اهليييييييين ياشباب .. هذة تجربة احد الشباب ترشح للمقابلة الشخصية العام الماضي 2012 يشرح فيها وش صار معاه في القابلة الشخصية .
بالنسبة للمقابلة الشخصية في الخطوط السعودية زي ما قال الاخ روامس تحلو بالثقة لأنها مربكة فعلاً .. لأنك تعرف ان مصيرك في الوظيفة يتوقف على هذا المكان واللي راح يصير فيه ..
المقابلة الشخصية تكون باللغة الانجليزية في بعض الاسئلة البسيطة فقط
وبعد كدا باللغة العربية يجيك الشغل الصعب.. اغلب الاسئلة استفزازية..
مثلاً انا افتكر بعض الاسئلة كالتالي..
انتا تعرف انك جرسوون!! انا ايوة اعرف اني جرسون
طيب منت خجلان من الوظيفة ؟؟ انا لا ماني خجلان ..
طيب ايش اللي يخليك ماتخجل من وظيفة زي دي؟؟ انا راح اخجل لما اكون زي اغلب الشباب عمري 20 سنة واروح عند الوالد واقلو اعطيني 50 ريال بطلع مع الشباب .. هوا ( سكوت وابتسامة ) ..
طيب لو رحت بتتزوج وقالو مانزوج مضيفين ايش تسوي ..؟ قلت اروح بيت تاني يقدرو الرجال الي يبغى الحلال..
قال ولو رفضوك؟؟ قلت بروح بيت تاني..
قال رفضوك ( وعبس بوجهه ) قلت مراح يرفضوني ( ابتسامة )
قال ايش الثقة دي ؟؟ قلت لأن البنات صارو يعرضو على الرجال الزواج دي الايام
هو ( هههههههههههههههههههههه ) طيب وسكت..
هوا ايش حتسوي في حالات الطوارئ؟؟ انا راح اتصرف حسب ماتدربوني عليه !!
هوا مراح ترتبك ؟؟ انا لأ
هوا ليييش؟
انا لأني بارد
هوا ( هههههههههههههههههههههه ) تستخف دمك صح ؟؟
انا ( خفففففت ) قلت لا والله من جد اكلمك ..
طيب انتا متخرج في اول 2002 فينك السنتين دي جالس تصيع طبعا صح؟؟
انا لأ اشتغلت في شركة وفي البنك الأهلي بس ماشفت نفسي في ذيك الوظايف
ليش؟؟ لأني ادور على تطوير الذات بعكس مالديهم شغل روتيني وكل يوم نفس الاوراق تروح وتيجي!!

طبعا الاسئلة كثيرة الي سئلني اياها بس ماني فاكر..
بعدين قلي ادا نجحت راح نتصل فيك الله معاك..
انا قمت وسلمت عليهم وقلتلهم اتمنى فعلا اكون واحد من المقبولين ومراح تندمو..
هما طيب مع السلامة وخرجت بثقة وابتسامة..
المقابلة الشخصية يوم الثلاثاء..
يوم الاحد اتصلو قالولي مبروك ..

منقول ياشباب من منتدى بس حبيت اكتبها للفائدة وشكرا لكم
الله يوفق الجميع