السلام عليكم
انا بقولكم اللي صار من واقع تجربتي
انا صار لي خريجه من تقريبا ٣سنوات ونص او نقول اربع
طبعا حالي حالكم مابقى مدرسه اهليه ماطبيتها وقدمت اوراقي
لمدارس كثييير بس طبعا الاغلب يقول لك حطي بياناتك واذا احتجنا
كلمناك وانا ع نياتي تنتهي السنة وانا انتظر الاتصال وكل سنة هكذا
لين ايقنت ان هالكلمة تسكيت وان الوظايف (لاقاربهم والاجانب وراعين
الواسطات) طبعا انا ماعمم عالكل بس صاار ناااااادر تلقين احد يوظف
احد كذا لازم السالفه فيها إنّ
سبحان الله العام ربي كتب لي وظيفه بمدرسه توها فاتحه وهذا من سوء
حظي الراتب مو موارد والاسوء الشغل جديد علي والادهى والأمر الادارة سييييييييييئة
بمعنى الكلمة والمديره اسم بس ظالمه وربي وماعندها دبرة ووجودها وعدمه واحد
لأ وهذا وهي موظفه مثل باقي الموظفات يعني اكتشفت ان المدرسة مو لها!!!!
والله يابنات ماتسوي شي بس تجي تاكل وتشرب وتلقي شغلها على الوكيله وتطلع
المهم بالاخير مرمطتني و بهدلتني وبس تصارخ علي وشهر ونص وفصلتني بدون
سبب والراتب ماعطوني كامل!!
بس هالانسانه وكلت امرها لله حسبي الله ونعم الوكيل فيها والله لايوفقها لادنيا ولا اخره ولا يحللها
لان هاللي قلته لكم شي من لاشيء لانها سوت سوايا فيني ماتتسوى قطاعه الارزاق! وكل ماتذكرت راح ادعي عليها
المهم بدت هالسنة الجديدة هذي وبدا مشوار البحث عن وظيفه بالمدارس الاهليه من جديد تخيلوا
في مدارس يخلوني اشرح وكل شي وخلاص احس كني بوقع عقدي بالاخير يتشاورون ويقولون لك
بنخلي رقمك عندنا اذا بغيناك اتصلنا اجل ليه قلتوا لي تعالي من الاول ومشوار ماني من الدمام والسواق
بالدين، اخر مدرسه امس مو بس مقابله والقاء درس لأ امتحنوني عالورق اول وجبت علامه كويسه وبالاخير وبعد المقابله والدرس هذا ردهم لي تخيلوا ي بنات!!!
انا مجبورة ع المدارس والله ولا انا ماحبهم بس ولي امري رافض اشتغل باي مكان الا المدارس
ومن بعد تجاربي مع المدارس قررت اقفل ع موضوعهم وماعاد اقدم عليهم ولا راح انتظرهم
رزقنا على الله مو عليهم
وقررت :
اني اشوف رزقي بنفسي مو لازم انتظر اي جهة عمل حسيت اني ساذجه وانا انتظر المدارس
يعني يابنات اللي مثلي ع نياتها وتنتظر المدارس يدقون عليها انصحها من قلب اخت لاختها
لاتنتظرينهم انطلقي وشوفي رزقك بنفسك اذا عندك ابداعات ومواهب شغليها مثل الخط والرسم كثير
بتستفيدين من المدارس اذا عندك موهبة الخياطه وفري اله وخيطي ابدأي بالبسيط ثم الصعب فالاصعب
او اي موهبة ثانيه سوي حساب انستقرام واشتغلي بنفسك اذا عندك راس مال وشاطره بالتجاره استوردي
بضائع وتاجري فيها
هذي تجربتي ادري قلت قصة حياتي بس ماقررت اقولها الا يوم نويت امس يكون اخر يوم للتقديم
عالمدارس قلت خلاص ماعاد بقدم واتعب نفسي وابيكم تستفيدون من افكاري اللي طرحتها عليكم بالاخير
دعواتكم لي بالشفاء وتسخير الزوج والرزق الحلال المبارك