بالنسبة لشباب الاحتياط احب اقول لهم انهم لا ينتضرون الانضمام للكليات ويحاولون يشوفون لهم بدائل اخرى ولعلها خيره لهم ولا يأملون كثير عشان اذا ما جت ما يضيقون زود واعلم ان رزقك مكتوب ولكن يعجبني الانسان الإيجابي وبعد اذا بغيتم تشوفونها من منضور( اللي ما يبيني ما ابيه ) ترى مهيب شينه , لأني اعرف اثنين ما انقبلو في كلية الامنية قبل سنوات وواحد منهم زعل وتحطم ودخل الجامعه وهو نفسيا منهار ولا قدر يكمل مع ان تخصصه كان زين (هندسه) ولا عاد ادري وين راح والثاني ما انقبل بالعسكريه بعد ولكنه كمل جامعه وبعد ما تخرج ما دخل عسكريه مع انه كان يقدر يدخل والان ياخذ راتب زياده عن زملائه الضباط الي انقبلو بسنة تقديمه بي 6000 ريال

فلا يقف تفكيركم يا شباب عند هالكليات والقطاع الخاص هاليومين ترى يدعو للتفكير لأن شباب كثار الحين وصلو لمراتب عاليه (مدراء ادرات ومدراء عموم ) واعمارهم بالعشرينات والثلاثينات واصبح هماك مسئولين كثار بالقطاع الحكومي وضباك كبار يدورون رضاء هالشباب ويتمصلحون معهم بس كلش يبي له جهد وتعب. اما اللي بيقعد يتحسف ويندم على شي راح فاكيد اخرته مهيب طيبه ومكانك رااااوووح واللي حوله من زملاء ماشين سواء زعل والا رضا.

وترى العسكري عمره قصير غالباً 18 الى 25 سنه ويقاعدونه وخصوصا الضباط ولو تشوف اسماء الدفعات القديمه تلاقي الباقي منهم قله والباقي متقاعدين بينما زملائهم المدنيين ما يتقاعد الا بهواه او اذا طق الستين

نقول للمقبولين الف مبروك والله يوفقكم
ولغير المقبولين الميدان فيه فرص كثيره بس شمر عن ساعدك وخل هالكليات لسانه حالها تقول يا ليتني قبلت بهالطالب وانت ذاك الوقت بعد ما تكون مسكت اول الطريق بترد عليهم وتقول الحمدلله اللي نجاني من العسكريه وغثاها