشكل طبيعي والشكل الثاني: تعيش الفتاة حياة مؤلمة هدفها فقط الاستغلال والانتقام من كل شاب تصادفه لانها بحسب نظرها هم من سلبوا حياتها وقطفوا وردة عمرها،،وهذا الشكل نهايته مأساوية ،،يعني تصبح نظرتها للرجال سوداوية ومهشمة ،،،،



اتمنى من كل واب وزوج واخ انه يصادق بناته ويغرقهم بعطفه وحبه واهتمامه،، صدقوني لو كل اب وزوج و واخ يجلس مع بناته ويسولف معهن ويصاحبهن ويشاركهن همومهن ساعتها راح تشوف اهلها ملوك ولاراح تسمح لنفسها تسوي شي يهز كيانهم وكيانها وسمعتهم وسمعتها،، حتى الاخوان المفروض يكون قريب من اخته يراعيها ويسولف معها ويقعد معها لو نص ساعة كل يوم،، ويفرحها بهدية لو بسيطة نتيجتها عظيمة!! لانها لو لقت منك الاهتمام ماراح تشوفه وتبحث عنه عند غيرك ،، لان الانسان بطبيعته اذا لقى الشي ماراح يبحث عنه وراح يكتفي بالشي اللي معاه ،، لاتكون رسمي ومتشدد مع اختك ولاتكون ايضا سلبي خلك ماسك الحبل من النص،، ترى مو عيب انك تمدح اختك حتى لو مجاملة ،، راح تسعدها،، مثلا طبخك زين ذوقك حلو،، ماشالله اليوم كاشخة ومن هالكلام الحلو والمحبب للنفس،،وعادي امزح معها وناقشها بامور الحياه والسياسة والرياضة وكل شي،استشيرها بشي يخصك راح تنبسط من هالشي راح تحس انها مهمة بالبيت وان لها ثقلها ووزنها، لاتحسسها بالنقص وقلة العقل والتفكير،،خلك مرح مع اهلك بصفة عامة،، حسسها بالثقة والمسؤولية اصحى تعذبها وتجرحها وتقلل من شأنها بالشك الغير مبرر،،،،احيانا الشدة تؤدي الى الانحراف،، الاخت اذا حست بالحب من اخوها والاهتمام ،،، راح تعيش كامل ادوات الحياة،، ولاراح تبحث عنها من الابواب الخلفية،،

مشكلتنا بالسعودية الرسميات بالتعامل مع الاهل صراحة لدرحة الواحد يدخل البيت مايسلم على اهله!! ترى عادي تدخل البيت وتشوفهم قاعدين بالصالة وتقول السلام عليكم ترى كلها كلمتين مو تقل داخل حوش غنم هواش وصراخ والف طلب بالثانية وين شاحني وين ثوبي وليه كذا وليه كذا،،،

حدد يوم بالاسبوع واخذ اهلك وروح تمشى معهم وفرحهم بتمشية لو ساعتين،، ترى ماتكلفك 40 ريال،،،
مع انك تصرف دبل مع اصحابك ،،،

ترى موعيب تسوي قروب واتس اب انت واهلك وتجتمعون فيه وتسولفون وتستانسون وتقون علاقاتكم وضحك ووناسة وتعليقات،، وراح تكسر الروتين والرسمية بينك وبين خواتك،،ترى عادي هذاني صاك 26 سنة والعب مع خواتي جماد نبات حيوان انسان احيانا وهن ماشالله فيه اللي اصغر مني بسنة وفيه اللي اكبر مني بسنة وساحبين على الاجهزة والالكترونيات،،تختلف طرق التواصل والافكار بس المهم النتيجة السليمة،، اتمنى وصلت فكرتي واعذروني على الاطالة،،،