طبعا قلت تجربة قديمة لانها تحتاج لتحديث فمو الواحد يقراها ويبدى يطبق لان ممكن في الوقت الحالي ما تنجح بنفس الاسلوب فالتجربه هي عباره عن شراء تمر من مزرعة صغيرة عدد النخل تقريبا 80 نخله نوع التمر صفري القيمة 7 الاف ريال المشتري اخوي لان وقتها طالب فالفكره بدايتها ماكانت عارف عنها شي الا ان اخوي قال ترى شريت انتاج مزرعه وراح اوفر لك سيارة حوض وانت اشتغل وبينا بالنصف قلت له وش يدريني عن بيع التمر ورفضت في البدايه لحد ما دبر واحد ثاني اشتغل انا واياه وقال خذ الثلث وهو الثلث وانا الثلث فوافقت ان اشتغل معاه بشرط ان ما اخذ شي اهم شي يرجع خسايره واذا ما ضبط الشغل يتحمل خسارته اهم شي ما يتوطى في بطني ليش ما انباع التمر بدينا الشغل على بركة الله بعدما جهزوا مخطط البيع ووقتها اثنينا الي مستلمين البيع مطقمين هيلكسين 93 غمارتين وعلى حسب عدد عذوق التمر في النخل احيان نقص نخلتين واحيان ثلاث واحيان اربع وموقع المزرعة في بيشه والسوق الي نبيع فيه في الاسواق الشعبيه في تهامة والمسافة 400 كيلو بينهم تزيد وتنقص من سوق للثاني في البداية تحمسنا لاجل القص والتحميل والي كان المزارع هو الي يقص واحنا نرص العذوق والتمر الي يطيح على الشراع ننقيه ونعبيه في كراتين مع خضه بسيطه لاجل يطلع من العذوق تمر زايد نعبيه في الكراتين واحلى شي بالنسبه لنا في البداية هي الكشخه قدام الناس في الطرق يعني شوفونا حركات اصحاب نشاط تجاري وندخل ذهب بعد المزرعه نتجه لشقة الزعيم لاجل نكمل المجزره ونقص كل عذق نصين ويكمل برضه خض لاجل يطلع تمر للكراتين لاجل نبيع رطب وعذوق وكان برنامجنا ان نتجه للاسواق الاسبوعية بحسب اوقاتها نسفط سيارة في الظل ونتفرغ لسيارة للبيع حتى تنتهي الحمله وعشان انا اخو شهبندر التجار فانا المحاسب الي اجمع الفلوس كل سياره ممكن تطلع في المتوسط من 1700 الى 2400 ريال وممكن تقل بشي قليل او تزيد بشي قليل وكنا نصرف حق بنزين وفطور غدا والي يصفى نعطيه اخوي ونبدى من جديد في اليومين الاخيره دخل معانا اخوي الصغير بقلاب ديهاتسو وبرضه على نفس الموال على حسب زحام السوق نسفط سيارات ونبيع سياره احيان ننتظر حق ساعه الى ثنتين واحنا ننتظر الناس تشتري واذا تجمع الناس نكمل بيع للبقية بحسب السعر الي نبيعه لاول واحد مرات نبيع العذق الصغير على 20 ومرات نبيع العذق الكبير على 70 ريال والكرتون على حسب السوق من 20 الى 50 ريال عيب الشغلة ان مافيه مجال للراحة عشان كذا مع اليوم الخامس طاحت قوانا فالوصول للاسواق مع شروق الشمس والخروج منها مع الغروب والاتجاه للمزرعه 400 كيلو رايح و 400 كيلو راجع وباقي الوقت تقطيع ورص سواء في المزرعه او البيت قصينا تمر 20 نخله تقريبا والمحصلة بعد المصاريف بحسب الي حسبها اخوي حوالي 29500 ريال بقى حوالي 60 نخله قلت لاخوي شرايك ابطل شغل قال ما اعجبتك النسبه قلت ما ابغي شي كل الي ابغاه اني انام قال مع الزعيم مافيه نوم قلت انا معلن حالة اضراب عن العمل حاولت اقنعه اني انام لو ساعة