والله ما أحب أحبطكم, اليوم لمن دخلنا المبنى أعطيناهم الأوراق اللي طلبوها وبعد انتظار أعطونا ورقة الفحص الطبي وطلبو منا نروح للميديكال حقهم ونسوي الكشف, أنا قبل ما أخرج من عندهم قابلت مدير التوظيف ممدوح طيب, وسألته اذا في باقي دفعات للمشرفين ما جاتهم رسائل للقبول, قلي لا خلاص أرسلنا لكل المقبولين واللي عددهم 25 متقدم, بعدها خرج على طول لأنه واضح انه مشغول, رحت بعدها دخلت أحد المكاتب وسألتهم عن الرواد فقالولي نحنا ما عندنا أي خبر بيهم وهذولا تروح لهم عند المبنى اللي في شارع فلسطين تقاطع الستين لأنه هناك ادارتهم, اما عن تقنية المعلومات ما عندهم خلفية, أنا فكرت أروح مكتب ثاني واسأل بس لقيت أغلب مكاتب الموظفين مشغولين يسلمون على بعض وشغالين حكاوي عن الاجازة فقلت لا أقاطعهم وخليني ألحق الشباب على الميديكال فأعذروني لو ما جبت لكم أجوبة شافية.

بالنسبة للميديكال, الله يعينكم على الانتظار, سوينا اليوم 3 فحوصات عينات بول وتحليل دم وكشف أشعة الصدر وكشف الأسنان, وبعدها جات الساعة على 1 الظهر قالو خلاص تعالو بكرا كملو باقي الفحوصات, أتوقع باقي فحص انف واذن وحنجرة والبصر والسمع وقياس الطول والوزن ومقابلة الدكتور العام.
غير الكشف الطبي, عندك خطاب تقدمه لإدارة الأدلة الجنائية لطلب صحيفة الحالة الجنائية, وهذي للي يبغا يسويها لازم تجي الصبح بدري علشان تسوي البصمة وتحجز رقم لأنهم يسوون فقط لأول 200 شخص وكمان فقط من 8 الصبح الين 12 الظهر, ويقلك تاخذ الصحيفة بعد اسبوعين.

بعدها رجعت البيت وعلى الساعة 3 وربع يتصلني ناصر ياسين حق برنامج الرواد يباركلي بتجاوزي المقابلة الشخصية وتحديد موعد الكشف الطبي اللي بيكون الاربعاء هذا, اللهم لك الحمد والشكر كما ينبغي لجلال وجهك وعظيم سلطانك ^______^
أنا بكمل ان شاء الله اجراءات الكشف الطبي غدا وحقلهم يحسبوها ليا في الرواد, وأنا أعلن انسحابي من المشرفين.

والله يوفقكم جميعا, واللي ماجاله نصيب في أي من هذه البرامج, اسأل الله أن يرزقه خيرا منها.