المشاركة الأصلية كتبت بواسطة أملي فيك يارب

اسعد الله أيامكم وجميع أوقاتكم

النقاش الأخير ، كل وحده قالت وجهة نظرها وقالت انتهى النقاش ،
أنا كمان بقول وجهة نظري والنقاش منتهي

بداية .. محد يشك بنية أحد ، نثق إن الجميع في هذا التجمع يحب الخير للجميع ومافينا اللي بقلبها حسد أو غيره ، وإلا ماكان التجمع وصل لهذا العدد من الصفحات ، ساعدنا بعض ابتداءً بالتسجيل وانتهاءً بظهور نتائج القبول ، بنفس طيبه لايداخلها حسد ، والبعض حتى هذه اللحظه على استعداد لتقديم المساعده رغم عدم القبول. > هذي المقدمه عشان تعرفون إني واثقه بطيب قلوبكم

ولكن بخصوص كلامكم إن بعض المتقدمات تنطبق عليهم الشروط ولكن غير واثقين من ظروفهم ، قدموا وأخذوا فرصة غيرهم ، بسألكم سؤال .. مين فينا يضمن الظروف ؟ بغض النظر عن هذي الوظيفه ، مين يضمن انه يستمر في الدراسه ، أو يستمر في عمله ، أو يدوم له نجاح أو فشل ؟ محد
ولا أحد يضمن ظروفه ولايحق أي شخص يحاسب الثاني على الظروف ، ولاحتى الشخص يحاسب نفسه على الظروف ، هذا شي خارج قدرته وإنما بتسهيل الله وبركته تتم الأمور

كل اللي انقبلوا ، ماهم ضامنين ظروفهم ، يُخيّل لنا في لحظة ما إن الموضوع سهل ، ولكن وقت الجد كلنا اختبصنا ، ماندري كيف نروح ندرس ووين نسكن وكيف نروح وكيف نجي ، هذي العوائق هل راح تمنعني من إني أتقدم لفرصة وظيفيه وأنا تنطبق علي الشروط؟ لا وبإذن الله تتسهل جميع الأمور

أعطيكم مثال بسيط وقيسوا عليه ، جميع المتقدمات لوظائف التعليم بجداره لايضمنون الظروف ، ولايضمنون ان التعيين بنفس مناطقهم ، وبالرغم من ذلك كثير منهم حاطين ضمن الرغبات مناطق بحياتهم ماشافوها ، ويجي التعيين لبنات من خارج القريه وبنات هذي القرى مليئة بالخريجات وبنفس التخصصات ،
مثلاً في هذا التجمع الكثير منكم من جده ، وغالبية بنات جده في أي تقديم وفي أي مجال تكون من ضمن الرغبات إذا ماكانت الرغبه الأولى منطقة ينبع ، سواء في مجال الصحه أو التعليم أو الوظائف الحكوميه زي ماشفنا بهذا التجمع ، طيب ينبع مليانه بنات خريجات ، لو وحده فيكم تعينت عندهم ، هل معناه أخذتي فرصتها في الحياه ؟ لا طبعا
أنا أتكلم من واقع أشوفه قدامي بنظره قريبه

كل شي أرزاق من الله ، إذا منحني فرصه ومنع عن غيري فرصه ، إنما لسبب نجهله ويعلمه ، قد يؤخر الله لنا شي كنا نستعجله ويمنحنا الأفضل وقت أوانه ، وقد يمنحنا شي كنا نرغب فيه ويكون ابتلاء علينا


اللي أبغى أوصل له .. طالما كانت هناك فرصه متاحه لي للتقديم ، وأنا تنطبق علي الشروط .. ليش ما أسعى ، والباقي نتوكل على الله .. اذا تسهلت الأمور كملنا واذا ماتسهلت فهي خيره
غلط إني أفوت الفرص وأقول الظروف ماتسمح
أنا درست ، وتعبت ، وتغربت بفترة البكالوريوس ، وتقدمت لوظيفه طرحت للجميع بنزاهه ، من غير غش ولا تلاعب ولاتدليس ، معلوماتي واضحه ووقع الاختيار علي ، ان كان ربي كتب لي أنقبل ، انقبلت ولا أخذت فرصة أحد ، واذا ما انقبلت أو حالت الظروف بيني وبين الدراسه ، انسحبت وبرضو ما أخذت فرصة أحد

أما اللي انقبلوا بغير التخصصات المطلوبه ، إما ينوبهم التعب ، يروحون يطابقون ويُرفضون ، أو تتسهل أمور المقابله وبكذا ماغشوا ولادلسوا بياناتهم ، لأنهم طابقوا وانقبلوا
وف الأخير كل شي بتوفيق من ربي