[align=center]بسم الله والحمد لله ولاحول ولا قوة إلا بالله وبه نستعين

جتني يا اخوان رسائل كثيرة في الواتس اب والايميل لأشخاص اتوقع لهم إن شاء الله نجاح باهر إذا

هم شدوا حيلهم شوي ومشوا على الطريق الصحيح....

رسائل مليئة بالحماس وروح الشباب والرغبة في وضع اسمائهم على الخارطة التجارية ولكن


ليسمحوا لي بالتعقيب حولها وراح اتكلم بشكل عام مفصل مبسط بدون تعقيد أو تحطيم  وبالله


نستعين

اغلب الرسائل إلي تجيني يا اخوان تلقى اصحابها مندفعين لفكرة تجارية معينة مثل (ملابس,


ديكورات , اكسسوارات). .. وغيرها وإذا سألتها درست الموضوع....سويت دراسة..... بحثت......


قريت...... مارست الشغلة...... جلست مع احد روادها وممارسيها ؟؟؟ قالك لا والله بس انا متحمس ؟؟؟

متحمس هذي يا اخوان كلمة جميلة مليئة بالمعاني والطموح بس هل هي كافية؟؟


بعضهم يقول ياخي ماعليك خلني اجرب لم يولد العالم عالم... والخبرة تجي مع الوقت

وانا اقولك انا معك واشجعك وأيد كلامك ورح شق طريقك..... لكن فكر معي


ليش ما اصير انا ذكي واقلل اخطائي وخسائري

؟؟؟؟؟

كيف مافهمت

اقولك كيف ( كل تجارة لها مفاتيح وابواب ومداخل ومخارج ومشاكل وحلول وتكاليف وخساير وارباح)


إذا رقم واحد (دراسة جدوى) يجيني واحد ياخي كيف دراسة جدوى الكلمة هذا عقدتني صعبة مره

دراسة الجدوى معناتها حساب تكاليف مشروع من جميع الجوانب


اضرب لي مثل
انا قررت افتح مغسلة ملابس اجي اسوي دراسة ماتاخذ يومين


1- تكلفة إيجار المحل (احسبه شهري) (30,000 الف رقم تخيلي)


2- راتب العامل ( احسبه شهري) (1500 شهريا رقم تخيلي)


3- قيمة المعدات ( الة الكوي والمغاسل الاتوماتيكية والديكور و....... وغيرها) (70 الف رقم تخيلي)
تروح سلمك الله تقول 1+2+3= 100,000 يعني المحل كلفك حول مية الف


تجي تقسم ايجار المحل شهريا يكلفك


1- ايجار المحل (30,000 /12) = 2500 شهريا


2- راتب العامل 1500 شهرياً


1+2 = 4000 إذا المحل يدخل فوق اربعة انا كسبان إذا اقل انا خسران


إذا المحل دخله مثلا 10000 الاف صافي يعني 100,000 تكلفت المحل الاجمالية / 10000 الربح


الشهري = 10 معناتها دورة المال عندي ممتازة خلال 10 شهور رجعت راس مالي
قفلنا دراسة الجدوى


(لمحة سريعة مهم جدا الاطلاع على دورة المال للمشروع وهي غير ثابتة مثلا دورة المال للعقار ( عمارة مثلا) 10% إذا كانت ناجحة مره معناتها استرداد راس المال بعد عشر سنين 100/10 = 10


مغسلة ملابس ناجحة 100% سنويا معناتها 100/100=1 يعني رجعت راس مالي في سنة (مشروع جدا متميز) وهكذا

• سؤال وش مفاتيح المهنة هذي واسرارها؟


سجل عندك جاك سواق الوزير وقالك بالله اكوي لي ال 20 ثوب هذي وطبعا محلك في حي حطين وإيجاره السنوي 50 الف


وجاك مواطن على قد حاله في حي السويدي وقالك بالله اكوي لي ال 20 ثوب وإيجار المحل كان 10 الاف

تسعيرة الكوي والغسيل وحده لو انك على حدود المملكة معناتها محل السويدي يكسب 5 اضعاف محل حطين لأن الاسعار ثابتة والايجار متغير


فقيمة كوي الثياب الي بالسويدي اخذت منها مثلا بس 10% قيمة ايجار وراتب عامل والباقي ربح يعني تبقى لك 90%


بينما محل حطين اخذ منك 50% من قيمة كوي الملابس كإيجار وعامل راتب وتبقى لك 50% بس
وهذا مثال سريع

الدراسة قبل التفكير بالمشروع اساسية يا اخوان

جتني رسائل كثيرة تقول بالله ابي اجيب ملابس من الصين وابيعها هنا اقوله تعرف الشغلة تعرف الموديلات والاسعار عندك محل كيف بتصرف قال لا


هل بضاعتك مميزة وش يجيبني لك واختارك هل انت فاتح محل في قرية او مدينة صغيرة مافيها مركز الهرم او اسواق شعبية جميلة مثل العويس وطيبة والمجد ؟؟؟؟


تجي وحده وتقول بجيب قمصان روز اقولك برافو بس هل درستي الموضوع زين كم سعر المفرد والجملة هل رحتي مركز الجملة في المرقب وعرفتي درزن الوطني بكم والصيني بكم ؟؟؟؟ وهل


الخامات زي بعض

سؤال ثاني هل اعرف اجراءات الاستيراد وشروطها ولا اهز راسي مشينا نجيب بضاعة؟؟؟؟


رح للجمارك والمخلصين الجمركيين وقلهم وش الي مسموح والي موب مسموح


اعرف واحد من كبار تجار الصين رفضوا يدخلون بضاعته لان نسبة القطن في المختبر طلعت 67%

ومكتوب على القميص من المصنع نسبة القطن 68% الفرق واحد الان قاموا يشددون وزارة التجارة والجمارك ,والرجال بضاعته سليمة بس يمكن المختبرات بره احدث من هنا او شي من هذا القبيل

التجارة سهلة وجميلة بس لازم بعد انت تكون مفتح ومصحصح وتدري وش يدور حولك

يكتفى اليوم بهذا القدر ولي وقفة في الغد إن شاء الله مع فائدة ولمحة جديدة
[/align]