السلام عليكم ..
العـين عن حلو الكرى موقها تاب = ماتذوق حلو النوم مع ذايقينه
اسباب لانه ماش شي ٍ بلا أسباب = هكا الغزال اللي ذبحني بزينه
مر يتخطا .. ويتلفلف بالاسلاب = وطيّر عن القلب المشقا يقينه
من نظرته وقع على القلب مضراب = اشد وقع من الرماح السنينه
يسرق نظر عينه حذر .. مدري عجاب = وانا منه قلبي تقطع وتينه
عرّض ومن تعريضته خافقي ذاب = وقمت اتبعه مغير عيني بعينه
واقفى عجل من نظرتي فيه مرتاب = ويحط ضول الناس بيني وبينه
وصديت عنه وخاطري منه ماطاب = كني ماني يمه .. وانا اقول وينه
اخاف يفطن لي .. وننشب بالانشاب = السوق زحمه .. ولاوادم ذهينه
واخذت عنه شوي مقفي .. والاعصاب = متوتره .. مافكرت بتهوينه
ولديت .. ولينه يسعر يالاطياب = عند الهنود اللي لغتهم رطينه
وارسلت يمه نظرة احباب لحباب = النظره اللي ماتركت لي غبينه
وأقبل يبا يحطني عنه مجناب = وشكيت في ممشاه .. على هوينه
ناظرت فيه .. وضحك الناب للناب = ومن ضحكته حلت علي السكينه
وموه على اهل السوق .. واشر بالاهداب= اشارة ٍ تبغى قلوب ٍ فطينه
منها عرفت انه يبا يعود لو غاب = وان الامر ماعاد هو في يدينه
وعقب غلاق اسبوع .. مر ومعه جاب = صغيّر ٍ متجود ٍ في يمينه
صغيّر ٍ بالزين للعقل نهاب = يقول اخوي .. ومقصده فاهمينه
قصده .. يقول انكان عندك أستيعاب = على من هذا ؟؟ ملامح وعينه
واخذت انا وياه .. مزح وتعجاب = عقله رزين .. وكل كلمه رزينه
في موقع ٍ عنه المخاليق غياب = الا ملائكة العمل حاضرينه
بيني وبينه ماوقف غير الاداب = آداب سلم ٍ كلنا وارثينه
منه حترام شعور عربين الانساب = ومنه حترام الرجل نفسه .. ودينه
وبغى الوكاد .. وقلت هايم ومنصاب = حبك .. ذبحني لعنبو والدينه
قال استميحك عذر .. واقول لعاب = وش هالغـرام اللي غدابك بحينه
وحلفت له .. واقسمت في رب الارباب= منقذ من الطوفان راع السفينه
اني معك صادق ولاني بكذاب = والكاذب الله لايطول سنينه
قال انت صادق .. مير سابقك خطاب = واهلي في تال الشهر موعدينه
كم له وهو مغير ذهاب إياب = لاهم براضينه .. ولا رافضينه
وان كانها تمت على يدين كتاب= وتم القران .. وروحو كاتبينه
انا تراي ابي اعتبرك من الاقراب= وعلى النقا .. تبقا صلتنا متينه
وودع وصارت كلمته تقل مشهاب = اركت على كبدي (عراقي مزينه )
وبقيت في وضع ٍ تحير ابه الاطباب = ايست منه وحالة الياس شينه
واخذت وقت احسب ايامه حساب= وقلبي على شوفه تزايد حنينه
احيان .. اقول انشد عنه بعض الاصحاب = ويجيك بالعلم الموكد ( جهينه)
واحيان اقول اصبر على جور الاتعاب = ورزق الفتى وأجله كتب في جبينه
وسكت .. ماودي عليه افتح ابواب = للهرج من ناس ٍ ماهم راحمينه
وصبرت .. مير الصبر طول ولاثاب = ومن طال صبره يالله انك تعينه
ويوم ان راسي من طويل الصبر شاب = قررت عنه انشد حدا مجاورينه
ونشدت عنه وقال راحوبه أجناب = ومن قريته شدّ .. وسكن بالمدينه
قلت ايه .. مادام اهله عندنا يجاب = اما بعيد الفطر .. والا حتينه
قال اهله معه رحلو .. قلت ياشاب = يعني لازايركم .. ولازايرينه
قال ايه .. مير انسه والايام هراب = تطول .. وتنسي ضنين ٍ ضنينه
قبلي .. وقبلك خلت اصحابنا حزاب = وكم فرقت بين الخدين .. وخدينه
ماعاد في شوفه طلايب .. وطلاب = ترى ماعاد الا يدرج جنينه
وش تطلبه .. وحباله بكف قضاب = احذر .. لاينصب لك زمانك كمينه
قلت الرجال مفتلة روس الاشناب = لقسى الظروف حسابهم حاسبينه
وقفيت من عنده على الغلب .. غلاب = اكن غيض القلب .. واجحد ونينه
واعلنت ياسي .. وانطوت صفحة كتاب = من البدايه للنهايه حزينه
واقول يالله لاتبارك بالاسباب = اللي رمتني بين حبه .. وبينه
لافي بن حمود الغيدااني