السلام عليكم و رحمة الله و بركاته الف الف الف مبروك القبول النهائي و عقبال ما نشوفكم وحوش بالميدان و اللي ما انقبل اقوله لا تيأس و ادع ربك و لا توقف قدم في كل مكان انا اخوكم خريج 1434 هـ عندي بعض النصائح و بعض النقاط و بعض الامور واجهتها و ودي ااقولكم عليها عشان تمر الدوره على خير *اولا احرص على صلاتك بتقول كل العالم تصلي !! انا اقولك فيه ناس تصلي لربها و فيها ناس تصلي بدون وضوء و عشان المدربين انت ما عليك منهم صل فرضك و ادع ربك و بتلقى وقت للسواليف و الضحك وكل شي *ثانيا حاول ختم المصحف تقدر ترا في خلال ال45 انا اعرف ناس ختموا المصحف و مهو شرط انه يكون مطوع او كذا بس منها انك تشغل وقتك بالطاعه و منها انك تبعد عن القيل و القال *ثالثا احرص على اغراضك و ممتلكاتك يعني فلوس او اغراض شخصية و من هالامور مثل ملابس او شامبو او مزيل عرق او امواس حلاقه تقريبا دولابك بشكل عام يوم تشتري بنطلون رياضة خيط مخبأ داخلي عن اقرب خياط تحط فيه فلوسك و اثباتك *رابعا مكان نومك حاول ترتبه تحت سريرك لا يصير فيه اوساخ و كذا لان اول ما تدخل بيعلومكم طريقة ربط الشرشف بالطراحه اللي تنام عليها و احرص انها تكون نظيفه دايم لان فيها تسجيل اسماء و جزا و طوابير اضافيه و توصل للحجز اخر الاسبوع *خامسا اخوياك و جيرانك بالغرفه انت بتنام طوووول مدة الدورة في غرفه فيها 30 او 28 سرير يعني حاول تكون خلوق و محترم معهم بتلقى نفسيات و بتلقى اللي مخربها و بتلقى اللي حاله بحال نفسه ولا له بأحد حتى ان اخطى عليك احد لا تنزل مستواك و ترد عليه و دور خوي مضبوط تتعاون معاه و يكون لكم دولاب واحد تحطون اغراضكم فيه و تكون حريص على اغراضة و اغراضك وهو نفس الشي احرص ان يكون دولابك دايم مقفل بالقفل *سادسا النظافة الشخصية و المستلزمات الخاصة بالدورة لا تشتري غير شرابات اصليه و ابوات رياضة اصليه و مهو لازم ابيض سادة بس يكون اللون الغالب ابيض (ديداس او لوتوس او نايك) هذي افضل الانواع صحيح غالية لكن هي لراحتك في النهاية و اشتري من الصيدليه مرهم عضلات و مضاد حيوي و بندول و دوا كحه و دوا سخونه و لصق جروح و اشتري دعسة طبية من الصيدليه تجي على مقاس رجولك < تنفعك بالثبوت و الهروله لأنك طووول اليوم تكون لابس البوت الرياضي واشتري من بنده او اسواق العثيم حلاوة فيكس بالكرز اسمها هولز تغنيك عن العطش و برادة الموية لأن زحححمه موت و ناس تتكسر اسنانها من التدافع و كذا هذا ان لحقت تشرب!! اشتري ملابسك الداخليه تكون نوعيتها جيده و قطن و حاول تاخذ اكبر من مقاسك بشوي عشان ترتاح خل استحمامك بشكل يومي وتصيد الاوقات اللي تكون فيها دورات المياه فاضية (الظهر افضل وقت) لا تتكاسل انك تتروش او تقول مرتين بالاسبوع او كذا لأن دايم بتعرق و دايم بتهرول و دايم بتتمرن و ممكن يجيك جزا او شي و تصير امورك محيوسه احرص على النظافه و ما عليك بغيرك الا لو انه يجهل علمه لان فيه ناس ما تدري ليه يستخدم مزيل عرق او كذا و بخصوص ريحة البوت الرياضي او البسطار عندي الحل فواحة بالكرز شكل العلبه زي علبة التونه تلقاها في محل زينة السيارات هي ثلاث قطع كبيره تكفيك شهر انت و اخوياك تاخذ منها شوي شي لا يذكر و تنثره داخل البوت و البس و ترا بتقعد ريحة الكرز في البوت او البسطار اسبوع كامل طبعا اول ما تفك البوت او البسطار تغسل رجولك بصابون و افضل شي لكل يوم او يومين شراب جديد *سابعا المدربين خل تعاملك معاه رسمي جدا و على قد غرضك يعني لا تحتك فيهم كثير لا تعطيه وجه يعني لأن يوم خويك و يوم يجازيك و يوم يتملعن عليك و الجزا لا تنفذ بشكل صحيح عشان لا تتعب لا تعصي على مدرب مهما كان الوضع لا تبين للمدرب انك تعبت لأنه بيكرفك لين يطيح راسك ينقهر المدرب اكثر لو كان فيها جزا و شافك نشيط *ثامنا خلك منضبط ولا عليك الا من نفسك و المدرب لا يعرف اسمك ابد يعني لا تصير مبزوط خلك ذيب<<<<<< ولا تسوي راعي فزعات و تشيلها عن الفصيل او اي مجموعه لو فيها جزا او شي ترا هم اللي بيرتاحوا و يتركونك ما يباكلها غيرك ما اقولك لا تتعاون معهم بالعكس خلك معهم و كذا بس الشي اللي فيه خطر عليك لا تسويه ابد و اماكن تجمعات دخان و غيره ابعد عنها حتى لو انك الله مبتليك بالدخان دخن لحالك عشان ما يتكون مع مجموعه و تنصاد و انت تدخن او ما تدخن الشر يعم و الخير يخص و للمعلومية ترا فيه جزا بال45 بس مهو بالبداية و فيها تأخير يوم او يومين بعد ال45 يعني اخوياك يطلعوا 10 ايام وانت تتأخر و كلها جزا و ملعنه و لعب نفسيات *تاسعا التدريب العسكري لا تشد على نفسك سواء في مشاه او استعداد و استراحه او هروله يقولك المدرب ابي غبار الميدان يطلع ما علك منه لان انت اللي بتشوف ضررها اخر الليل و اليوم اللي بعده ولا تصير دايم بالواجهه ولا بالاخير خلك بالوسط في كل شي طبعا هذي اجتهادات مني وان اخطيك ارجوا المعذرة و ان بغيتوا شي تحت امركم و انشالله بأكون متواجد بالمنتدى بشكل شبه يومي منقــــــــــــــــــــــــــــــــــــــــول للافاده