السلام عليكم ،،

اولا بخصوص عدد العماله اللي تكفي لبناء العماره حسب ماعرفت
2 حدادين 2 نجارين 1 بناء 1 عامل

المؤسسة اذا تقدر تخليها بأسم اختك وتكون وكيل عام أفضل ولكن أسال عن الانظمه اذا كان اسمها ينزل دايركت للتامينات تمام لانها صاحبة العمل.
حسب ماقريت في موقع وزارة العمل اذا أردت توظيف امرأه في قطاع المقاولات يكون مسمى الوظيفه ،، عن بُعد ،، ويشترط تكون جامعيه
فا تأكد بالاول قبل تطلع المؤسسة بأسمك وتفكر توظف اختك فيها إذا ماهي جامعيه.... هذا قريته بموقع وزارة العمل وتقدر تدخل وتقراه في نطاقات. ولا ادري وش النظام بالظبط

اذا تفكر تستخرج مؤسستين النظام يسمح ،، ولكن ماادري عن الانظمه بخصوص نقل العماله من مؤسسه لمؤسسه اخرى ممكن تاخذ وقت وممكن تكون مكلفه والله مااعلم عنها. ولازم تسال وتحسبها صح ممكن شراء التأشيره اوفر لك من هالحوسه الله اعلم.

بخصوص العماله مثل ما تفضلت الهند وباكستان هم الافضل ،،الباكستاني مااعلم عنه والهندي عيبه بس طايح يعني مايروح يدور شغل عكس المصري تلقاه في كل حتّه يدور الشغل.
اذا تقدر تلقئ نجار باكستاني معلم ويفهم عربي عشان يعرف يتفاهم مع الخلق يكون افضل.

انا بالنسبه لي اعمال الانشاء ،، نجارين ، حدادين ، بناء باخذ من مصر
وامور التشطيب الاخرى ،، لياسه ،، دهان ،، بلاط ،، كهرباء ،، سباكه وغيرها .. تكون للهند وباكستان

بالنسبه للراوتب أخي لاتتوهق في البدايه وتعطي رواتب ،، خل تعاملك معهم بالمتر
مثلا النجار له 40 ريال للمتر
والحداد 18 ريال للمتر
وعلى فكره السكن على حسابهم الخاص.
أنت قيّمها وأسال العماله كم ياخذون بالمتر وعطهم مثلهم او اقل بشي بسيط كونك مبتدأ وبعدها تزيد لهم.
والانصاف واجب والحق حق وانا اخوك

بالنسبه للخشب ممكن يكلف 70 ألف في البدايه

والاسعار الاخرى للمعدات ما اعلم عنها شي والله

الفتره اللي بتخلص فيها اجراءات المؤسسة أسال وابحث قد ما تقدر عندك مواقع التواصل الاجتماعي تلقى مهندسين كثير سعوددين وان شاءالله فيهم خير،، وانا استفدت من كم واحد منهم وشجعني كثير

بالتوفيق ياخوي