ورفض قلت طيب نص رفض طيب ربع ساعه رفض طيب خمس دقايق رفض وفي النهايه وافق على الاستقاله من العمل ومشيت والثاني برضه قدم استقالته وبقي اخوي الصغير كم يوم بالديهاتسو ثم ترك الشغل المهم ان ترك العذوق حتى صارت تمر وباعها جمله بعد القطع والتنقيه بقرابة 10 الاف ريال --------- التجربه بشكل عام كانت حلوه لكن كنا في حاجة للراحة فبعض الاوقات ما ننام ولا ساعه كامله وجهد البيع في السوق مع الشمس والروحه والجيه للمزرعه ارهقتنا والبقية لقوا عذر وما صدقوا خبر بالنحشه بسبب الجهد الي جاهم وخربت الشغله هذي القصه المختصره مع وضع تفاصيل لها علاقة بالتوقف مع العلم ان اخوي ماهو عصبي بقدر ما كان متحمس لانجازنا للمزرعه ولما شاف ان ناوين على التوقف تركنا نتوقف واحد ورى الثاني ثم كمل الباقي في وقت لاحق ------------ طبعا بعدها بفتره اقنعت واحد من الشباب ان معاي كنز يحتاج للاستثمار وطبينا في مزرعه وافق صاحبها لكن نشب لنا ان ما نبيع الا تمر وما نبيع عذوق وجلس ينصح فينا ان مكاسب التمر افضل والي معاي طفش من الروحه والجيه واخيرا وافق صاحب المزرعه ان نشتري منه لما صار تمر شرينا منه نخلتين دفعه اولى قصيناها ورتبناها في كراتين واتجهنا للسوق الشعبي بعد اكتساب الخبره ولما وصلنا الا دينات وسيارات وناس عارضين تمر من كل حدب وصوب وانواع التمور الي جايه من كل المناطق ونعرض الكرتون على 30 ريال والناس تضحك علينا احنا والتمر الي معانا قلت شرايك نسوي تخفيضات ونبدى ننزل العروض لحد 5 ريال ولا واحد شرى مننا حتى التمر ما يذوقوه مرينا على المحلات يطالعوا فيه ويرفضوا يشتروا باي قيمه الي معاي طفش وقال خل نمشي مامنه فايده وكلما شاف غنم او قرود وزع عليها كراتين ويقول هذا تمر صاحب المزرعه قلت خل نفكر في حل ثاني ونشوف اسواق ثانيه مرينا على كم سوق على الطريق ولا فيه فايده واخيرا اتفقنا ان نضبط التمر في تنك يمكن تضبط معانا قال خذه انا ما عاد ابغى منه شي قلت لا تستعجل بتضبط معانا واليوم الثاني اخذت تنك صغير وكبير وضبط معانا حق الحمله حوالي 36 تنكه بعد الحشو وتقليبها في الشمس اعطيته نصف التنك والباقي بعتها على مراحل رجعت الي دفعت عربون ومبلغ بسيط وبالنسبه للتنك الي معاه تصرف فيه على طريقته الخاصه فقفلت معاه من اول ما عاند معانا صاحب المزرعه وطبينا في السوق وهو مليان تمور ثم المحلات وباقي الاسواق بالاضافة للاستعجال لاجل البيع طبعا تجارب سريعه ما يعني نجاح او فشل ففايدة التجربه الاولى مع بداية الموسم فكنا وقتها متفرغين للاسواق وقليل الي ينافسونا خاصة ان اغلب الي يجون من برى يتجهون لاسواق التمور او على الشوارع القريبه مع المصطافين واحنا اتجهنا للاسواق الشعبيه البعيده بخطه مدبره من الزعيم والثانيه تأخرنا حتى صار السوق الشعبي اشبه بسوق التمور وضعنا بين الجميع وفي الختام الي يريد مكاسب يحتاج انه يحجز من بدري بما ان الناس متلهفه للتمور الطازجه قبل لا يتبع الطوفان وتبدى المنافسه تكون حامية الوطيس وتقبلوا اجمل تحيه