السلام عليكم ورحمة الله
انا أم لطفلين مطلقه من 6 سنوات عانيت كثير في حياتي أهلي بعد طﻻقي رفضو حضانتي لعيالي لأنهم محاربين زوجي واهله وقالو مانبي نكافئهم ونربي عيالهم ولكن انا اصريت على حضانتهم لأن محد لهم بلدنيا غيري وابوهم مريض نفسي ومدمن خمر وغيرمتزوج وجدتهم ام ابوهم تحبهم كثير بس هي عجوز عمرها فوق ال75 .
اخذت صك حضانه ونفقه من المحكمه وحطيت أهلي قدام الامر الواقع كنت اظن بكذه يسلمون للامر ويرضخون لكنهم شافو اللي سويته تحدي لهم ولوي ذراع
حاربوني وحاربو عيالي الصغار وصعبو علينا الحياة كانو يصرخون على عيالي ويطردونهم ويمنعونهم حتى اﻻكل والمويه وربي يشهد على كلامي حتى الدش والتلفزيون انحرمنا منه.
بعد الضغط الشديد وكثرة اهانة امي واخواتي لاطفالي طردو اطفالي من البيت وبقيت طريحة الفراش ابكي وانام ﻻ استطيع التفكير بشيء اﻻ اطفالي وكيف يستطيعون تدبير امورهم بدوني .. كان أبني بلصف اﻻول الابتدائي
وابنتي بلصف الثالث وكان تواصلي الوحيد معهم عبر الجوال اتصل اسئل عليهم فيبكون ويترجاني طفلي ان يأتي وآخذه وتضيق فيني الدنيا وابكي
ساءت حالتنا النفسيه وطلبت المساعده والاستشاره من جمعية حقوق الانسان طلبو مني اكتب على ورق وضعي وحالتي وﻻ وعدوني بشي وقدمت معروض للاماره فوقت اﻻمير محمد بن فهد وﻻ لقيت اي مساعده.

اصبت بتعب نفسي شديد انعزلت بغرفتي ﻻ اطلع وﻻ احد يجيني أنعزلت عن المجتمع بس افكر في حل لمشكلتي وفجأه بديت اشوف اشياء مثل الخيوط تطلع من تحت اظافري بديت اخاف من يديني ورجليني صرت اعقمهم بديتول واقص اظافري وانقع رجليني بمحلول غسول طبي والبس شرابات وطول الوقت امسح يديني بمناديل ديتول وطلعت اشوفلي علاج رحت 5 اطباء الله وكيلكم كلهم اتفقو على كلمه وحده اللي يقول انتي الئانه؟ والثاني انتي عندك مشكله؟ واللي يقول انتي خايفه من حاجه؟ قلت هذول فاشلين ودخلت على اكبر استشاري الجلديه في المانع قال مفيش حاجه بتطلع من الاظافر !
قلت له خذني على قد عقلي يادكتور وسويلي تحاليل!
قال ﻻحول وﻻقوة اﻻ بلله يابنتي انتي عندك قلق .. قلت له ليه تقول كذه يادكتور ؟ وصرت ابكي
قال انتي عقلك تعب من التفكير في حل لمشكله مالقى لها حل فعقلك الباطن خلاك تتخيلين مرض وتعالجيه عشان يصرف تفكيرك عن المشكله اللي شغلتي فكرك فيها.
ويشهد رب العالمين محد في بيت ابوي شال همي وﻻ كسرت خاطرهم بلعكس صارو يضحكون علي ويقولون فيها وسواس !
وصف لي دواء سيبرلكس وتدهورت نفسيتي اكثر حسيت مع الدوا بخدر كني ونا صاحيه فحلم حاربوني اخواتي وامي لدرجة مقاطعتي وصارو حزب ضدي لايكلموني وﻻيردون علي وﻻحتى ياكلون معاي قطعو عني المصروف يقولون مالك حاجة وانتي ماتطلعين وش له المصروف!!

كل هذا لاني بس طلبت حق حضانتي لعيالي ضاق علي بيت ابوي صار مثل القبر والعالم تغبطنا على كبر البيت! على 3 شوارع يطرد فيه الخيل.
طلبت المساعده من الاقارب ولم تفلح الوساطه ولم تشفع دموعي ورجواي تحت اقدام امي..
قلت لها مابي شي فحياتي ﻻ رجال وﻻمصروف ابي بس عيالي ابوهم بينفق عليهم. هزت لي كتوفها تقول كيفي ابي ارتاح فبيتي وانا مرهه مريضه وكبيره مابي على اخر عمري بزران ينفخون راسي.
انعزلت عن المجتمع والعالم سنه كامله بس انام وآكل فغرفتي ولدي نجحوه غصب ﻻحد يذاكر له وﻻ يعرف يكتب متصل علي المدرس يقول ولدك يتبول على نفسه بس يبكي ويقول أبي امي والبنت مدرستها تقول انها دائما سرحانه وتنسى!

