السلام عليكم ورحمة الله وبركاته
يااخوان انا مادخلت المنتدى ولا سويت موضوع الا من ضيقة في صدري وحيره شيبت براسي ومشكلتي هي اني عسكري في الرياض وبعيد عن اهلي حيث انهم يبعدون عني حوالي 1000 كيلو وضروف ابوي واخواني الصغار ماتسمح بااستمراريتي في الرياض والبعد عنهم بما انني العائل الوحيد لهم وصارت تراودني افكار بالاستقاله من العسكريه الراتب ضعيف ولا يكفي وكثرة الظلم اللي حاصل لي في الدوام وانا بصراحه من يوم دخلت العسكريه وبعدت عن اهلي وجيت للرياض احس ان اموري متعكسه ولاني مرتاح
حاولت قدمت نقل وقدمت الحاق وجبت واسطه ولكن بدون اي فائده ! وادري ان فيه بعضكم راح يقول ليه ماتجيب اهلك للرياض كحل من الحلول ولكن صعب اني اجيبهم للرياض حياتنا صعبه في الديره فكيف بعيش في زحمة الرياض وغثاها ومشاكلها وغلاء ايجاراتها والشي الثاني انا حاولت اقنع الوالد انه يجي الرياض او الشرقيه ولكنه رافض وهو اساسا مو مقتنع لدخولي العسكريه اساسا وكان دايم يقولي ابعد عنها ولكن مالقيت الا هي وش اسوي ؟! والله يااخوان تعبت لازواج ولا راحة بال ولا قريب من امي واخواني الصغار والوالد ايضا يحتاج من يوقف بجانبه لانه يعاني من مرض نفسي
الان اريد رايكم انا افكر في الاستقاله والله يرزقنا باللي احسن منها لكن اللي مصبرني وين اروح اذا فصلت هذا اللي خلاني متردد
تكفون يااخوان اللي يقدر يشوفلي حل او راي لايبخل علينا
ملاحظه لمراقب المنتدى ( انا ماكتبت هذا الموضوع لمساعده ماليه ويشهد الله على كلامي لانكم ضلمتوني في موضوعي الاول وقلتو انت تريد مساعده ماليه وانا والله العظيم لا اريد مساعده ماليه واذا اردت المساعده انا في غنى عن منتداكم ولكن كل مافي الموضوع انني قلت اللي في نفسي لعل وعسى القى الحل لمشكلتي )
تحياتي لكم