وعليكم السلام ورحمة الله وبركاته

اولا اخوي تأكد أن الاستيراد فيه خير كبير بعد توفيق الله واختيار البضاعه المميزه والنادره في السوق وسعرها مناسب مثلا ماتروح تستورد كماليات من الصين وتتورط فيها لأن السوق عندنا متشبع منها وفيه هوامير في الشغله من زمان

وانا بخبرتي بفيدك ان شاء الله باللي تحتاجه من الالف للياء باللي اقدر عليه

بالنسبه للشروط والطلبات تحتاج فقط لسجل تجاري موجود في النشاط البضاعه اللي بتستوردها وهذي سهله تقدر تطلعها في يومين عن طريق النت ويوصلك السجل لبيتك وتقدر تحط في سجل واحد جميع البضايع اللي تفكر انك تستوردها مثلا .. ملابس واحذيه و مواد غذائيه و منظفات وادوات كهربائيه ...الخ قيمة السجل 200 ريال للسنه واشتراك الغرفة التجارية 300 للسنة

الطريقة الشركة او التاجر اللي بتشتري منه البضاعه خارج المملكة تعطيه صوره من سجلك ويقيد جميع الفواتير وشهادة المنشأ باسم مؤسستك اذا وصلت الميناء في السعوديه تفوض مكتب تخليص جمركي (والتفويض يكون بورقه يعطيك اياها المخلص وتختمها وتوقعها وتصدقها من الغرفة التجارية فقط ) بعدها هو يتولى جميع الامور حتى تطلع البضاعة من الميناء ويرسلها للمدينة اللي أنت فيها (اذا كانت البضاعه عن طريق ميناء الدمام تقدر تستلمها في الميناء الجاف بالرياض تحول عن طريق القطار ب 350 ريال تقريبا) قيمة التخليص الجمركي من 300 إلى 600 ريال هذي رسوم المكتب اللي يخلص لك غير رسوم الجمارك

اما بقية الاسئله فموضوعك متشعب لأن فيه بضايع معفيه من رسوم الجمارك وفيه بضايع رسومها 5% وبعضها 10% وبعضها 15% واذا حبيت تطلع عليها فيه كتاب صادر من الجمارك اسمه التعرفة الجمركيه قيمته 90 ريال موجود فيه جميع البضايع وكم رسوم الجمرك

اما الدول اللي مسموح الاستيراد منها فهذا بحسب البضايع ايضاً مثلا دول اوروبا مسموح الاستيراد منها غير لحوم البقر محظور حدد بضاعتك والدوله علشان يسهل عليك البحث

بالنسبه للمواصفات والمقاييس لازم تحطها اهم نقطه لأن وزارة التجارة مشدده بشكل غير طبيعي على المواصفات وياكثر الحاويات اللي اتلفت لهذا السبب

المواد الغذائية انتبه تستورد الا بعد ماتشيك مع هيئة الغذاء والدواء لانهم يفحصون المواد الغذائية ومشددين عليها ومنزلين قرار قبل شهر تقريبا انك لازم تفصح عن بضاعتك بارسال اسم المنتج المستورد ومكوناته لهم قبل وصول البضاعه

اتمنى لك التوفيق