شكيت همومي لعمتي فعرضت علي اعيش عندها مع عيالي هي مطلقه وعندها بنت وألحت علي كثير فأستخرت الله واخذت عيالي وسكنا عندها سواق اهلي وصلنا وارتحنا مدة سنه اقسم بلله ماحد من اهلي فكر يرفع علي سماعه يسئلون عني كأنهم يبغون الفكه وأوفر لهم مصروفي وغرفه في البيت!
بعد سنه تركتني عمتي و تزوجت وقامت بشرح وضعي لعمي فعرض علي عمي اللي اكبر من ابوي السكن عنده مع اطفالي بعد استنكاره لافعال اهلي..

كان قدر رب العالمين ان يكون عمي الذي ظننته المنقذ الرحيم والسند والظهر والستر للاسف كان شيطان رجيم منحرف مريض وحقير مدمن خمر واستغل ضعفي وموقفي وحاجتي له

فهتك عرضي وحاول اغتصابي الحقير كنت اصرخ حرام حرام خاف الله انا بنت اخوك ياعمي
يقول ﻻتقولين عمي قولي حبيبي انا أولى من الغريب انا بأريحك!! ...
وقال كلام اقسم بلله استحي اقوله لكم

هربت منه وقدمت بلاغ لدار الحمايه و رفعت عليه قضيه في الشرطه وعلمت طليقي بو عيالي وانتقلت للسكن عند عجوزي جدة اطفالي وللاسف صدمني موقف عائلتي طالبتني واعمامي باسقاط التهم عنه والتنازل عنه بأسرع وقت خوفا من الفضيحه
كان موقف ابوي الاكثر صدمة لي كلمني على جوالي كنت بظن ينوجع قلبه علي وبيواسيني كنت احسبه بيحس بندم انه خلاني اطلع من بيته سنتين ماسأل عني وﻻ فكر انا حيه ميته مافكر يمد او يرسل لي ريال!!
صدمني طلب تنازلي عن اخوه وحملني الذنب وهددني قال ان ماتنازلتي بحطك مكانه!!
وقال روحي غيري اقوالك قولي كنتي واهمه قولي اي شي المهم يطلع!!
انتي وحده مشروخ مخها مجنونه مكانك المستشفى! روحي تنازلي وبعدها تعالي نوديك المستشفى تتعالجين نفسيا

قلتله ليه تبون تقولون عني مجنونه؟
قال عشان وجهنا قدام الناس والمجتمع لو ماسوينا كذه محد بيتقبلنا ويقاطعونا كيف اقابل الناس واطالع عيونهم انتي فضحتينا

بكيت كثير وحالتي من سيئ الى اسوأ أستخرت الله وذهبت الى هيئة التحقيق والادعاء وتنازلت مرغمة خوفا من غضب والدي علي ومن ثم غضب الله..
بعدها رفضت انهم يلصقون فيني الجنون ثمن لرجعتي لبيت ابوي
فسكنت انا واطفالي في شقه أمنها لي اهل طليقي لان اهلي مايبغوني ارجع للبيت يبغون ينسون اللي صار لي وخافو من تأثيري على خواتي !!

زارتني أختي مره واحده مو شوق وحب ﻻ.. ارسلها لي ابوي ليتأكد اني فعلا تنازلت عن اخوه وتتأكد اني ماعلمت احد من خوالي وخالاتي عن اللي حصل فيني ..
ولم يتواصل معي بعدها 3 سنوات اي فرد من عائلتي وﻻ ابي وﻻ اخواتي ولم يسألو عن وضعي وحالي نفسيتي تدهورت كثير وصرت اكره الرجال تعقدت ما أثق بأي رجال ومنعزله وﻻ شي يربطني بلعالم الخارجي اﻻ التلفزيون والانترنت وﻻ لي معيل في الحياه اﻻ بطاقة الضمان 860 ريال وهي اﻻن مرهونه فمحل تقسيط واعيش على مساعدة عجوزي ام طليقي.

ويشهد الله على وضعي وﻻ اقول اﻻ الحمد لله على كل قضاءه وجميع قدره حمد الرضا بحكمه ليقيني بحكمته وكلما ضاقت لجأت لكتاب الله يزيل عن صدري ثقل همي.
تعبي النفسي اثر على صحة بدني واصبت بضمور عضلات وخدر مستمر ﻻطرافي واغلب الوقت ملازمة السرير كأني عاجزه معاقه منعتني صحتي من الاستمرار فأي وظيفه..
محتاجة لإعادة تأهيل محتاجه علاج مكثف ابي احس بلصحه والعافيه نفسي اغسل قلبي فبيت الله وحشتني مكه
اسئل اهل الخير مساعدتي بأي شي وان يكسبو فيني وباطفالي الثواب واﻻجر ويفرج عنهم كروب الدنيا واﻻخره ..انا محتاجه ارجع قويه واعتمد على نفسي واوقف على رجليني واتوظف واعيل نفسي وعيالي ﻻتبخلو علي بدعاكم ان الله يدفع عني وعنكم البلا