المشاركة الأصلية كتبت بواسطة ستفرج باذن الله

شوفيلك شخص ثقه من محارمك ويكون امين يزبط امورك ويفكر فمشروعك لقدام سواء ملعب او استراحه ....

الملعب >>> محتاجه شخص يدير اموره ولازم يكون متفرغ يتفقده دايم ويعرف ايش متطلبات الشباب وايش يجذبهم ويعمل صيانه دوريه للملعب حتى يحافظ على شكله ونظافته ... وهنا تحتاجي محرم لك لانو صعب تديرينه لوحدك ....

الاستراحه >>> فكره جميله بس مكلفه تحتاجي ارض تبني فيها وتعملي ومسبح او بيت شعر اللي يناسبك وتكون فيها ديكورات ملفته و جميله وجلسه خارجيه مرتبه مع النجيله والشغلات اللي حابه تضيفيها حتتعبي فيها شويتين لكن مردوها المالي يعوضك ان شاء الله ويكون فيها حارس او عامل يهتم فيها ....

اذا ما ناسبتك الافكار دي .. اعملي كوفي شوب وسط جامعه او كليه وبيعي كل انواع العصيرات والكوفيهات باشكال جميله واتعاملي مع وحده تطبخ فالمنزل تسوي كوب كيك او حلويات وفطاير مرتبه واشكال جديده و تبيعها معاك لجذب الزباين ...
صراحه دايم احلم افتح محل كوفي وابيع فيه بنفسي عندي افكار كتيره لتحسين وتطوير المشروع ذا وخاصه ان المدينه اللي انا فيها تنقصها هذي المحلات داخل الجامعه و الكليه او مدرسه احس خياراتهم محدوده مافي شي مميز ...

لا تعملي كوفي نسائي خارجي دايم اشوفها خسرانه وفالنادر احد يجيها اعمليه فمحل يتواجد فيه النساء بكثره زي الجامعات والمعاهد وغيره ...

عموما الله يباركلك فرزقك ويكتبلك اللي فيه الخير وطمنينا ايش قررتي تعملي اتحمست معاك ^_^