لمن أراد مني توضيح أكثر


اللي يقول أبغى أشتغل نظامي وكم تأشيره أحصل عليها؟

المعدات الثقيله تندرج في السجل التجاري تحت المقاولات

تطلع سجل تجاري من موقع وزارة التجاره وتختار مقاولات وبعدها تختار النشاط تأجير معدات ثقيله وهم يرسلون لك السجل التجاري بالفيدكس خلال 10 أيام بالكثير

بعدها تحط محل في شارع صاد ورخيص وقد تحصل ب 7000 أو 8000 ريال في السنه أو تاخذ برا الرياض يكون أرخص وتعلق عليه لوحة مؤسسة فلان الفلاني للمقاولات
وتطلع الرخصه من البلديه
تفتح بعدها ملف في مكتب العمل والتأمينات ويتولى الموضوع أي معقب وتسعود صاحب المؤسسه إذا كان لايعمل مثل الوالده أو الأخ أو الأخت ويعطونك على ماأظن 3 تأشيرات

وبكذا تكون تعمل بطريقه نظاميه وجميع التكاليف بتكون في شراء المعدات وصيانتها عند الورش التي بتتعامل معهم وفي حال رغبت في التراجع عن العمل في المعدات تستطيع بسهوله بيعها لأنها تمسك قيمتها ونزول سعرها بطيء
أما لو قارناها بالمحلات التجاريه تقبلها وتجيك خساره قاتله مثل ماحصل خلال الفتره التصحيحيه الأولى، أما أصحاب المعدات فكانت خسارتهم أنهم وقفوها في أماكن آمنه في أرض فاضيه أمام المنزل أو استراحه واحتفظت بقيمتها حتى يتم تصحيح الوضع وإحضار السائق المناسب


على فكره: خلال الفتره التصحيحيه الأولى نزل الأجانب معداتهم للبيع خوفاً من الأنظمه وأصحاب المعارض عارفين كذا حتى في الحراج تلقى اللي جاي يبيعها سوري أو يمني

يتوقع أصحاب المقاولات نشاط كبير للمعدات الثقيله بعد طرد العمله المخالفه واللي كانت تنزل الأسعار

ايضاً سوق المعدات الثقيله نايم في رمضان ومافيه بيع إلا ماندر وبيكون السوق حامي بعد العيد يعني في تاريخ 10 وفوق وأيضاً مكاسب الرافعات تكون في اليوم بين 400 إلى 800 ريال في الغالب والبنيان يحتاج لسنوات لأنه فيه نقص مساكن في السعوديه والزباين كثير مره وخاصه بعد مايوزع العامل الكروت(كل عماره ياخذون الكرت تلقاهم يتصلون على سائقك مباشره عشان يجي ويرفع رمل أو اسمنت الخ)
نصيحه لاأحد يأجر المعدات الثقيله على عامل ويخليه يلف فيها الأحياء: لأنهم في السابق يخربونها ويدور سعودي آخر يشتغل عنده وهو موب على كفالته وماهمه خسارتك في الصيانه


لازم العامل يكون على كفالتك ويكون السكن حق العامل قريب من عمله لأنه بيتصل عليه الزبائن بكثره حتى عند نهاية دوامه واللي بيحرك العامل ويدفعه للعمل هو النسبه اللي بتتفق معه عليها

في الرافعات يهمك ثلاث أشياء 1-المكينه 2- الجير 3- طرمبة الهيدروليك وسلامة البوم (لاتشتري رافعه حصل عليها انقلاب وتدمر البوم والبوم هو الحديده اللي ترفع شحنة الرمل للأعلى وحوادث الانقلاب نادره جداً في رافعات الجي سي بي)
طرمبة الهيدروليك لايشتغل العامل عليها وزيتها ناقص لأنها قد تعلق أو تتلف الطرمبه ودائماً العماله وخاصه الهنود تحصلهم حريصين على فحص الزيوت قبل العمل يومياً أما إذا شفت تهريبات زيوت فهذا شي طبيعي في الرافعات لأنها بالكامل تعتمد على الزيت وكلها ليات يعني إذا كان التهريب بسيط يزيده العامل وإذا كان كبير يتغير اللي اللي يهرب أو الصوفه وهذا الشي يتكرر بين فترة وأخرى في بعض الرافعات فلا تخاف وتتوتر بس خل التهريب تحت المراقبه
عند تلف طرمبة الهيدروليك وهي من أغلى القطع في الصيانه تكلف 7500 ومع شغل اليد يكون مجموع التكاليف حوالي 10500 أو 11000 ريال وتتلف بعد عمر طويل وبعضهم يقولون 5 سنوات تقريباً

وبخصوص انقلاب الرافعات: لتجنب انقلاب الرافعه عند عملية رفع المواد للأعلى (لأنها بتكون ثقيله بسبب الرمل المحمل في الباكت) لازم السائق يوقف في مكان صلب من الأرض يعني لايوقف جزء الرافعه الأمامي على أخشاب أو أرض غير صلبه حتى لاتنهار فيه وتنقلب (لابد من تنبيه العامل عشان يحس أنك فاهم الشغله وهو بعدها بيتعود ويتنبه) وأيضاً الكفرات الخلفيه لاتكون سيئه حتى لاتنفقع تحت ثقل الشحنه اللي يرفعها العامل لازم تحافظ على نظافة الكفرات وسعر الكفر 1800 ريال