اقتباس:
المشاركة الأصلية كتبت بواسطة ايفوني خربان
اذكر الله واستهدي بالرحمن واحمد ربك عندك ابو الله يطول بعمره ترى انت معقد حياتك بنفسك ومكبر الامور كمل دراستك وبعدها بتتوظف ان شاءالله وبتتغير حياتك صبرت ع كلامك من كنت ب 4 ابتدائي راح الكثير مابقى الاقليل وترى اغلب مراهقين نفس كلامك اذا تحس بكتئاب قل لامك ورح عند دكتور نفسي مع اني احس وضعك عادي انت مكبر الامور اشغل نفسك بوقت فراغ بالمذاكره ولاتقارن بينك وبين الناس واهم شي صلاة
|
صحيح انت اللي معقد حياتك بتفكيرك .. ابوك يبيك تروح للعزايم والرجاجيل عاااادي كل الرجال كذا مع عيالهم ابوك يهاوش عاللبس عااادي جدا كلهم كذا
بعدين روحتك للعزايم والرجال تفيدك تعلمك مع الوقت مستحيل ماتطلع بفايده وبنفس الوقت انبسط مع الناس ليه تحسب الوناسه كلها في الفرفره في الاسواق وحركات المراهقين
بعدين اذا عاللبس ترى ماراح تموت اذا مالبست بنطلون ليش مكبر السالفه
المشكله في تفكيرك ابوك مثل اي واحد يبي يشوف عياله احسن ناس والدليل يبيك تشتغل في ارامكو الله يكثر خيره غيرك ابوه يحطه عند الابل والغنم يكرف الى نص الليل ماقال شي
فكر بنفسك انت وش تبي من الحياه تبي حياتك تكون احسن او اسوأ
تفكيرك سلبي وبيؤدي بك الى مشاكل انت في غنى عنها
تفكيرك انفعالي مندفع شايف كل شي اسود مافيه نقطه بياض في حياتك؟؟؟ اقلها امك وابوك عايشين فيه ناس عاشوا ايتام عند عمام او خوال وكلن متوليهم ومسوينهم خدم والحين صاروا رجال واعتمدوا على انفسهم وسوو اللي يبون
يمكن ابوك لما يقسى عليك هو بتفكيره يبيك تصير رجال ماتصير معتمد عليه بكل شي
بعدين توك في الثانوي ومحسسني ان الدنيا طارت عنك وصار عمرك 80 سنه توك بدري اذا الله كاتب لك عمر فالحياة طويله بتسوي اللي تبي وتمل بعد
اهم شي اهتم بدراستك لانها ضمان مستقبلك بعد الله عالاقل هات الثانويه بمعدل زين عشان اذا قدمت على وظيفه يقبلونك ..
غير تفكيرك السلبي عشان تتغير حياتك مافيه احد عايش حياة كامله ناس كثيره قدامك مبسوطين وهم الله اعلم بحالهم بس لازم التفاؤل
كذا كذا ماانت مرتاح ليه تزيدها بهالتفكير ... " ان الله لايغير مافي قوم حتى يغيروا مافي انفسهم "